Kolinitō 1 5
5
Ko e Tautea ‘o e Nonofo Kovi he Siasí
1TĀ ‘oku kātaki pē ‘a e fe‘auaki ‘iate kimoutolu, kae‘uma‘ā ko e fe‘auaki ‘oku taha ‘ana, na‘a mo e hīteni ‘e ‘ikai te nau kātaki ha me‘a pehē, ‘a ia ko e mali ‘e ha tangata mo ha fefine ‘oku nonofo mo ‘ene tamai.#Teu 22.30 2Ka mou fai ai pē ho‘omou ‘afungi na; ka na‘a mou mei fakamamahi mu‘a, kae iku ki he kapusi meiate kimoutolu ‘a e tangata kuo ne fai ha ngāue pehē. 3Ka ko e me‘a kiate au, seuke, neongo ‘oku mama‘o hoku sino, ka ‘oku ‘ikai mama‘o hoku loto: pea kuo u fakamaau ‘a e me‘a, ‘o hangē kuo u ‘i hena. Pea ko ‘eku tu‘utu‘uni ‘eni ki he siana kuo ne fai ha fu‘u me‘a pango pehē– 4‘I HE HUAFA ‘O HOTAU ‘EIKI KO SĪSŪ. Ke mou fai ho‘omou fakataha, pea ‘e ‘iate kimoutolu hoku loto, kuo ma‘u ‘a e ivi ‘o hotau ‘Eiki ko Sīsū Kalaisi; 5pea ‘e tukuange ‘a e toko taha pehē kia Sētane; koe‘uhi ke faka‘auha hono anga kakano, hei‘ilo ‘e haofaki hono anga Laumālie ‘i he ‘aho ‘o e ‘Eiki.
6‘Oku ‘ikai sia‘a ‘a e me‘a ‘oku mou pōlepole ai. ‘Ikai ‘oku mou ‘ilo, ka lave ha me‘i lēvani ki he takaonga mā, tā ‘oku lēvani hono kotoa?#Kal 5.9 7‘Ē, mou tafi kitu‘a ‘a e lēvani mu‘a, ka mou hoko ko e takaonga ngaohi fo‘ou; ‘o taau mo homou tu‘unga, ko e ngaahi fo‘i mā ta‘elēvani; pea ‘āsili he kuo feia foki hotau Pāsova, ko Kalaisi:#‘Eki 12.5 8ko ia ke tau fai ‘a e kātoanga; kae‘oua na‘a tau fai‘aki ‘a e lēvani mu‘a, ‘uma‘ā ‘a e lēvani ko e loto kovi mo e ngāue pango; ka tau fai‘aki ‘a e me‘a ta‘elēvani, ko e ma‘a mo e mo‘oni.#‘Eki 13.7; Teu 16.3
9Ne u tohi atu ‘i he‘eku ‘ipiseli, ke ‘oua te mou fe‘iloaki mo e kakai ‘oku fe‘auaki. 10Ka na‘e ‘ikai ko e ta‘ofi ‘aupito mei he fe‘iloaki mo e kakai fakamaama ‘oku fe‘auaki, pe ‘oku mānumanu mo fai fakamālohi, pe ‘oku lotu ki he ‘aitoli: he ka ne ko ‘eku tu‘utu‘uni ia, tā ko e hiki mei māmani ‘e fai. 11Ka ko eni pē ‘a e me‘a na‘a ku tohi atu: ka ai ha toko taha ‘i he kau lotu ‘oku fe‘auaki, pe mānumanu, pe lotu ki he ‘aitoli, pe kapekape, pe fa‘a konā, pe fai fakamālohi, ke ‘oua te mou fe‘iloaki mo ha toko taha pehē, ‘io, pea ‘oua na‘a keinanga mo ia.
12He ko ‘eku me‘a ke fakamaau ‘a e kakai ‘o tua‘ā? ‘ikai ko e kakai ‘o loto‘ā pē ‘oku ‘amoutolu hono fakamāu‘i? ka ko e kakai ‘o tua‘ā ‘oku ‘i he ‘Otua ia. 13Kehe pē ke mou kapusi ‘a e tangata fai kovi meiate kimoutolu.#Teu 13.5; 17.7 (LXX)
Currently Selected:
Kolinitō 1 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
