Kolinitō 2 8
8
Ko e Foaki ‘a e Kalisitiané
1PEA ko eni, ‘oku mau ongoongo atu, kāinga, ‘a e kelesi kuo tuku mei he ‘Otua ki he ngaahi siasi ‘i Masitōnia;#Lom 15.26 2‘o pehē, neongo na‘e ‘ahi‘ahi‘i kinautolu ‘aki ha fu‘u mamahi, ka na‘e opeope ‘enau fiefia: pea neongo e ‘ango‘ango ‘enau masiva, ka ka mahake mei ai ha fu‘u koloa foaki. 3‘Io, ‘oku ou fakamo‘oni, kuo nau fai ki he ngātanga ‘o ‘enau mafai, ‘io, ‘o mahili atu; 4pea ko e langa‘i ‘e kinautolu, he‘enau kole fakamātoato ke mau ofa ‘o tuku ke nau kau ‘i he tokoni‘i ‘o e fa‘ahinga tapu. 5Kae‘uma‘ā e me‘a tēpū, ‘a ia na‘e ‘ikai te mau ‘amanekina, na‘a nau li‘aki kinautolu ki he ‘Eiki, pea kiate kimautolu foki, ‘i he hā ko e finangalo ia ‘o e ‘Otua. 6Ko ia, na‘a mau kole kia Taitusi, ko e me‘a ‘i he ‘a‘ana ‘a e langa‘i ‘o e kelesi ni ‘iate kimoutolu, ko ia ke ne ‘alu atu foki ‘o fakahaohaoa ia. 7Kehe pē, he hangē ‘oku mou hulu atu ‘i he me‘a kotoa pē–‘i he tui, mo e akonaki, mo e ‘ilo loloto, mo e feinga kehekehe, kae‘uma‘ā ‘i he ‘ofa kiate kimautolu#8.7 ‘i he ‘ofa kiate kimautolu; ‘Oku pehē ‘i hono ngaahi hiki fuoloa ‘e ni‘ihi: ‘i he‘emau ‘ofa kiate kimoutolú. –ke pehē foki ho‘omou hulu atu ‘i he kelesi ko eni.
8‘Oku ‘ikai te u lea pehē ko e fekau; ka ko ‘eku fakahaa‘ia ‘a e feinga ‘a e kakai kehe, ke u sivi ai ‘a e mo‘oni ‘o e ‘ofa ‘amoutolu foki. 9(Seuke, ‘oku mou ‘ilo ‘a e ‘ofa ‘a hotau ‘Eiki ko Sīsū Kalaisi he‘ene koloa‘ia, ka ne hoko ko e masiva koe‘uhi ko kimoutolu, koe‘uhi ko e me‘a ‘i he‘ene masiva ke mou hoko ko e koloa‘ia.)
10‘Io, ‘i he me‘a ni ko ‘eku fakakaukau pē ‘oku ‘atu: he ko ia pē ‘oku taau mo ha ni‘ihi pehē; he na‘a mou kamata ‘i he ta‘u kuo hili, ‘o mu‘omu‘a ‘i he ngaahi siasi ko ē; ‘o ‘ikai ‘i hono kamata fai pē ‘o e me‘a, ka ‘i hono o‘i foki. 11‘Ē, ke mou faka‘osi ‘eni hono fai foki: he ‘oku mo‘oni na‘a mou loto lelei leva ke o‘i, ka koe‘uhi ke ai hano faka‘osi ‘e hoa mo ia, pea taau mo ho‘omou mafai. 12He kapau ko loto fiefai ‘oku ta‘utu mai, ko ‘ene hōifua ai ‘a e ‘Eiki ‘oku fakafuofua ‘aki ‘a e me‘a ‘oku ne ma‘u, ‘o ‘ikai ‘aki ‘a e me‘a ‘oku ‘ikai te ne ma‘u.
13Pea tala‘ehai ko e fai ‘eni ke ma‘u fiemālie ai ha ni‘ihi, kae mafasia kimoutolu; 14‘ikai, ka ko e fai‘aki ‘a e lao ‘o e fakafe‘unga: ‘o pehē, ‘i he taimi ko eni, ke lave atu ho‘omou me‘a hulu ki he‘enau me‘a ta‘ea‘u; kae toki lave mai foki ‘enau me‘a hulu ki ho‘omou me‘a ta‘ea‘u, koe‘uhi ke ai ha fakafe‘unga: 15‘o hangē ko e folofola, Ko ia na‘a ne tufi ‘o lahi na‘e ‘ikai tomo atu, pea ko ia na‘e tufi ‘o si‘i, na‘e ‘ikai ta‘ekakato.#‘Eki 16.18
Ko Taitusi mo Hono ngaahi Kaungāme‘a
16Pea fakafeta‘i ki he ‘Otua, he‘ene fakatupu ‘i he loto ‘o Taitusi ha tokanga kiate kimoutolu ‘oku hangē ko ha‘aku. 17He ko ‘ene ‘alu atu na, ‘oku mo‘oni ko ‘ene tali ‘eku kole, ka na‘e kimui ia, ka kuo loa ‘ene tokanga ‘e ia ke fai. 18Pea ko eni kuo mau fekau ke ō mo ia ‘a si‘i kāinga ko ia, ‘a ia ‘oku ne ongoongolelei ‘i he Ngāue ‘i he ngaahi siasi kotoa pē; 19pea ‘ikai‘ia ko ia, ka na‘e fili ia foki ‘e he ngaahi siasi ‘i he hiki nima, ke kau mo kimautolu ‘i he ‘ave ‘o e ‘ofa ni, ‘a ia kuo tuku kiate kimautolu hono tauhi; telia ‘a e ongoongolelei ‘o e ‘Eiki, pea koe‘uhi ke mau fie tali ‘a e ngāue ko ia– 20ko ‘emau faka‘ehi‘ehi pehē, na‘a lau‘i kimautolu ‘e ha taha ‘i he fu‘u koloa ni kuo tuku kiate kimautolu hono tauhi. 21He ko ‘emau anga ke tomu‘a fakakaukau‘i ‘emau ngaahi me‘a ke hā lelei, ‘o ‘ikai ki he ‘Otua pē, ka ki he tangata foki.#Pal 3.4 (LXX)
22Pea kuo mau fekau ke ō mo kinaua ‘a si‘omau kāinga ‘e taha; ko e toko taha kuo tu‘o lahi ‘emau sivi, pea ‘i he ngaahi me‘a lahi, ‘o mau ‘ilo ko e taha ‘oku feinga mo‘oni: pea ‘i he taimi ni ‘oku ‘āsili lahi ‘ene feinga ko ‘ene falala ‘aupito kiate kimoutolu. 23Ko ia, kapau ko e ‘eke kia Taitusi, ko e kaume‘a ia ‘o‘oku, kae‘uma‘ā ko e kaungā ngaue ‘o‘oku ‘i he fai kiate kimoutolu. Pea kapau ko e ‘eke ki si‘i ongo kāinga ni, ko e ongo fakafofonga kinaua ‘o e ngaahi siasi, pea ko e lāngilangi ‘o Kalaisi. 24Ko ia, ko ho‘omou tuku ke hā kiate kinautolu ‘a e mo‘oni ‘o ho‘omou ‘ofa, mo e mo‘oni ‘o ‘emau pōlepole ‘iate kimoutolu, ko ho‘omou mātu‘aki fai ia ki he ngaahi siasi.
Currently Selected:
Kolinitō 2 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
