Popular Bible Verses from KO TEUTALŌNOME 28

Share

PEA ‘e hoko ‘o pehē, kapau te ke mātu‘aki fakaongo ki he le‘o ‘o Sihova ko ho ‘Otua, mo tokanga ke fai ‘ene ngaahi tu‘utu‘uni kotoa, ‘a ia ‘oku ou feia atu he ‘aho ni, pea ‘e toki ‘ai koe ‘e Sihova ko ho ‘Otua ke ke mā‘olunga taha ‘i he kakai kotoa pē ‘o māmani

pea ‘e toki toupili mai kiate koe ‘a e ngaahi monū ni ko eni, pea te nau ma‘u koe, ‘o kapau te ke fakaongo ki he le‘o ‘o Sihova ko ho ‘Otua.

Pea ‘e tuku koe ‘e Sihova ke ke ‘ulu, ‘o ‘ikai te ke hiku; pea te ke taka ‘olunga pē, ‘o ‘ikai te ke taka lalo; ‘o kapau te ke fakaongo ki he ngaahi tu‘utu‘uni ‘a Sihova ko ho ‘Otua, ‘a ia ‘oku ou feia atu he ‘aho ni, ‘o ke tokanga ke fai ki ai

‘E fakaava ma‘au ‘e Sihova hono falekoloa lelei ko e langi, ke ‘atu ‘a e ‘uha ‘o ho fonua ‘i hono taimi totonu, pea ke fakamonū‘ia ‘a e ngāue kotoa pē ‘a ho nima: pea te ke tali ‘a e nō ‘a e ngaahi fo‘i pule‘anga lahi, ka ‘e ‘ikai te ke nō koe.

‘E tuku ‘e Sihova ‘a e ngaahi fili ‘oku tu‘u kiate koe ke te‘ia ‘i ho ‘ao: na‘a nau hū mai kiate koe ‘i ha hala pē taha, ka te nau hola meiate koe ‘i ha hala ‘e fitu.

‘E tu‘utu‘uni ‘e Sihova ke ‘iate koe ‘a e tāpuaki ‘i ho ngaahi feleoko, pea ‘i he me‘a kotoa pē ‘oku ke ala ki ai: ‘io, te ne fakamonū‘ia koe ‘i he fonua ‘oku foaki atu ‘e Sihova ko ho ‘Otua.

Te ke monū‘ia ‘i ho‘o hū mai, pea te ke monū‘ia ‘i ho‘o hū atu.

Te ke monū‘ia ‘i he kolo, pea te ke monū‘ia ‘i he vao.

‘E monū‘ia ‘a e fua ‘o ho manava, mo e fua ‘o ho kelekele, mo e fua ‘o ho‘o fanga manu, ‘a e fanafanau ‘a ho‘o fanga pulu, mo e fakahoa ‘a ho‘o fanga sipi mo kosi.

‘E fokotu‘u koe ‘e Sihova ko e kakai tāpuhā kiate ia, hangē ko ‘ene fuakava kiate koe; ‘o kapau te ke tauhi ‘a e ngaahi tu‘utu‘uni ‘a Sihova ko ho ‘Otua, mo foua hono ngaahi hala.

‘E monū‘ia ho‘o kato mo ho‘o natu‘anga mā.

Pea ‘e ‘ai ‘e Sihova ke ope atu ho lelei ‘i he fua ‘o ho manava mo e fua ‘o ho‘o fanga manu, mo e fua ‘o ho kelekele ‘i he fonua na‘a ne fuakava ai ki ho tupu‘anga ke ‘atu mo‘ou.

Pea ‘e vakai ‘e he ngaahi kakai ‘o māmani ‘oku ui‘aki koe ‘a e huafa ‘o Sihova. Pea te nau manavahē telia ‘a koe.

‘o ‘ikai te ke momo‘i afe mei he ngaahi me‘a ‘oku ou tu‘utu‘uni atu he ‘aho ni ki he to‘omata‘u pe ko e to‘ohema, he muimui ‘otua kehe mo tauhi ki ai.

Ka ‘o kapau ‘e ‘ikai te ke fakaongo ki he le‘o ‘o Sihova ko ho ‘Otua ke tauhi mo fai ‘ene ngaahi tu‘utu‘uni mo fekau, ‘a ia kuo u feia atu he ‘aho ni; pea ‘e toki toupili kiate koe ‘a e ngaahi mala kotoa ko eni, pea te nau ma‘u koe.