Tīmoté 1 5
5
Ko e Fatongia ki he Fa‘ahinga Kehekehe
1‘OUA na‘a ha‘aki valoki‘i ha motu‘a, ka ke fai fakaoleole pē ‘o hangē ko ho‘o tamai; fai ki he kau talavou ‘o hangē ko ho tokoua. 2Ki he kau fine‘eiki ‘o hangē ko ho‘o fa‘ē; ki he kau finemui ‘o hangē ko ho tuofefine, ‘o mātu‘aki anga ma‘a.
3Tokanga‘i ‘a e kau fefine uitou ‘oku paea mo‘oni. 4Ka ‘o kapau ‘oku ma‘u fānau pe makapuna ‘e si‘i uitou, ‘oua mu‘a ke ako‘i kinautolu ke nau fai ‘a e tō‘onga totonu ki hoto fāmili, pea ke fai ‘a e totongi ki he‘enau mātu‘a: he ko e me‘a ia ‘e hāngai fofonga ki ai ‘a e ‘Otua. 5Pea ko eni, ko e uitou ‘oku paea mo‘oni pea tuku tuēnoa, kuo tu‘u ‘ene ‘amanaki ki he ‘Otua, pea ‘oku ne nofo ki he fai ‘o e ngaahi hū mo e lotu ‘i he pō mo e ‘aho. 6Ka ko e uitou ‘oku fakausousa, neongo ko e mo‘ui ka kuo mate. 7Ko e ngaahi me‘a ko ia foki ke ke tu‘utu‘uni ki ai koe‘uhi ke nau ta‘emele. 8Ka ‘oka ai ha taha ‘oku ‘ikai tokanga ki hono kāinga, kae‘uma‘ā hono fāmili, ‘oku ne faka‘ikai‘i ‘ene lotu, ‘io, ‘oku ne kovi ange ‘i ha hīteni.
9Ke ‘oua na‘a tu‘u ha taha ‘i he tohi ‘o e Kau Uitou, ‘oku si‘i hono ta‘u ‘i he onongofulu, ko e uaifi ‘o e tangata pē taha.#5.9 ko e uaifi… taha (mali tu‘otaha pē); pe anganofo ki hono husepānití. 10Ko e toko taha kuo fakaongolelei he‘ene ngaahi ngāue ‘aonga, ha‘ane tauhi ha fānau, ha‘ane fakaafe ha ‘āunofo, ha‘ane fufulu ‘a e va‘e ‘o e kau lotu, ha‘ane tokoni‘i ha kakai kuo mo‘ua ha mamahi, kapau na‘e ‘ilonga pē ha ngāue lelei pea ne feinga ki ai.
11Ka ko e kau uitou ‘oku mālōlō ke ke fakafisi ki ai; he ka faifai pea mālohi ‘enau hoha‘a ‘ia Kalaisi, te nau tangi ke mali: 12‘o nau nofo mo kinautolu ‘enau hala, ‘a ‘eni, Kuo nau maumau ‘enau fuakava mu‘a. 13Kae‘uma‘ā te nau hoko ai ‘o fakapikopiko ‘i he‘enau ‘alu fano ‘i he ngaahi ‘api; ‘o ‘ikai ko e fakapikopiko pē, ka ko e fa‘a lau, mo kaunoa, ‘o talanoa ‘aki ‘a e ngaahi me‘a na‘e totonu ke ‘oua ‘e lau. 14Ko ia, ko hoku loto ki he kau uitou ‘oku mālōlō, ke nau toe mali, ke nau fanau, ke nau pule he fāmili, ‘o ‘oua ‘e ‘atu mo‘o e fili ha me‘a ke tu‘unganaki ‘aki ‘ene lau‘ikovi. 15He na‘a mo ‘eni kuo afe hanau ni‘ihi, ‘o muimui kia Sētane. 16Kapau ko ha kau uitou ‘oku kāinga mo ha fefine lotu, ke tokoni kiate kinautolu ‘e ia, ‘o ‘oua ‘e tuku ke mafasia ai ‘a e Siasi: kae ‘i he Siasi ke tokoni ki he kau uitou ‘oku paea mo‘oni.
17Ko e kau faifekau ‘oku pule lelei, ‘ē, ko honau taau ha tokoni lōua; kae‘uma‘ā ‘a kinautolu ‘oku fakafitefita‘a ‘i he malanga mo e faiako. 18He ‘oku lau ‘e he Tohitapu, Ko e pulu ‘oku ne ‘au‘au ‘a e koane ‘e ‘ikai te ke ha‘iha‘i hono ngutu. Mo eni, ‘Ilonga ha taha ‘oku ngāue, ‘oku taau ke ne ma‘u ha‘ane totongi.#Teu 25.4; Māt 10.10; Luk 10.7 19‘Oua te ke tali ha faka‘ilo ‘o ha faifekau, ka ‘i he ‘i ai ha fakamo‘oni ‘e toko ua pe toko tolu: 20ka ko kinautolu ‘oku faihala ke ke valoki ‘i he ‘ao ‘o e kakai kotoa, koe‘uhi ke manavahē hono toe.
21Ko e ‘Otua ē, mo Kalaisi Sīsū, pea mo e kau ‘Āngelo Fili, ‘oku ou na‘ina‘i atu ke ke tauhi ‘a e ngaahi me‘a ni, ‘o ‘oua ‘e fua fakapapau ha me‘a, pe fai ‘i he filifilimānako. 22‘Oua te ke hilifaki nima leva ki ha toko taha, ‘uma‘ā ha‘o kau ‘i he ngaahi angahala ‘a e kakai kehe: kehe ke ke tauhi KOE ke ma‘a.
23Tuku ho‘o inu pē ‘a e vai, ka ke fai‘aki ha me‘i uaine, koe‘uhi ko ho fatu mo ho‘o fa‘a mahamahaki.
24‘Oku fu‘u e‘a ‘a e angahala ‘a e kakai ni‘ihi, ‘o mu‘a ki he fakamaau, kae kimui ‘a e angahala ‘a e ni‘ihi. 25Pehē foki ‘oku fu‘u e‘a ‘enau ngaahi ngāue lelei; pea ko e ngaahi ngāue ‘oku ‘ikai pehē, tala‘ehai ‘e lava ke fufū.
Currently Selected:
Tīmoté 1 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
