Tīmoté 2 2
2
1KA ko koe, nga‘ata, ke ke hoko ‘o kaukaua ‘i he kelesi ‘oku ‘ia Kalaisi Sīsū. 2Pea ko e ngaahi me‘a na‘a ke fanongo meiate au ‘i he ‘ao ‘o e kau fakamo‘oni tokolahi, ke ke tuku ia ki ha kau tangata ala falala‘anga ke tauhi, ko ha ni‘ihi te nau mafai ke ako‘aki ki ha kakai kehe foki.
3Kai pē ho ‘inasi ‘i he mamahi, ‘o taau mo e sōtia lelei ‘a Kalaisi Sīsū. 4Ka ko ha sōtia ‘oku mo‘ua ‘i he tau, tala‘ehai te ne tuku ke ne fihia ‘i he ngaahi mo‘ua ‘o e mo‘ui ni, koe‘uhi ke hōhō‘ia ‘iate ia ‘a e ‘eiki na‘e fokotu‘u ia ki he tau. 5Kae‘uma‘ā, ka ko ha taha ‘oku kau ‘i ha fe‘auhi, tala‘ehai ‘oku fakapale‘i ia ‘o kapau ‘oku ‘ikai te ne fai ‘o hangē ko e lao. 6Ka ko hā kau fa‘a, ko ia pē ‘oku fakaongosia ‘oku ‘a‘ana ke motu‘a ‘inasi ‘i he fua ‘o e ngoue. 7Feinga ke ma‘u ‘a e ‘uhinga ‘o ‘eku lea, koe‘uhi ‘e ‘atu ‘e he ‘Eiki ‘a e poto ‘i he me‘a kotoa pē.
8Manatu ai pē kia Sīsū Kalaisi, hono fokotu‘u mei he pekia, ‘ene tupu mei he hako ‘o Tēvita–‘o hangē ko ‘eku kōsipeli, 9‘a ia ‘oku ngaohikovia au ‘i hono fai, ‘io, ‘o a‘u ki hoto ha‘isia ‘o hangē ko ha angahala; ka tala‘ehai ‘oku ha‘isia ‘a e folofola ‘a e ‘Otua. 10Ka ko hono ‘uhinga ‘eni ‘o ‘eku kātaki ‘a e me‘a kehekehe ma‘a e kakai fili, koe‘uhi ā ke ta‘imālie fakamo‘ui ‘a kinautolu foki, ‘a e fakamo‘ui ‘oku ‘ia Kalaisi Sīsū, pea ō mo ia ‘a e kolōlia ta‘engata. 11‘Oku mo‘oni pē ‘a e lea, He kapau na‘a tau mate mo ia, te tau mo‘ui mo ia; kapau ‘oku tau kātaki, te tau kaungā tu‘i foki mo ia; 12kapau te tau fakafisinga ia, pea ‘e fakafisinga ‘a kitautolu ‘e ia; 13kapau ‘oku tau li‘aki ‘etau tui, ka ‘oku ne piki ai pē ‘e ia ki he‘ene lea; he tala‘ehai ‘oku ne lava ke faka‘ikai‘i ‘a ‘Ene ‘Afio.
14Ko e ngaahi me‘a ni ke ke fakamanatu ki he kakai, ‘o fakamamafa ‘aki ‘a e ‘Eiki, ke ‘oua te nau fakakikihi ‘i ha lea pē, ‘a ia ‘oku ‘ikai hano ‘aonga, ka ki he fakalusa pē ‘o e kakai ‘oku fanongo. 15Ka ko koe, ke ke feinga ke fakahā koe ki he ‘Otua ‘oku ke tu‘u mo e lau; ko e tangata ngāue ‘oku ‘ikai mā, ko ho‘o tofa totonu ‘a e folofola ‘o e mo‘oni. 16Ka ke faka‘ehi‘ehi mei he ngaahi koto lau fakaetangata; he ko e kakai ko ia, ‘e fakautuutu ‘enau makehe mo e lotu: 17pea ko ‘enau lea, te ne keina ‘o hangē ha kainiloto. ‘Oku ‘i he fa‘ahinga ko ia ‘a ‘Aiminia mo Failito; 18ko e ongo me‘a ne le‘eia mei he mo‘oni, he‘ena pehē, ko e me‘a ki he toetu‘u kuo hoko ia: pea ‘oku nau fakahinga ai ‘a e lotu ‘a e ni‘ihi. 19Ka neongo ia, ka ‘oku tu‘u pē ‘a e tu‘unga ma‘uma‘uluta ‘a e ‘Otua, he pulusi ai ‘a e sila ko eni, ‘Oku ‘ilo ‘e he ‘Eiki ‘a kinautolu ‘oku ‘o‘ona: mo eni, ‘Ilonga ‘a ia ‘oku ne hu‘ekina ‘a e huafa ‘o e ‘Eiki, ke ne faka‘ehi‘ehi mei he faihala.#Nōm 16.5
20Ka ‘ilonga ha fale lahi, ‘oku ‘ikai ke ngata ‘i he ngaahi ipu koula mo siliva, ka ‘oku ‘i ai foki mo e ngaahi ipu ‘akau mo ‘umea, pea ko e ni‘ihi ke kinokinoifie, ka ko e ni‘ihi ke palakū. 21Pea ka ai ha taha te ne fakama‘a ia ke matanga mei he fa‘ahinga ko ia, te ne hoko ko e ipu ke kinokinoifie, ko e ipu kuo fakatāpui, ko e ipu ‘oku ‘aonga ki he Tangata‘eiki, kuo teu ki he ngāue lelei kotoa pē. 22Ka ko e ngaahi holi fakatalavou ke ke hola mei ai; ka ke tuli ki he mā‘oni‘oni, ki he tui, ki he ‘ofa, pea ki he fe‘ofo‘ofani mo e kakai ‘oku lotu ki he ‘Eiki mei he loto ma‘a. 23Ka ko e fa‘a ‘eke me‘a, ‘a ia ko e koto launoa pea ‘ikai ha poto ‘i ai, ke ke fakafisi ki ai, ko ho‘o ‘ilo ‘oku tupunga fakakikihi. 24Ka ko e tamaio‘eiki ‘a e ‘Eiki ‘oku ‘ikai taau ke ne fakakikihi, kaekehe ke ne angalelei ki he kakai kotoa pē, ke ne poto ‘i he faiako, ke ne makātaki ‘a e kovi: 25ke ne fai anga malū ‘ene tautea ‘a kinautolu ‘oku fakatau‘ilea, hei‘ilo ‘e faifai pea ‘ange ‘e he ‘Eiki ‘a e fakatomala ke nau tafoki ki he ‘ilo‘i totonu ‘o e mo‘oni; 26pea ke nau ‘ā mei he‘enau konā ke fai hono finangalo, ‘o hao mei he tauhele ‘a e tēvolo, ‘a ia kuo ne pō kinautolu.
Currently Selected:
Tīmoté 2 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
