KO TEUTALŌNOME 29
29
1KO E ngaahi lea eni ‘o e kovinānite, ‘a ia na‘e fekau ‘e Sihova ‘a Mōsese ke fai mo ha‘a ‘Isileli ‘i he fonua ‘o Moape–taha kehe ‘a e kovinānite na‘a ne fai mo kinautolu ‘i Hōlepi.
2Pea ui ange ‘e Mōsese ‘a ‘Isileli kātoa, ‘o ne pehē kiate kinautolu, Na‘a mou mamata ki he ngaahi me‘a na‘e fai ‘e Sihova ‘i homou ‘ao ‘i ‘Isipite kia Felo, pea ki he‘ene kau tamaio‘eiki, pea ki he fonua kotoa; 3‘a e ngaahi fu‘u ‘ahi‘ahi, ‘a ia na‘e sio ki ai ho mata, ‘a e ngaahi faka‘ilonga, mo e ngaahi fu‘u mana ko ia: 4ka kuo ‘ikai ‘atu ‘e Sihova kiate kimoutolu ha loto ke ‘ilo, mo ha mata ke sio, mo ha telinga ke ongona, ‘o a‘u ki he ‘aho ni. 5Pea kuo u taki kimoutolu ‘i he toafa ‘o fāngofulu‘i ta‘u: kuo ‘ikai mokulu homou kofu ko ‘ene motu‘a, pea kuo ‘ikai tō ho sū mei ho va‘e ko ‘ene ‘osi‘osi. 6Kuo ‘ikai te mou kai mā, pe inu uaine mo e kava mālohi: koe‘uhiā ke mou ‘ilo ko Sihova au ko homou ‘Otua. 7Pea ‘i ho‘omou a‘u ki he potu ni, na‘e hū kitu‘a ‘a Sīhoni ko e Tu‘i Hesiponi, mo ‘Oki ko e Tu‘i Pēsani, ke fai tau mo kitautolu, pea na‘a tau taa‘i kinautolu:#Nōm 21.21-35 8pea na‘a tau to‘o honau fonua, pea tau vahe ia ko e tofi‘a ‘o ha‘a Lūpeni, mo ha‘a Kata, mo e vaeuamālie ‘o e matakali ‘o Manase. 9Ko ia, mou tauhi ‘a e ngaahi lea ‘o e kovinānite ko eni, ‘o fai ki ai, ko ia te ke tu‘umālie ai ‘i he me‘a kotoa te ke ngāue ki ai.
10Ko kimoutolu ena ‘oku mou tutu‘u kotoa pē he ‘aho ni ‘i he ‘ao ‘o Sihova ko homou ‘Otua; ‘a homou hou‘eiki, ‘a homou ngaahi matakali, ‘a homou kau mātu‘a, ‘a homou kau ‘ōfisa, ‘a e tangata ‘Isileli fua pē, 11‘a ho‘omou tamaiki, ‘a homou ngaahi uaifi, mo ho‘o muli ‘oku nofo ‘i ho ngaahi ‘apitanga, fai mei ho‘o tama tā fefie ‘o a‘u kiate ia ‘oku ‘utu ho‘o vai: 12koe‘uhi ke ke hū ki he kovinānite ‘a Sihova ko ho ‘Otua, pea ki he‘ene fuakava ‘a ia ‘oku fai mo koe he ‘aho ni ‘e Sihova ko ho ‘Otua: 13koe‘uhiā ke ne fokotu‘u koe he ‘aho ni ko hono kakai, ka ne hoko ia ko ho ‘Otua, ‘o hangē ko ‘ene folofola kiate koe, pea hangē ko ‘ene fuakava ki ho‘o ngaahi kui, kia ‘Epalahame, kia ‘Aisake, pea kia Sēkope. 14Pea tala‘ehai ko kimoutolu pē ‘oku ou fai ai ‘a e kovinānite ni mo e fuakava ni: 15ka ‘oku ou fai mo ia ‘oku tu‘u hena mo kitautolu he ‘aho ni ‘i he ‘ao ‘o Sihova ko hotau ‘Otua, pea mo ia ‘oku ‘ikai ke tu‘u hena he ‘aho ni:
16(he ‘oku mou ‘ilo ‘a e anga ‘o ‘etau nofo ‘i ‘Isipite, mo ‘etau ‘asi mai ‘i he lotolotonga ‘o e ngaahi kakai–‘a kinautolu na‘a mou fononga mei ai. 17–Pea kuo mou mamata ki he‘enau ngaahi me‘a fakalielia, mo ‘enau ngaahi tamapua na‘e fe‘ao mo kinautolu, ko e ‘akau mo e maka, ko e siliva mo e koula) 18na‘a ai ha taha ‘iate kimoutolu, ha tangata pe fefine, pe ha fāmili, pe ha matakali, ‘oku tafoki hono loto he ‘aho ni meia Sihova ko hotau ‘Otua, ke ‘alu ‘o tauhi ‘a e ngaahi ‘otua ‘a e ngaahi pule‘anga ko ē: ‘io, na‘a ai ‘iate kimoutolu ha aka ‘oku fakatupu ‘a e ‘ahu mo e kona‘ī‘ī: 19pea ‘i he ‘iloange ‘oku ne fanongo ki he ngaahi lea ‘o e fuakava ni, pea ne fakamālie‘ia hono loto, ‘o pehē, Te u tu‘umālie pē, he ko e ta‘emangoi au, pea te u fai atu, koe‘uhi ke tafi‘i ‘a e mākona fakataha mo e fie inua. 20‘E ‘ikai fie fakamolemole ia ‘e Sihova, kaekehe ‘e kohu ‘a e tuputāmaki ‘a Sihova mo ‘ene fua‘a ki he tangata ko ia, pea ‘e tokoto kiate ia hono kotoa ‘o e mala kuo tohi ‘i he tohi ni, pea ‘e tāmate‘i ‘e Sihova hono hingoa mei he lalo langi. 21Pea ‘e vahe‘i ia ‘e Sihova mei he ngaahi matakali ‘Isileli ke kovi, ‘o tatau mātē mo e ngaahi mala ‘o e kovinānite kuo u tohi ‘i he tohi lao ni.
22Pea ‘e lau ‘e he to‘utangata ka hoko, ho‘omou fānau ‘e tu‘u ‘o fetongi kimoutolu, pea mo e muli ‘e ha‘u mei ha fonua mama‘o–ka nau ka mamata ki he ngaahi tā ‘o e fonua ko ia, mo e ngaahi mahaki kuo fakamahaki ‘aki ia ‘e Sihova; 23ko e koto sūlifa mo māsima, mo e vela ‘a e fonua kotoa, ‘oku ‘ikai fai ai ha tō ta‘u, pea ‘oku ‘ikai tupu ai ha me‘a, pe ‘alu hake ha momo‘i mohuku ‘i ai, hangē ko e fulihi ‘o Sōtoma mo Komola, ‘o ‘Ātima mo Sipoimi, ‘a ia na‘e fulihi ‘e Sihova ‘i he‘ene tuputāmaki mo ‘ene houhau kakaha, 24–‘io, ‘e pehē ‘e he ngaahi pule‘anga, Ko e hā kuo fai pehē ai ‘e Sihova ki he fonua na? ko e hā kuo pehē fau ai ‘a e kakaha ‘o e houhau ni? 25Pea ‘e tali ‘e ha ni‘ihi, Koe‘uhi na‘a nau li‘aki ‘a e kovinānite ‘a Sihova ko e ‘Otua ‘o honau tupu‘anga, ‘a ia na‘a ne fai mo kinautolu ‘i he‘ene ‘omi kinautolu mei ‘Isipite: 26ka nau ‘alu ‘o tauhi ‘otua kehe, ‘o lotu ki ai, ko e ngaahi ‘otua na‘e ‘ikai te nau ‘ilo ki ai, pea kuo ‘ikai te ne vahe kiate kinautolu: 27ko ia na‘e kakaha ai ‘a e houhau ‘a Sihova ki he fonua ko ē, ke ‘omi ki ai hono kotoa ‘o e mala kuo tohi ‘i he tohi ni: 28pea na‘e ta‘aki fu‘u kinautolu ‘e Sihova mei honau kelekele, ‘i he ‘ita mo e houhau mo e tuputāmaki lahi, ‘o ne lī kinautolu ki ha fonua kehe, hangē ko ia he ‘aho ni.
29Ko e ngaahi me‘a ‘oku fufū ‘oku ‘ia Sihova ko hotau ‘Otua: ka ko e ngaahi me‘a kuo fakahā ‘oku ‘atautolu mo ‘etau fānau ‘o ta‘engata ke tau feia ‘a e ngaahi lea kotoa ‘o e lao ni.
Currently Selected:
KO TEUTALŌNOME 29: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
