Tīmoté 2 1
1
1TŪ ko au Paula, ko e ‘aposetolo ‘a Kalaisi Sīsū ‘i he tu‘utu‘uni ‘a e ‘Otua, koe‘uhi ā ko e palōmesi ‘o e mo‘ui ‘oku ‘ia Kalaisi Sīsū.
2Ko ‘eku tohi kia Tīmote, ko hoku foha ‘ofa‘anga.
‘Ofa ke ke ma‘u kelesi mo e meesi mo e melino, mei he ‘Otua ko e Tamai, mo Kalaisi Sīsū ko hotau ‘Eiki.
3‘Oku ou fakafeta‘i ki he ‘Otua, ‘a ia ‘oku ou tauhi ki ai ‘aki ‘a e lotu na‘a ku ma‘u mei he‘eku mātu‘a, ‘o u fai‘aki ‘a e konisēnisi ‘ata‘atā–ko ‘eku fakamo‘oni ia ki he ta‘emotu ‘eku manatu‘i koe ‘i he‘eku ngaahi hū ‘i he pō mo e ‘aho. 4He‘eku holi ke ta fe‘iloaki, ko ‘eku manatu ki ho lo‘imata, ka u fonu fiefia– 5‘io, ‘oku ou fakafeta‘i ‘i he‘eku manatu ki he tui ta‘eloi ‘oku ‘iate koe; ‘a e tui na‘e fua nofo ‘i ho‘o kui ko Loisi, pea mo ho‘o fa‘ē ko ‘Iunisi; pea ‘oku ou falala ‘oku ‘iate koe foki. 6Ko ia, ‘oku ou fakamanatu ai kiate koe, ke ke hunuaki ho‘o mafai mei he ‘Otua, ‘a ia ‘oku ‘iate koe ‘i he hilifaki ‘o hoku nima. 7He ko e Laumālie na‘e foaki ‘e he ‘Otua kiate kitaua, na‘e ‘ikai ko e Laumālie anga fo‘i, ka ko e anga mālohi, mo ‘ofa, mo valoki.
8Ko ia, ‘oua te ke maa‘i ‘a e fakahā ‘o hotau ‘Eiki, pe te ke maa‘i au ko ‘ene pōpula: kaekehe, ke ke kau mo au ‘i he kai mamahi koe‘uhi ko e Kōsipeli ‘i he funga ‘o e māfimafi ‘o e ‘Otua. 9‘A ia na‘a ne fakamo‘ui kitautolu, mo ne ui ki ha lakanga tapu; ‘o ‘ikai koe‘uhi ko ha ngāue ‘atautolu, ka koe‘uhi ko hono finangalo ‘o‘ona, pea koe‘uhi ko e kelesi na‘e foaki mai ‘ia Kalaisi Sīsū mei he ngaahi kuonga ‘o ‘Itāniti: 10ka na‘e fakae‘a ‘i onopooni ‘i he fakahā mai ‘o hotau fakamo‘ui ko Sīsū Kalaisi; ‘a ia na‘a ne fakaka‘anga ‘a Mate, ka ne huluhulu ‘a e mo‘ui mo e ta‘e‘auha ‘aki ‘a e Kōsipeli.
11‘A ia ko e me‘a na‘e fokotu‘u au ki ai, ko e malanga mo e ‘aposetolo mo e faiako. 12Ko hono ‘uhinga foki ia ‘oku ou mo‘ua ai ‘i he ngaahi mamahi ni; ka ‘oku ‘ikai te u mā ai: he ‘oku ou ‘ilo pē ‘a ia kuo u tui ki ai, pea ‘oku ou ‘ilo pau ‘oku ne mafai ke tauhi ‘eku me‘a kuo u tuku kiate ia, ‘o a‘u ki he ‘aho ko ē.#1.12 ‘eku… kiate ia; pe ‘a e me‘a kuó ne tuku kiate aú. 13Ko e anga ē ‘o e ngaahi lea mo‘ui na‘a ke fanongo ai meiate au, ‘i he tui mo e ‘ofa ‘oku ‘ia Kalaisi Sīsū. 14Ko e me‘a lelei ko ia kuo tuku kiate koe, ‘ē, ke ke tauhi ‘i he Laumālie Mā‘oni‘oni, ‘a ia ‘oku nofo ‘iate kitautolu.
15‘Oku ke ‘ilo foki kuo hiki kotoa pē meiate au ‘a kinautolu ‘i ‘Ēsia; kae‘uma‘ā ‘a Faikelo mo Heamokena. 16‘Ofa ke meesi ange ‘a e ‘Eiki ki he fāmili ‘o ‘Onesifolo: he na‘e tu‘o lahi ‘ene tokoni‘i au, pea na‘e ‘ikai te ne maa‘i hoku kii‘i. 17Ka ‘i he‘ene ‘i Loma, na‘a ne fai velenga hoku kumi ‘o ne ma‘u au. 18‘Ofa ange ē ‘Eiki ke ne ma‘u meesi mei He‘ene ‘Afio ‘i he ‘aho ko ē, pea ko ‘ene ngaahi fu‘u tokoni na‘a ne fai ‘i ‘Efesō ‘oku ke lāu‘ilo ki ai ‘e koe.
Currently Selected:
Tīmoté 2 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
