Kolinitō 1 6
6
Ko e Hopo mo e Kaungā Lotu
1UOI! ‘oku ‘i ai koā hamou toko taha ‘oku pehē fau ‘ene fiematamu‘a, ke ‘ave ‘ene me‘a mo ha taha ‘o fakamonū ki he fa‘ahinga ta‘efaitotonu, ‘o ‘ikai fakamaau ki he kakai lotu? 2Tā ‘oku ‘ikai te mou ‘ilo ‘apē ‘e fakamaau ‘a māmani ‘e he kakai lotu? ‘Io, pea kapau ‘e fakamaau ‘a māmani ‘i homou ‘ao, ‘oku mou ta‘etaau koā ke fai ha fanga ki‘i fakamaau pehē? 3‘Ikai ‘oku mou ‘ilo ‘e ‘ataua ‘a e fakamaau ‘o ha kau ‘āngelo? Huanoa ha ngaahi me‘a fakamaama? 4Pea ka ‘oku pehē, pea kapau ‘oku ‘i ai ha‘amou me‘a fakamaama ke fakamaau, pea ko hai fua ha ni‘ihi ‘i he siasi ‘oku ta‘etoka‘i, ‘ē, fakanofo kinautolu ki ai. 5‘Oku ou lea pehē ko homou fakamaa‘i. He ‘oku pehē koā ho‘omou masiva kakai poto? ‘Oku ‘ikai koā ha taha te ne lava ke fakamaau ‘a e me‘a ‘a si‘ono tokoua lotu? 6Ka ko eni ‘oku tala hopo ‘a e tangata lotu ki hono tokoua lotu, kae‘uma‘ā ko e pehē ke fakamaau ki ha ni‘ihi ‘oku ‘ikai lotu.
7Seuke, ko e ‘i ai ha momo‘i lau fakamaau ‘iate kimoutolu, ko e mātu‘aki holomui ‘ata ‘atā ia. Ko e hā ‘oku ‘ikai ai te mou fie kātaki mu‘a ‘a e ngāue ta‘etotonu kuo fai mai? Ko e hā ‘oku ‘ikai te mou fie kātaki ai mu‘a homou fakamālohia? 8Ka ko eni ko kimoutolu ia ‘oku ngāue ta‘etotonu, mo fai fakamālohi, pea ko e fai ia foki ki homou ngaahi tokoua. 9Tā ‘oku ‘ikai te mou ‘ilo ‘apē, ka ‘ilonga ha ni‘ihi ‘oku ngāue ta‘etotonu, ‘e ‘ikai hanau tofi‘a ‘i he Pule‘anga ‘o e ‘Otua? ‘Oua na‘a tuku ke kākaa‘i kimoutolu: ‘oku ‘ikai ha fe‘auaki, pe ha lotu ki he ‘aitoli, pe ha tono ‘unoho, pe ha mo‘ui fakapelepele, pe ha fai faka-Sōtoma, 10pe ha kaiha‘a, pe ha mānumanu, pe ha fa‘a konā, pe ha kapekape, pe ha fai fakamālohi, te ne ma‘u tofi‘a ‘i he Pule‘anga ‘o e ‘Otua. 11Pea na‘e pehē ‘a homou ni‘ihi: ka na‘a mou fufulu kimoutolu, ka na‘e fakaului kimoutolu ki he fa‘ahinga tapu, ka na‘e ngaohi kimoutolu ko e kau angatonu ‘i he huafa ‘o e ‘Eiki ko Sīsū Kalaisi, pea ‘aki ‘a e Laumālie ‘o hotau ‘Otua.
Ko e Hopo mo e Kaungā Lotu
12Ko e me‘a kotoa pē ‘oku ngofua kia kita, ka ‘oku ‘ikai ‘aonga kotoa pē: pea ‘oku ‘a‘ata ke fa‘iteliha ki he me‘a kotoa pē, ka ‘e ‘ikai te te tuku ke fa‘iteliha ha me‘a ‘e taha kiate kita.#1 Kol 10.23 13Ko e ngaahi me‘akai ‘oku ma‘a e fatu, pea ko e fatu ‘oku ma‘a e ngaahi me‘akai; pea ‘e fakata‘e‘aonga ‘e he ‘Otua ‘a ē mo ē. Ka ko e sino ‘oku ‘ikai ma‘a e fe‘auaki, ka ‘oku ma‘a e ‘Eiki; pea ko e ‘Eiki ‘oku ma‘a e sino. 14Pea na‘e fakatoetu‘u ‘e he ‘Otua ‘a e ‘Eiki, pea te ne fakatoetu‘u foki ‘a kitaua ‘i he māfimafi ‘a‘ana.
15‘Ikai ‘oku mou ‘ilo, ko homou ngaahi sino, ko e ngaahi kupu ia ‘o Kalaisi? Pea ka ko ia, pea u hae koā ‘a e ngaahi kupu ‘o Kalaisi, ‘o u ‘ai ko ha ngaahi kupu ‘o ha fe‘auaki? Molekemama‘o! 16‘Io, ‘oku ‘ikai te mou ‘ilo koā, ko ia ‘oku pīkitai ki ha fe‘auaki ‘oku ne fo‘i sino pē mo ia? he ‘oku ne folofola mai, ‘E hoko ‘a e toko ua ko e kakano pē ‘e taha.#Sēn 2.24 17Pea ko ia ‘oku ne pīkitai ki he ‘Eiki ‘oku ne fo‘i laumālie pē mo ia.
18‘Ē, hola pē mei he fai fe‘auaki. Ko e fa‘ahinga angahala kehekehe ‘oku fai ‘e ha tangata, ‘oku ‘i tu‘a sino ia; ka ko ia ‘oku ne fe‘auaki ‘oku ‘asi tonu ‘ene angahala ‘i hono sino ‘o‘ona. 19‘Io, ‘oku ‘ikai te mou ‘ilo koā ko homou sino takitaha ko e temipale ‘o e ‘afio ‘a e Laumālie Mā‘oni‘oni ‘iate kimoutolu, ‘a ia kuo hoko kiate kimoutolu mei he ‘Otua? pea ‘oku ‘ikai ‘amoutolu ‘a kimoutolu?#1 Kol 3.16; 2 Kol 6.16 20He na‘e fakatau kimoutolu ‘aki ha totongi. ‘Ē, mou fakaongoongolelei ‘a e ‘Otua ‘i ho‘omou me‘a fakasino.
Currently Selected:
Kolinitō 1 6: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
