Kolinitō 2 9
9
Ko e Foaki ma‘á e Kakai ‘a e ‘Otuá
1HE ko e me‘a ki he tokoni ki he fa‘ahinga tapu, seuke koe‘uma‘ā ‘eku tohi atu ai: 2he ‘oku ou ‘ilo ho‘omou loto fiefai; ‘io, ko ia ia ‘oku ou fa‘a pōlepole ai ‘iate kimoutolu ki he kau Masitōnia, he‘eku pehē, Talu e ta‘u kuo hili mo e ‘osi teu ‘a ‘Akeia: pea ko ho‘omou fai velenga ko ia na‘e o‘i ai ‘a e tokolahi. 3Ka neongo ia, ka kuo u tuku atu ‘a e kāinga na, na‘a hala ‘i he fo‘i me‘a ko eni ‘emau pōlepole ‘iate kimoutolu ne fai; ka koe‘uhi ke kakato ho‘omou teu, ‘o hangē ko ia kuo u fa‘a lau ki ai: 4na‘a ‘iloange ‘e ō atu mo au ha kau Masitōnia, ‘o nau ‘ilo kimoutolu kuo te‘eki ke ‘osi, pea mau mā ai kimautolu ‘i he tu‘anaki ko eni (tuku kehe pē ‘a e mā ‘amoutolu). 5Ko ia, na‘a ku pehē, ko hono mei lelei ke u kole ki he kāinga na ke mu‘omu‘a atu kiate kimoutolu, ‘o sinaki fakamā‘opo‘opo ho‘omou me‘a‘ofa na, ‘a ia kuo loa hono fakahaa‘i; koe‘uhi ke napangapangamālie ia, ‘o ngali ko ha me‘a‘ofa, ‘o ‘ikai ko ha ‘atu mamae.
6Kae manatu, Ko ia ‘oku fakakaisi‘i ‘ene fakaheka ‘e fakakaisi‘i foki ‘ene utu mai: pea ko ia ‘oku fakakailahi ‘ene fakaheka ‘e fakakailahi foki ‘ene utu mai. 7Ke takitaha fai ki he me‘a kuo ne tu‘utu‘uni ‘i hono loto; pea ‘oua ‘e fai ‘i he mamahi, pe ko e pu‘ia; he ‘oku ‘ofa ‘a e ‘Otua ki ha taha ‘oku vēkeveke foaki. 8Pea ‘oku mafai noa pē ‘e he ‘Otua ke ‘atu ke mou fonu mahuohua ‘i he fa‘ahinga foaki kotoa pē; koe‘uhi ke fe‘unga ho‘omou koloa kehekehe ‘i he taimi kotoa pē mo e me‘a kotoa pē, pea toe ha‘amou me‘a ke fai‘aki ‘a e ngāue lelei kehekehe. 9Hangē ko e folofola,#Saame 112.9
Na‘e laku tavale ‘e ia,
Ne ne tufa ki he masiva,
‘E tolonga ‘ene fai lelei ‘o ta‘engata.
10Pea ko ia ‘oku ne tokonaki ‘a e pulopula ki he tō mo e me‘a ki he kai, te ne tokonaki mo fakalahi ho‘omou pulopula, pea fakatupulekina ‘a e fua ‘o ho‘omou fai lelei:#‘Ais 55.10 11kae alaisia alaikolonga homou fakakoloa‘ia, koe‘uhi ke alaisia alaikolonga ho‘omou foaki, ‘a ia ko e me‘a fakatupu fakafeta‘i ki he ‘Otua, ‘i he‘emau tufaki. 12He ko e fai tokoni ni ma‘a hotau kakai, ‘oku ‘ikai ngata pē ‘ene ‘aonga ‘i he fakakakato ‘o e masiva ‘o e fa‘ahinga tapu; ka ‘oku ope atu foki ko e ngaahi fu‘u fakafeta‘i ki he ‘Otua; 13ko e fakamālō‘ia ‘a e ‘Otua ‘e he kakai, koe‘uhi ko e ngaahi me‘a kuo hā mo‘oni ‘i he tokoni ni–‘a ho‘omou fai ki ho‘omou tukupā ki he Kōsipeli ‘o Kalaisi, pea mo e ‘aufuatō ‘o ho‘omou fie kau kiate kinautolu pea mo e kāinga kotoa pē; 14kae‘uma‘ā ‘i he‘enau lotua kimoutolu, te nau faka‘amu ke mou fe‘iloaki koe‘uhi ko e opeope ‘iate kimoutolu ‘a e kelesi ‘a e ‘Otua. 15‘Ē, fakafeta‘i mu‘a ki he ‘Otua, he‘ene me‘a‘ofa ko ia ‘oku ta‘emalaua.
Currently Selected:
Kolinitō 2 9: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
