Tesalonaiká 1 3
3
1KO IA, ‘i he ‘ikai te ma kei fakama‘uma‘u, na‘a ma pehē, ‘e lelei mu‘a ke tuku au toko taha ‘i ‘Ātenisi;#Ngā 17.15 2ka u fekau atu ‘a Tīmote ko si‘i tokoua ‘omaua, pea ko e kau ngāue mo e ‘Otua ‘i he Kōsipeli ‘o Kalaisi; koe‘uhi ke ne poupou kimoutolu, pea ke ne enginaki telia ho‘omou lotu: 3ke ‘oua na‘a ue‘i ha toko taha ‘i he ngaahi mamahi ko ia. Seuke, ‘oku mou lāu‘ilo ko e me‘a ia ‘oku tau nofo ki ai. 4He na‘a mo e taimi ko ia na‘a mau ‘iate kimoutolu ai, na‘a mau sinaki tala atu, ko hotau nafa ke fakamamahia–‘a ē ā kuo hoko foki, pea kuo e‘a ni ia kiate kimoutolu. 5Ko hono ‘uhinga ia na‘e ‘ikai te u kei mafakama‘uma‘u ai ‘e au foki, ka u fekau atu ke u ‘ilo ki ho‘omou lotu, na‘a ‘iloange kuo fai homou ‘ahi‘ahi‘i ‘e he Toko Taha-Fakatauvele, pea hoko ‘emau ngangau ko e kulanoa.
6Ka kuo toki lava mai ‘a Tīmote meiate kimoutolu, pea kuo ne talanoalelei‘ia mai ho‘omou tui mo ho‘omou ‘ofa; kae ‘uma‘ā ho‘omou manatu ‘ofa mai ma‘u ai pē; mo ho‘omou holi ke sio kiate kimautolu, ‘o hangē tofu pē ko ‘emau holi ke mamata atu.#Ngā 18.5 7Pea ‘i he‘emau fanongo ki he me‘a ko ia, kāinga, neongo e fu‘u faingata‘a mo e mamahi na‘a mau ‘i ai, ka na‘a mau ma‘u fiemālie ‘iate kimoutolu koe‘uhi ko ho‘omou tui. 8Seuke, kuo mau mo‘ui leva ‘o kapau ‘oku mou tu‘u ma‘u ‘i he ‘Eiki. 9‘Io, ko e hā ha fakafeta‘i te mau fa‘a ‘atu ki he ‘Eiki koe‘uhi ko kimoutolu, ke hoa mo e fu‘u fiefia ‘oku mau fiefia ‘aki ‘i he ‘ao ‘o homau ‘Otua, koe‘uhi ā ko kimoutolu. 10Pea ‘oku makehe ange fau ‘emau lotu ‘i he pō mo e ‘aho ke tau femātaaki, pea ke mau fakakakato ‘a e ngaahi me‘a ‘oku mou kei tōmui ai ‘i he lotu.
11Pea tauange mo e ‘Afio ‘a e ‘Otua ko ‘etau Tamai, mo hotau ‘Eiki ko Sīsū, ke ne faka‘atā homau hala kiate kimoutolu! 12Pea ‘ofa ke ngaohi kimoutolu ‘e he ‘Eiki ke lahi mo hulu atu ho‘omou fe‘ofa‘aki, mo ho‘omou ‘ofa ki he kakai kehe, ‘o hangē ko e ‘ofa ‘amautolu kiate kimoutolu! 13Koe‘uhi ke ne fakatu‘uma‘u homou loto, ke ta‘emele hono mā‘oni‘oni ‘i he ‘ao ‘o e ‘Otua ko ‘etau Tamai, ‘oka hoko mai hotau ‘Eiki ko Sīsū ‘oku ha‘ofia ia ‘e he‘ene kau mā‘oni‘oni kotoa pē.#3.13 ‘e he‘ene… kotoa pē; pe ‘e kinautolu kotoa pē ‘oku ‘a‘aná, pe ‘e he‘ene kau ‘āngelo kotoa pē.
Currently Selected:
Tesalonaiká 1 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
