KO TEUTALŌNOME 27
27
Ko Hono Tongi ‘o e Lao ‘a e ‘Otuá he Maka
1PEA na‘e fekau ‘e Mōsese mo e kau mātu‘a ‘Isileli ki he kakai, ‘o pehē, Tauhi hono kotoa ‘o e tu‘utu‘uni ‘oku ou feia atu he ‘aho ni. 2Pea ka faifai pea mou a‘a atu ‘i Soatani ki he fonua ‘oku foaki kiate koe ‘e Sihova ko ho ‘Otua, ko e taimi ko ia te ke fokotu‘u ai ha‘o ngaahi maka lalahi, ‘o vali lahe:#Sios 8.30-32 3pea te ke tohi ki ai ‘a e ngaahi lea ‘o e lao ni ‘i he hili ho‘o a‘a atu, koe‘uhi ke ke hū ki he fonua ‘a ia kuo foaki kiate koe ‘e Sihova ko ho ‘Otua, ko e fonua ‘oku mahutafea ‘i he hu‘akau mo e honi, ‘o hangē ko e tala‘ofa ‘a Sihova ko e ‘Otua ‘o ho tupu‘anga kiate koe. 4‘Io, ka faifai pea mou a‘a atu ‘i Soatani, te mou fokotu‘u ‘a e ngaahi maka ni, ‘a ia ‘oku ou fai tu‘utu‘uni ai kiate kimoutolu he ‘aho ni, ‘i he mo‘unga ko ‘Īpale, pea te ke vali ‘aki ‘a e lahe. 5Pea te ke langa ai ha ‘ōlita kia Sihova ko ho ‘Otua, ko ha ‘ōlita langa maka: ‘e ‘ikai te ke apo ha ukamea ki ai.#‘Eki 20.25 6Ko e ngaahi maka tekanoa te ke langa ‘aki ‘a e ‘ōlita ‘o Sihova ko ho ‘Otua: pea te ke feia ai ha ngaahi feilaulau-mōifua kia Sihova ko ho ‘Otua: 7pea te ke fai mo e ngaahi feilaulau-‘ofa, mo kai ‘i he potu ko ia; pea te ke fakafiefia ‘i he ‘ao ‘o Sihova ko ho ‘Otua. 8Pea te ke tohi ‘i he ngaahi maka ‘a e ngaahi lea ‘o e lao ni, ‘o tohi ke lelei.
9Pea lea ‘a Mōsese mo e kau Līvai taula‘eiki ki ha‘a ‘Isileli kātoa, ‘o pehē, ‘E ‘Isileli, longo ā mo fakaongo mai; ko e ‘aho ni kuo ke hoko ko e kakai ‘a Sihova ko ho ‘Otua. 10Ko ia te ke fakaongo ki hono le‘o, pea te ke fai ‘ene ngaahi tu‘utu‘uni mo fekau, ‘a ia ‘oku ou feia atu he ‘aho ni.
Ko e Mala‘ia ‘o e Talangata‘á
11Pea tu‘utu‘uni ‘e Mōsese ki he kakai ‘i he ‘aho ko ia, ‘o pehē, 12Ko eni ia ‘e tu‘u ‘i Mo‘unga Kelisimi ke tāpuaki ‘a e kakai, hili ho‘omou a‘a ‘i Soatani; ko Simione, mo Līvai, mo Siuta, mo ‘Īsaka, mo Siosifa, mo Penisimani.#Teu 11.29; Sios 8.33-35 13Pea ko eni ‘e tu‘u ‘i Mo‘unga ‘Īpale ki he fakamala‘ia; ko Lūpeni, ko Kata, mo ‘Āseli, mo Sepulone, ko Tani, pea mo Nafitalai. 14Pea ko e kau Līvai ‘e tali, pea te nau lea ki he tangata ‘Isileli kotoa ‘o le‘o lahi, ‘o pehē.
15Mala‘ia ā ka ko e tangata ‘oku ne ngaohi ha tamapua pe ‘īmisi ukamea, ko e me‘a ‘oku fakalili‘a ki ai ‘a Sihova,#‘Eki 20.4; 34.17; Lev 19.4; 26.1; Teu 4.15-18; 5.8 ko e ngāue ‘a e nima ‘o e tufunga, ‘o ne fokotu‘u ‘i ha lilo. Pea ‘e tali ‘e he kakai kotoa, ‘o pehē, ‘Ēmeni.
16Mala‘ia ā ka ko ia ‘oku ne fakatakataka ‘aki ‘ene tamai mo ‘ene fa‘ē.#‘Eki 20.12; Teu 5.16 Pea ‘e pehē ‘e he kakai kotoa, ‘Ēmeni.
17Mala‘ia ā ka ko ia ‘oku ne hiki ‘a e kau‘ā ‘a hono kaungā‘api.#Teu 19.14 Pea ‘e pehē ‘e he kakai kotoa, ‘Ēmeni.
18Mala‘ia ā ka ko ia ‘oku ne takihee‘i ‘a e kui mei he hala.#Lev 19.14 Pea ‘e pehē ‘e he kakai kotoa, ‘Ēmeni.
19Mala‘ia ā ka ko ia ‘oku ne piko‘i ‘a e fakamaau ‘o e muli, ‘o e tamai mate pea mo e uitou.#‘Eki 22.21; 23.9; Lev 19.33-34; Teu 24.17-18 Pea ‘e pehē ‘e he kakai kotoa, ‘Ēmeni.
20Mala‘ia ā ka ko ia ‘oku mohe mo e ‘unoho ‘o ‘ene tamai; he ko ‘ene tatala ‘a e vala ‘o ‘ene tamai.#Lev 18.8; 20.11; Teu 22.30 Pea ‘e pehē ‘e he kakai kotoa, ‘Ēmeni.
21Mala‘ia ā ka ko ia ‘oku ne mohe mo ha taha ‘i he fa‘ahinga manu.#‘Eki 22.19; Lev 18.23; 20.15 Pea ‘e pehē ‘e he kakai kotoa, ‘Ēmeni.
22Mala‘ia ā ka ko ia ‘oku ne mohe mo hono tuofefine, pe ko e ‘ōfefine ‘o ‘ene tamai, pe ko e tama ‘a ‘ene fa‘ē.#Lev 18.9; 20.17 Pea ‘e pehē ‘e he kakai kotoa, ‘Ēmeni.
23Mala‘ia ā ka ko ia ‘oku mohe mo e fa‘ē ‘a hono ‘unoho.#Lev 18.17; 20.14 Pea ‘e pehē ‘e he kakai kotoa, ‘Ēmeni.
24Mala‘ia ā ka ko ia ‘oku ne taa‘i fufū hono kaungā‘api. Pea ‘e pehē ‘e he kakai kotoa, ‘Ēmeni.
25Mala‘ia ā ka ko ia ‘oku ne tali ha koloa ke tāmate‘i ha tangata ta‘ehalaia. Pea ‘e pehē ‘e he kakai kotoa, ‘Ēmeni.
26Mala‘ia ā ka ko ia ‘oku ‘ikai ke fakapapau ‘a e ngaahi lea ‘o e lao ni ke fai ki ai.#Kal 3.10 Pea ‘e pehē ‘e he kakai kotoa, ‘Ēmeni.
Currently Selected:
KO TEUTALŌNOME 27: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
