Tīmoté 1 6
6
1‘ILONGA kinautolu ‘oku mo‘ulaloa ‘o pōpula, ke nau lau ‘oku taau ke nau faka‘apa‘apa ‘aupito ki he‘enau ngaahi ‘eiki, na‘a lau‘ikovi ‘a e huafa ‘o e ‘Otua, mo ‘ene akonaki. 2Pea ko kinautolu ‘oku lotu ‘enau ngaahi ‘eiki, ke ‘oua te nau fakataau koe‘uhi kuo nau kāinga; kaekehe, ke ‘āsili ‘enau tauhi kiate kinautolu, koe‘uhi ko e kakai lotu mo ‘ofeina ia ‘a ia ‘oku ‘aonga ki ai ‘enau ngāue ‘ofa. Ko e ngaahi me‘a ko ia ke ke ako‘aki mo enginaki.
Ko e Fakahinohino Halá mo e Koloa Mo‘oní
3Kapau ‘e nofo ha taha ke ako kehe, ‘o ‘ikai te ne hiki ki he lea ‘oku haohaoa, ‘io, ki he ngaahi folofola ‘a hotau ‘Eiki ko Sīsū Kalaisi, mo e akonaki ‘oku fakalotumo‘oni. 4‘Ā, ko e toko taha ia kuo ‘ao‘aofia hono loto ‘i he ‘afungi, ka tala‘ehai ‘oku ne ‘ilo ha me‘a; ka ‘oku ne mahaki ‘aki ‘a e ‘eke me‘a ta‘efa‘a ‘iloa, mo e fakakikihi‘i lea pē; ‘a ia ko e ngaahi me‘a ‘oku tupu mei ai ‘a e meheka, ‘a e fetu‘usi, ‘a e felau‘ikovi‘aki, 5‘a e femahalokovi‘aki, ‘a e fepaki ai pē ‘a e kakai kuo popo honau loto, kuo to‘o meiate kinautolu ‘a e ‘ilo totonu, ‘a e kakai ‘oku nau mahalo ko e lotu mo‘oni ko e me‘a fakatupu koloa pē.
6Ka ‘oku mo‘oni ko e me‘a fakakoloa ‘aupito ‘a e lotu mo‘oni, ‘oka ō mo e loto topono. 7He tala‘ehai na‘a tau ha‘u mo kitautolu ha me‘a ki māmani, koe‘uhi foki ‘e ‘ikai te tau lava ke ‘alu mo kitautolu ha momo‘i me‘a: 8pea ‘i he‘etau ma‘u ‘etau me‘akai mo e kofu, te tau fe‘unga pē ‘i he me‘a ko ia. 9Ka ko kinautolu kuo pau honau loto ke koloa‘ia, ‘oku nau tō ki he ‘ahi‘ahi, mo e tauhele, mo e ngaahi holi kehekehe, ‘a ia ‘oku fakasesele pea ko e me‘a ‘oku te lavea ai; ko e fa‘ahinga me‘a ‘oku nau lōmekina ‘a e kakai ki he ‘auha mo e mala‘ia. 10He ko e ‘ofa ki he pa‘anga ko e aka ‘oku tupu mei ai ‘a e ngaahi kovi kotoa pē, pea ko e ni‘ihi ‘i he‘enau ala ki he me‘a ko ia kuo nau hē mei he lotu, pea kuo nau hokohoka‘i ‘aki ‘a kinautolu ‘a e ngaahi mamahi lahi.
Ko e To‘a he Tuí
11Ka ko koe, tangata ‘o e ‘Otua, hola mei he ngaahi me‘a pehē; ka ke tuli ki he faitotonu, ki he lotu mo‘oni, ki he tui, ki he ‘ofa, ki he kātaki, ki he anga vaivai. 12Tau ‘a e tau lelei ‘o e tui, puke ki he mo‘ui ta‘engata, ‘a ia ne ui koe ki ai, pea na‘a ke fai ‘a e tukupā lelei ‘i he ‘ao ‘o ha kau fakamo‘oni tokolahi. 13Ko e ‘Otua ē, ‘a ia ‘oku ne tauhi ‘a e mo‘ui ‘a e me‘a kotoa pē, mo Kalaisi Sīsū, ‘a ia na‘a ne fakamo‘oni ki he‘ene tukapā lelei ‘i he pule ‘a Ponitō Pailato.#Sioné 18.37 14‘Oku ou na‘ina‘i atu ke ke tauhi ‘a e fekau ke ta‘emele mo ta‘efa‘a lau‘i, ‘o a‘u ki he fakahā mai ‘o hotau ‘Eiki ko Sīsū Kalaisi. 15‘A ia te ne fai ‘i hono ngaahi taimi totonu, ‘e he ‘Ene ‘Afio ko e Pule Mohu Monū‘ia mo Tāfataha; ko e Tu‘i ‘o kinautolu ‘oku tu‘i, mo e ‘Eiki ‘o kinautolu ‘oku ‘eiki. 16‘A ia ‘oku ‘a‘ana toko taha pē ‘a e ta‘efa‘amate, he‘ene ‘afio ‘i he maama ta‘efa‘a fotuaki; ‘a ia kuo te‘eki ke mātā ‘e ha tangata, pe te ne lava ke sio ki ai–ke ‘o ‘Ene ‘Afio ‘a e faka‘apa‘apa, pea mo e pule ta‘engata, ‘Ēmeni.
17Ke ke na‘ina‘i kiate kinautolu ‘oku koloa‘ia fakaemaama ko eni, ke ‘oua te nau anga hiki, ‘uma‘ā ke tu‘u ‘enau falala ki he koto ta‘ema‘u na ko e koloa; ka ki he ‘Otua, ‘a ia ‘oku ne ‘omi ‘a e me‘a kehekehe ‘o fu‘u lahi, ma‘atau fiemālie pē. 18Na‘ina‘i ke nau ngāue ‘aonga, ke nau koloa‘ia ‘i he ngāue lelei, ke nau nima homo ‘o anga fietokoni; 19‘o nau fa‘oaki ai ma‘anautolu ha tu‘unga lelei ki he ‘amui, koe‘uhi ke nau puke ki he mo‘ui mo‘oni.
20‘E Tīmote, ke ke le‘ohi ‘a e me‘a kuo tuku kiate koe, ‘o ke fulitu‘a ki he ngaahi koto lau fakaetangata pē, mo e ngaahi fakakikihi ‘a e me‘a na ‘oku lau ko e ‘Ilo-loloto, ka ko e lau hala: 21‘a ia kuo ‘i ai ha ni‘ihi kuo nofo ki ai, ‘o nau le‘eia mei he tui totonu.
‘Ofa ke ‘iate kimoutolu ‘a e kelesi.
Currently Selected:
Tīmoté 1 6: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
