Tesalonaiká 1 4
4
Ko e Fa‘ahinga Mo‘ui ‘oku Fakahōifua ki he ‘Otuá
1PEA ko e me‘a ‘e taha, kāinga, ‘oku mau kole kiate kimoutolu, mo enginaki ‘ia Kalaisi Sīsū, ko e ‘alunga na‘a mou ma‘u meiate kimautolu ‘oku totonu ke fai ai ho‘omou laka ke hōifua ai ‘a e ‘Otua, ‘io, ko e ‘alunga ‘oku mou lolotonga laka ai ni, ke fakautuutu ho‘omou hulu atu ‘i he me‘a ko ia. 2He ‘oku mou ‘ilo ‘a e anga ‘o e ngaahi fekau na‘a mau ‘atu kiate kimoutolu mei he ‘Eiki ko Sīsū. 3He ko eni ‘a e finangalo ‘o e ‘Otua ko homou fakamā‘oni‘oni‘i. ‘O pehē, ke mou faka‘ehi‘ehi mei he fe‘auaki. 4Ke mou ‘ilo takitaha ke ma‘u hono hama (uaifi) ‘o‘ona#4.4 ke ma‘u… ‘o‘ona; pe pule‘i hono sinó. ‘i he fai mā‘oni‘oni mo e fakaalaala: 5‘o ‘oua ‘e fai havala ‘o hangē ko e Senitaile ta‘e‘ilo ‘Otua. 6Ke ‘oua na‘a ai hamou toko taha te ne hala loto‘api ki hono kāinga, ‘o fai kākā ‘i he me‘a ni; koe‘uhi ko e ‘Eiki ia ‘oku ‘a‘ana ‘a e ‘eke ki he alā me‘a pehē kotoa pē, ‘o hangē foki na‘a mau lea ai mu‘a kiate kimoutolu, mo fakamamafa ki ai. 7He tala‘ehai na‘e ui kitaua ‘e he ‘Otua ki he ta‘etaau, ka ke fai mā‘oni‘oni. 8Ko ia foki, ‘ilonga ‘a ia ‘oku ne anga ta‘etoka‘i, ‘oku ‘ikai ko e tangata ‘oku ne ta‘etoka‘i, ka ko e ‘Otua; ‘a ia kuo ne foaki foki ma‘amautolu hono Laumālie ‘o‘ona ‘io, ‘a e Laumālie Mā‘oni‘oni.
9Pea ko e me‘a ki he ‘ofa ki he kāinga lotu, koe‘uma‘ā ‘emau tohi atu ai kiate kimoutolu, he ko e ha‘a akonekina ‘e he ‘Otua kimoutolu ke fe‘ofa‘aki. 10‘Io, ‘oku mou fai ia foki ki he kāinga kotoa pē ‘oku ‘i Masitōnia kātoa. 11Ka ‘oku mau enginaki atu, kāinga, ke fakautuutu ho‘omou hulu atu ‘i he me‘a ko ia, pea ke mou kakapa ke mou mo‘ui haunoa, pea ke takitaha fai hono lakanga, pea ke mou ngāue‘aki homou nima; ‘o hangē ko ‘emau tu‘utu‘uni kiate kimoutolu. 12Koe‘uhi ke taau ho‘omou fakafeangai ki he kakai ‘o tua‘ā, pea ke ‘oua te mou mo‘ui falala ki ha taha.
Ko e Toe Hā‘ele Mai ‘a e ‘Eikí
13‘Oku ‘ikai te mau loto foki ke mou mūnoa, kāinga, ‘i he me‘a ki he kakai kuo mohe; ke ‘oua te mou mamahi ‘o hangē ko e kakai kehe, ‘a ia ‘oku ‘ikai ha‘anau ‘amanaki. 14He kapau leva ‘oku tau tui ne pekia ‘a Sīsū, pea toetu‘u, pehē foki ko e kakai na‘e fakamohe ko e me‘a ‘ia Sīsū, ‘e ‘omi kinautolu ‘e he ‘Otua fakataha mo ia.
15He ko e me‘a ni ‘oku mau tala atu ko e folofola tonu ‘a e ‘Eiki, neongo kitaua ‘e tolonga ‘o a‘usia ‘a e hoko mai ‘a e ‘Eiki, molekemama‘o ha‘ata mu‘omu‘a ‘iate kinautolu kuo mohe.#1 Kol 15.51-52 16Koe‘uhi ‘e hā‘ele mei he langi ‘a e ‘Eiki ‘e ia, pea ai ha vakavakaō, ‘a e angi ‘a ha ‘āngelo pule, mo e ifi ‘a e talupite ‘a e ‘Otua; pea ko e pekia ‘ia Kalaisi ‘e tomu‘a tu‘u: 17hili ia, ko kitaua kuo ta tolonga ‘o a‘usia, ‘e punakaki kitaua fakataha mo kinautolu ‘i he ngaahi ‘ao ki he ‘atā, ke fakafetaulaki ki he ‘Eiki, pea hili ia te ta ‘i he ‘Eiki ma‘u ai pē. 18Ko ia ke mou fetokoni‘aki kimoutolu ‘aki ‘a e ngaahi lea ko eni.
Currently Selected:
Tesalonaiká 1 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
