KO TEUTALŌNOME 28

Ko e ngaahi Tāpuaki ‘o e Talangofuá

(Lev 26.3-13; Teu 7.12-24)

1PEA ‘e hoko ‘o pehē, kapau te ke mātu‘aki fakaongo ki he le‘o ‘o Sihova ko ho ‘Otua, mo tokanga ke fai ‘ene ngaahi tu‘utu‘uni kotoa, ‘a ia ‘oku ou feia atu he ‘aho ni, pea ‘e toki ‘ai koe ‘e Sihova ko ho ‘Otua ke ke mā‘olunga taha ‘i he kakai kotoa pē ‘o māmani:#Teu 11.13-17 2pea ‘e toki toupili mai kiate koe ‘a e ngaahi monū ni ko eni, pea te nau ma‘u koe, ‘o kapau te ke fakaongo ki he le‘o ‘o Sihova ko ho ‘Otua.

3Te ke monū‘ia ‘i he kolo, pea te ke monū‘ia ‘i he vao.

4‘E monū‘ia ‘a e fua ‘o ho manava, mo e fua ‘o ho kelekele, mo e fua ‘o ho‘o fanga manu, ‘a e fanafanau ‘a ho‘o fanga pulu, mo e fakahoa ‘a ho‘o fanga sipi mo kosi.

5‘E monū‘ia ho‘o kato mo ho‘o natu‘anga mā.

6Te ke monū‘ia ‘i ho‘o hū mai, pea te ke monū‘ia ‘i ho‘o hū atu.

7‘E tuku ‘e Sihova ‘a e ngaahi fili ‘oku tu‘u kiate koe ke te‘ia ‘i ho ‘ao: na‘a nau hū mai kiate koe ‘i ha hala pē taha, ka te nau hola meiate koe ‘i ha hala ‘e fitu.

8‘E tu‘utu‘uni ‘e Sihova ke ‘iate koe ‘a e tāpuaki ‘i ho ngaahi feleoko, pea ‘i he me‘a kotoa pē ‘oku ke ala ki ai: ‘io, te ne fakamonū‘ia koe ‘i he fonua ‘oku foaki atu ‘e Sihova ko ho ‘Otua.

9‘E fokotu‘u koe ‘e Sihova ko e kakai tāpuhā kiate ia, hangē ko ‘ene fuakava kiate koe; ‘o kapau te ke tauhi ‘a e ngaahi tu‘utu‘uni ‘a Sihova ko ho ‘Otua, mo foua hono ngaahi hala. 10Pea ‘e vakai ‘e he ngaahi kakai ‘o māmani ‘oku ui‘aki koe ‘a e huafa ‘o Sihova. Pea te nau manavahē telia ‘a koe. 11Pea ‘e ‘ai ‘e Sihova ke ope atu ho lelei ‘i he fua ‘o ho manava mo e fua ‘o ho‘o fanga manu, mo e fua ‘o ho kelekele ‘i he fonua na‘a ne fuakava ai ki ho tupu‘anga ke ‘atu mo‘ou. 12‘E fakaava ma‘au ‘e Sihova hono falekoloa lelei ko e langi, ke ‘atu ‘a e ‘uha ‘o ho fonua ‘i hono taimi totonu, pea ke fakamonū‘ia ‘a e ngāue kotoa pē ‘a ho nima: pea te ke tali ‘a e nō ‘a e ngaahi fo‘i pule‘anga lahi, ka ‘e ‘ikai te ke nō koe. 13Pea ‘e tuku koe ‘e Sihova ke ke ‘ulu, ‘o ‘ikai te ke hiku; pea te ke taka ‘olunga pē, ‘o ‘ikai te ke taka lalo; ‘o kapau te ke fakaongo ki he ngaahi tu‘utu‘uni ‘a Sihova ko ho ‘Otua, ‘a ia ‘oku ou feia atu he ‘aho ni, ‘o ke tokanga ke fai ki ai: 14‘o ‘ikai te ke momo‘i afe mei he ngaahi me‘a ‘oku ou tu‘utu‘uni atu he ‘aho ni ki he to‘omata‘u pe ko e to‘ohema, he muimui ‘otua kehe mo tauhi ki ai.

Ko e Nunu‘a ‘o e Talangata‘á

(Lev 26.14-46)

15Ka ‘o kapau ‘e ‘ikai te ke fakaongo ki he le‘o ‘o Sihova ko ho ‘Otua ke tauhi mo fai ‘ene ngaahi tu‘utu‘uni mo fekau, ‘a ia kuo u feia atu he ‘aho ni; pea ‘e toki toupili kiate koe ‘a e ngaahi mala kotoa ko eni, pea te nau ma‘u koe.

16Te ke mala‘ia ‘i he kolo, pea te ke mala‘ia ‘i he vao.

17‘E mala‘ia ho‘o kato mo ho‘o natu‘anga mā.

18‘E mala‘ia ‘a e fua ‘o ho manava, mo e fua ‘o ho kelekele, ‘a e fanafanau ‘a ho‘o fanga pulu, mo e fakahoa ‘a ho‘o fanga sipi mo kosi.

19Te ke mala‘ia ‘i ho‘o hū mai, pea te ke mala‘ia ‘i ho‘o hū atu.

20‘E tuku atu ‘e Sihova kiate koe ‘a e mala, ‘a e ‘ohovale mo e houhou‘ia, ‘i he me‘a kotoa pē ‘oku ke ala ki ai ke fai, kae‘oua ke ke ka‘anga, pea ‘auha vave; ko e ō ia ‘o e kovi ho‘o fai‘anga ‘i ho‘o li‘aki au. 21‘E tuku ‘e Sihova ‘a e mahaki faka‘auha ke piki kiate koe, kae‘oua ke ne faka‘osi koe mei he funga ‘o e kelekele ‘oku ke ‘alu ki ai ke ma‘u. 22‘E taa‘i koe ‘e Sihova ‘aki ‘a e fakalilelila, mo e mofi, mo e kiatolo, mo e me‘a kula, mo e la‘ala‘ā, mo e mahunu, mo e kekena; pea te nau toupili kiate koe kae‘oua ke ke ‘auha. 23Pea ‘e hoko ho langi ‘i ‘olunga na ko e kapa ‘atā, pea ko ho kelekele ‘i lalo na ko e ‘aione. 24‘E ‘ai ‘e Sihova ‘a e ‘uha ‘o ho fonua ko e efu mo e efuefu: ‘e ‘alu hifo kiate koe mei langi kae‘oua ke ke ‘auha.

25‘E tuku koe ‘e Sihova ke te‘ia ‘i he ‘ao ‘o ho ngaahi fili; te ke hū atu ke fai mo kinautolu ‘i ha hala ‘e taha, ka te ke hola meiate kinautolu ‘i ha hala ‘e fitu: pea te ke hoko ko e me‘a ke tekatali ‘aki ‘e he ngaahi pule‘anga ‘o māmani. 26Pea ko ho ‘anga‘anga ‘e tu‘u mo‘o me‘akai ‘a e manupuna kotoa pē ‘o e ‘atā, mo e manu ‘o e fonua, pea ‘e ‘ikai ha taha ke sese‘e. 27Pea ‘e taa‘i koe ‘e Sihova ‘aki ‘a e hangatāmaki ‘o ‘Isipite, pea ‘aki ‘a e ‘ulufī, pea ‘aki ‘a e pokua, mo e tāveli, ‘a ia ‘oku ‘ikai ke lava hano faito‘o. 28‘E taa‘i koe ‘e Sihova ‘aki ‘a e sesele, mo e kui loto, mo e loto lelea: 29pea te ke fāfā holo ho‘atā hangē ko e fāfā ‘a e kui ‘i he po‘uli, pea ‘e ‘ikai lakaimonū ho ngaahi ‘alunga: pea te ke hoko ko e koto fakamālohia mo vetea ma‘u ai pē, pea ‘e ‘ikai ha taha ke fakahaofi.

30Te ke polo‘i hao uaifi, ka ko e tangata kehe ‘e mohe mo ia: te ke langa ha fale, kae ‘ikai te ke nofo ai: te ke tō ha ngoue vaine, kae ‘ikai te ke polopolo ia. 31‘E tāmate‘i ho‘o pulu ‘i ho ‘ao, kae ‘ikai te ke kai mei ai: ‘e ‘ave fakamālohi ho‘o ‘asi meia koe tonu, pea ‘e ‘ikai fakafoki atu: ‘e tuku ho‘o fanga sipi mo kosi ki ho ngaahi fili, pea ‘ikai hao fakahaofi. 32‘E tuku ho‘o fānau tangata mo ho‘o fānau fefine ki ha kakai kehe, pea ‘e fakasio ho mata, ‘o vana he holi kiate kinautolu ‘i he ‘aho kotoa pē, kae ‘ikai te ke mafai ha me‘a. 33Ko e fua ‘o ho kelekele mo ho‘o ngaahi ngāue kotoa, ‘e keina ‘e ha kakai ‘oku ‘ikai te ke ‘ilo ki ai, ka ke nofo koe ko e koto fakamālohia mo laikina ma‘u ai pē: 34ko ia, te ke sesele tu‘u ‘i he me‘a ‘oku hā ma‘u ki ho mata ‘i ho‘o sio. 35‘E taa‘i koe ‘e Sihova ‘aki ‘a e hangatāmaki kovi ‘i ho tui pea mo ho va‘e, ‘a ia ‘e ‘ikai lava hano faito‘o, ‘io, mei ho ‘aofiva‘e ki ho tumu‘aki.

36‘E ‘ave ‘e Sihova ‘a koe, mo e tu‘i te ke fakanofo kiate koe, ki ha pule‘anga na‘e ‘ikai te ke ‘iloa, ‘e koe, pe ko ho‘o ngaahi kui, pea te ke tauhi ai ki ha ngaahi ‘otua kehe, ko e ‘akau mo e maka. 37Pea te ke hoko ko e me‘a ke ofo ai, mo fakatokotokanaki ‘aki, mo luma ai, ‘e ha ngaahi kakai ‘a ia ‘e taki pōpula kimoutolu ki ai ‘e Sihova.

38‘E lahi ‘a e pulopula te ke ‘ave ki he ngoue‘anga, kae si‘i ‘a e me‘a te ke utu; he ‘e keina ia ‘e he he‘e. 39Te ke tō ngoue vaine mo tauhi ki ai, kae ‘ikai te ke inu hono uaine, pe te ke toli ia; he ‘e kai ‘e he tunga. 40‘E ai ha‘o ngaahi fu‘u ‘ōlive ‘i ho ngaahi feitu‘u kehekehe, kae ‘ikai te ke tākai ‘aki hono lolo; he kaulo‘a ho‘o ‘ōlive. 41Te ke fanau‘i ha fānau tangata mo ha fānau fefine, kae ‘ikai ‘a‘au ia; he taki pōpula kinautolu. 42Ko ho‘o ngaahi ‘akau kotoa, mo e fua ‘o ho kelekele ‘e ma‘u ‘e he he‘e.

43Ko e muli ‘oku ‘i ho lotolotonga te ne kaka ‘iate koe, ‘o ‘alu ai pē ki ‘olunga, ka ko koe te ke ‘alu hifo, ‘o fai ai pē ki lalo. 44Te ke nō koe kiate ia, pea ‘e ‘ikai nō ia kiate koe: ko ia pē te ne ‘ulu, ka ko koe pē ‘e hiku.

45Pea ‘e a‘u ‘a e ngaahi mala ni kiate koe, ‘io, te nau toupili kiate koe, mo ma‘u koe, kae‘oua ke ke ‘auha; koe‘uhi na‘e ‘ikai te ke fakaongo ki he le‘o ‘o Sihova ko ho ‘Otua, ‘i he tauhi ‘ene ngaahi tu‘utu‘uni mo fekau, ‘a ia na‘a ne tu‘utu‘uni kiate koe: 46pea ko e ngaahi me‘a ko ia ko e faka‘ilonga mo e mana kiate koe mo ho hako ‘o ta‘engata. 47Ko e me‘a ‘i he ‘ikai te ke tauhi kia Sihova ko ho ‘Otua ‘i he fiefia mo e loto lelei, tupu ‘i he mahu ‘o e me‘a kotoa; 48ko ia te ke tauhi ‘a e ngaahi fili, ‘a ia ‘e fekau atu ‘e Sihova kiate koe, ‘i he fiekaia, mo e fie inua, mo e telefua, mo e masiva ‘i he me‘a kotoa: pea te ne#28.48 te ne; pe ‘e hanga ‘e ho ngaahi filí ‘o. ‘ai ha ‘ioke ukamea ki ho kia, kae‘oua ke ne faka‘auha koe. 49‘E ‘omi ‘e Sihova kiate koe ha pule‘anga mei he mama‘o, mei he ngata‘anga ‘o māmani, hangē ko e muna ‘a ha ‘īkale; ko e kakai ‘oku ‘ikai te ke ‘ilo ‘enau lea; 50ko e kakai mata fefeka, ‘a ia ‘e ‘ikai te nau toka‘i ha motu‘a, pe ‘ofa ki ha talavou; 51pea te ne kai ‘a e fua ‘o ho‘o fanga manu, mo e fua ‘o ho kelekele, kae‘oua ke ke ‘auha: ‘a ia foki ‘e ‘ikai te nau fakatoe ha‘o koane, pe uaine, pe lolo, ‘a e ‘uhiki ‘o ho‘o fanga pulu, pe ko e fakahoa ‘a ho‘o fanga sipi pe kosi, ka ne fai atu pē ke ke ‘auha koe. 52Pea te ne ‘ohofi koe ‘i ho ngaahi kolo, kae‘oua ke holo ho fonua kotoa, ho ngaahi ‘ā mā‘olunga mo mālohi, ‘a ia ‘oku ke falala ki ai: ‘io, te ne ‘ohofia koe ‘i ho ngaahi kolo kotoa, ‘i he fonua kotoa kuo foaki kiate koe ‘e Sihova ko ho ‘Otua.

53Pea te ke kai ‘a e fua ‘o ho manava, ‘a e kakano ‘o ho‘o fānau tangata mo fānau fefine, ‘a ia ‘oku foaki kiate koe ‘e Sihova ko ho ‘Otua; ‘i he ‘ākilotoa mo e ‘efihia ‘a ia ‘oku faka‘efihi ai koe ‘e ho ngaahi fili. 54Ko e tangata ‘iate koe ‘oku pelepelengesi, mo fakananivi fau, te ne mata kovi ki hono tokoua, pea ki he uaifi ‘oku faaki ki hono fatafata, mo e toetoe ‘o ‘ene fānau: 55‘o ‘ikai te ne fie ‘ange ki hanau toko taha ha me‘i kakano ‘o ‘ene fānau ‘oku ne kai; ko e ‘ikai toe ha‘ane me‘a ‘i he ‘ākilotoa mo ‘efihia, ‘a ia ‘oku faka‘efihi ai koe ‘e ho ngaahi fili ‘i ho ngaahi kolo kotoa. 56Ko e fefine ‘iate koe ‘oku pelepelengesi mo fakananivi, ‘a ia na‘e ‘ikai te ne kākunga ke ‘ai ki he kelekele hono ‘aofiva‘e, kuo pehē fau ‘ene pelepelengesi, mo e fakananivi ‘ene mo‘ui, te ne mata kovi ki he husepāniti ‘oku faaki ki hono fatafata, pea ki he‘ene tama mo ‘ene ta‘ahine: 57telia ‘a e fonua ‘oku ha‘u ‘iate ia, pea telia ‘ene fānau te ne fā‘ele‘i; he te ne kai fufū ia, ko ‘ene masiva ‘āngoa ‘i he ‘ākilotoa mo e ‘efihia, ‘a ia ‘oku faka‘efihi ‘ai koe ‘e ho fili ‘i ho ngaahi kolo.#2 Tu‘i 6.28-29; Tangi 4.10

58Kapau ‘e ‘ikai te ke tokanga ke fai ‘a e ngaahi lea ‘o e lao ni, ‘a ia ‘oku tohi ‘i he tohi ni, ke ‘apasia ki he huafa lāngilangi‘ia mo manavahē‘ia ko eni, ko SIHOVA ‘ELOHEIKA (ko Sihova-ko-ho-‘Otua); 59pea ‘e toki ‘ai ‘e Sihova ke fakaofo ho ngaahi tā, mo e tā ‘o ho hako, ko e ngaahi tā lalahi mo fuoloa. 60Pea te ne fakafoki kiate koe ‘a e ngaahi mahaki kotoa ‘o ‘Isipite, ‘a ia na‘a ke manavahē ki ai, pea te nau piki kiate koe. 61Ka ai ha mahaki foki, pea ka ai ha tā, ‘oku ‘ikai ke tu‘u ‘i he tohi lao ni, ‘e ‘omi mo ia ‘e Sihova kiate koe, kae‘oua ke ke ‘auha. 62Pea te mou iku ‘o toko si‘i; ‘osi, foki na‘a mou hangē ko e ngaahi fetu‘u ‘o e langi homou tokolahi; koe‘uhi na‘e ‘ikai te ke fakaongo ki he le‘o ‘o Sihova ko ho ‘Otua. 63Pea hangē na‘e fiefia ‘a Sihova ke fai lelei kiate kimoutolu, pea ke fakatokolahi kimoutolu; pehē ‘e fiefia ‘a Sihova ke faka‘osi kimoutolu, mo faka‘auha, pea ‘e ta‘aki kimoutolu mei he kelekele ‘oku ke ‘alu ki ai ke ma‘u.

64Pea ‘e fakamovetevete koe ‘e Sihova ki he ngaahi kakai kehekehe, mei he potu ‘e taha ‘o māmani ‘o a‘u ki he potu ‘e taha; pea te ke tauhi ai ki ha ngaahi ‘otua kehe, ‘a ia na‘e ‘ikai te ke ‘ilo ki ai, ‘e koe pe ko ho‘o ngaahi kui, ko e ‘akau mo e maka. 65Pea ‘i he ngaahi kakai ko ia ‘e ‘ikai ha‘o fiemālie, pe ha potu ke tu‘u ai ho ‘aofiva‘e ke mālōlō: pea ‘e ‘atu kiate koe ‘e Sihova ‘i ai ha manava ‘oku toutou, mo ha mata ‘oku vaia, mo e mo‘ui ‘oku lele: 66pea ‘e hangē ‘oku tautau ho‘o mo‘ui ‘i ho ‘ao, pea te ke ilifia po‘uli mo ‘aho, pea ‘e ‘ikai te ke tui ki ho‘o mo‘ui. 67Pongipongi te ke pehē, Taumaiā kuo efiafi! pea ‘i he efiafi te ke pehē, Taumaiā kuo pongipongi! koe‘uhi ko e ilifia ‘oku ilifia ‘aki ho loto, pea koe‘uhi ko e me‘a ‘oku mātā ‘e ho mata ‘i ho‘o sio. 68Pea ‘e fakafoki vaka koe ‘e Sihova ki ‘Isipite, ‘a e fononga ko ia na‘a ku#28.68 na‘á ku; pe na‘á ne. lea ai kiate koe, ‘o pehē, ‘E ‘ikai te ke toe sio ki ai: pea ‘e fakatau ai kimoutolu ‘i he potu ko ia ki homou ngaahi fili, ke tamaio‘eiki mo kaunanga, pea ‘e ‘ikai fiema‘u kimoutolu ‘e ha taha.

Currently Selected:

KO TEUTALŌNOME 28: TMB

Highlight

Copy

Compare