Tesalonaiká 1 5
5
Teuteu ki he Toe Hā‘ele Mai ‘a e ‘Eikí
1PEA ko e me‘a ki he ngaahi taimi mo e ngaahi kuonga, kāinga, koe‘uma‘ā ha‘amau tohi atu. 2He ‘oku mou ‘ilo kānokano, ko e hoko mai ‘a e ‘aho ‘o e ‘Eiki ‘oku hangē ko e ha‘u ‘a e kaiha‘a ‘i he pō.#Māt 24.43; Luk 12.39; 2 Pit 3.10 3Tokaange ha taimi ‘oku nau pehē, ‘Oku tau lelei mo tu‘umālie, fakafokifā ‘oku tu‘u mai ‘a mala, ‘o hangē ko e langā ki he fefine feitama: pea ‘e ‘ikai ‘aupito te nau hao. 4Ka tala‘ehai ‘oku mou ‘i he po‘uli, kāinga, ke mo‘utāmakia kimoutolu ‘e he ‘aho ko ia, ‘o hangē ha kaiha‘a. 5He ko e fānau kimoutolu kotoa pē ‘a e maama, mo e fānau ‘a e ‘aho; ‘oku ‘ikai ‘a e pō kitaua, ‘uma‘ā ‘a e po‘uli. 6‘Āua; pea ke ‘oua te ta mohe ‘o hangē ko e kakai kehe, ka ta ‘ā pē ‘o faka‘ehi‘ehi mei he konā. 7He ko kinautolu ‘oku mohe ‘oku mohe ‘i he pō; pea ko kinautolu ‘oku konā ‘oku konā ‘i he pō. 8Ka ko kitaua ko e kakai ‘o e ‘aho; ko ia, ta faka‘ehi‘ehi mu‘a mei he konā. Kae‘uma‘ā kuo ta ‘ai ‘a e kofu tau ko e tui mo e ‘ofa, pea mo e ‘amanaki mo‘ui mo‘ota tatā tau.#‘Ais 59.17; ‘Efe 6.13-17 9He na‘e ‘ikai ke tu‘utu‘uni kitaua ‘e he ‘Otua ke houhau‘ia, ka ke lava‘i mai ‘a e fakamo‘ui ‘i hota ‘Eiki ko Sīsū Kalaisi; 10‘a ia na‘a ne pekia koe‘uhi ko kitaua, koe‘uhi, pe ‘oku ta ‘ā, pe ‘oku ta mohe, kehe ke ta fakataha ‘i he mo‘ui feangai mo ia. 11Ko ia, ke mou fetokoni‘aki kimoutolu, pea fefai‘aki homou langa hake, hangē ā foki ‘oku mou fai.
Ko e Fale‘i Faka‘osi mo e Pōpoaki ‘Ofa
12Pea ko eni ‘oku mau kole kiate kimoutolu, kāinga, ke mou ‘ilo ‘a kinautolu ‘oku fakafitefita‘a ‘iate kimoutolu, pea ‘oku ‘anautolu homou pule‘i ‘i he ‘Eiki, mo homou tākitala‘i. 13Pea ke mou tokanga ‘ofa ‘aupito ‘aupito kiate kinautolu, koe‘uhi ko si‘enau ngāue. Mou fekoekoe‘i.
14Pea ko eni, kāinga, ‘oku mau enginaki atu ke mou tākitala‘i ‘a e kau maumau tu‘utu‘uni; lōtaki ‘a e lotosi‘i; poupou ‘a e vaivai; ke mou anga mokomoko ki he kakai kotoa pē. 15Vakai ke ‘oua na‘a ai ha taha ‘e totongi ‘a e kovi ‘a ha taha ‘aki ha kovi; kaekehe ke mou tuli ai pē ki he me‘a ‘oku lelei ma‘a e taha, pea ma‘a e kakai kotoa pē.
16Fiefia ma‘u ai pē. 17Lotu ta‘etuku. 18Fakafeta‘i ‘i he me‘a kotoa pē, he ko e tu‘utu‘uni ia ‘a e ‘Otua ma‘amoutolu ‘ia Kalaisi Sīsū.
19‘Oua ‘e fu‘ifu‘i ‘a e Laumālie: 20‘oua ‘e ta‘etoka‘i ‘a e ngaahi malanga palofisai; 21ka mou sivi kotoa pē: ‘ilonga pē ‘a e lelei, puke ma‘u ia; 22‘ilonga ha me‘a ‘oku fa‘ahinga mo e kovi, faka‘ehi‘ehi mei ai.
23Pea ko e ‘Afio ‘a e ‘Otua, ‘a ia ‘oku ‘a‘ana ‘a e nonga, ‘ofa ke ne fakamā‘oni‘oni‘i faka‘āufuli ‘a kimoutolu! ‘Io, ‘i he hoko mai ‘a hotau ‘Eiki ko Sīsū Kalaisi, ‘ofa kuo haofaki homou laumālie, mo e loto, mo e sino, ‘o kakato mo ta‘emele! 24Ko ia ‘oku ne ui kimoutolu ki ai, ko e Toko Taha ia ‘oku fai ki he‘ene lea, pea te ne fai foki ‘a e me‘a ni.
25Kāinga, mou hūfia kimautolu.
26Mou fekita ki he kāinga kotoa pē ‘aki ha ‘uma tapu.
27Ko e ‘Eiki ē ‘oku ou fekau atu ai kiate kimoutolu, ke mou lau ‘a e ‘ipiseli ni ki he kāinga kotoa pē.
28Ko e kelesi ‘a hotau ‘Eiki ko Sīsū Kalaisi, ‘ofa ke ‘iate kimoutolu ia!
Currently Selected:
Tesalonaiká 1 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
