Kolinitō 1 12
12
Ko e Ngaahi Ivi Fakalaumālie
1PEA ko e me‘a ki he ngaahi mafai fakalaumālie, ‘oku ‘ikai te u loto ke mou mūnoa, kāinga.
2‘Oku mou ‘ilo, lolotonga ho‘omou hīteni, na‘e taki hē kimoutolu ki he ngaahi ‘aitoli ta‘elea, ha me‘a pē ‘e taki kimoutolu ki ai– 3Ko ia ‘oku ou fakahā atu; ‘oku ‘ikai ha taha ‘oku fakalea ‘e he Laumālie ‘o e ‘Otua te ne pehē, Ko e mala‘ia ‘a Sīsū: pea ‘oku ‘ikai ha taha te ne fa‘a hua‘aki ‘o pehē, Ko Sīsū ko e ‘Eiki, ka ‘i he‘ene Laumālie Mā‘oni‘oni‘ia.
4Pea ko eni, ‘oku tufa kehekehe ‘a e ngaahi kelesi, ka ‘oku taha ai pē ‘a e Laumālie:#Lom 12.6-8 5pea ‘oku tufa kehekehe ‘a e ngaahi lakanga, ka ‘oku taha ai pē ‘a e ‘Eiki: 6pea ‘oku tufa kehekehe ‘a e ngaahi ngāue, ka ‘oku taha ai pē ‘a e ‘Otua ‘a ia ‘oku ne fai ‘a e ngāue kotoa pē ‘i he kakai kotoa pē. 7Ka ‘oku tuku ‘a e fakahā‘anga ‘o e Laumālie ki he tangata takitaha, pea ke ‘aonga. 8He ‘oku tuku ki ha taha ‘a e mafai ke lea‘aki ‘a e poto, ‘o fou mai ‘i he Laumālie; pea ki ha taha ‘a e mafai ke lea‘aki ‘a e ‘ilo loloto, ka ‘i he Laumālie pē ko ia; 9‘oku tuku ki ha taha kehe ‘a e tui, ka ko e ‘iate ia ‘a e Laumālie pē ko ia; pea ki ha taha ‘a e ngaahi mafai faito‘o, kae taha ai pē ‘a e Laumālie ‘oku fai‘aki; 10pea ‘oku tuku ki ha taha ‘a e ngaahi ngāue mana; ki ha taha ‘a e malanga palofisai; ki ha taha ‘a e vavanga‘i ‘o e ngaahi laumālie; ki ha taha kehe ‘a e fai‘aki ‘a e ngaahi fa‘ahinga lea: pea ki ha taha ‘a e hiki ‘o e ngaahi lea. 11Ka ko e me‘a kotoa pē ko ia, ko e ngāue ‘a e Laumālie pē taha ko ia, he‘ene tufa kehekehe ki he kakai takitaha, ‘o fakatatau ki hono finangalo.
Ko e Sino pē ‘e Taha kae Kupu Kehekehe
12He hangē tofu pē ‘oku taha ‘a e sino, kae lahi hono ngaahi kupu; pea ko e ngaahi kupu kehekehe ‘o e sino, neongo ‘oku lahi, ka ko e sino pē taha; ‘oku pehē foki ‘a Kalaisi.#Lom 12.4-5 13Kae‘uma‘ā, ‘i he fai‘aki ha Laumālie pē taha, na‘e papitaiso kitautolu kotoa pē ki ha sino pē taha–pe ‘oku tau Siu pe Kalisi, pōpula pe tau‘atāina–pea na‘e fakainu‘aki ‘a kitautolu kotoa pē ha Laumālie pē taha.
14Kae‘uma‘ā ‘ē, tala‘ehai ko e kupu ‘e taha ‘a e sino, ka ‘oku lahi. 15Ka ne pehē ‘e he va‘e, Sā, ‘oku ‘ikai te te kau kita ki he sino, koe‘uhi ‘oku ‘ikai ko ha nima kita; pea ‘oku ‘ikai ai koā kau ia ki he sino, ‘ō? 16Pea ka ne pehē ‘e he telinga, Sā, ‘oku ‘ikai te te kau kita ki he sino, koe‘uhi ‘oku ‘ikai ko e mata kita; pea ‘oku ‘ikai ai koā kau ia ki he sino, ‘ō? 17Ka ne mata ‘a e sino kotoa, pea fēfē ai ‘a e fanongo? Ka ne fanongo hono kotoa, pea fēfē ai ‘a e nanamu? 18Ka ‘i hono anga ko eni, kuo fa‘u ‘e he ‘Otua ‘a e ngaahi kupu ‘i he sino, ‘o takitaha ma‘ana; ‘o fakatatau ki he me‘a na‘e hā ki hono finangalo. 19Ka ‘oka ne ala taha ‘a e ngaahi kupu kotoa pē, pea sino fēfē? 20Ka ‘i hono anga ko eni, ‘oku lahi ‘a e ngaahi kupu, kae taha pē ‘a e sino.
21Tala‘ehai ‘oku lava ‘e he mata ke lea ki he nima, ‘o pehē, ‘Oku ‘ikai te ke ‘aonga kiate au: pehē foki ‘e he ‘ulu ki he va‘e, ‘Oku ‘ikai te mo ‘aonga kiate au. 22Kaekehe, ko e ngaahi kupu ‘o e sino ‘oku matamata vaivai, ‘oku lahi hake noa pē honau ‘aonga: 23pea ko e ngaahi kupu ‘o e sino ‘oku tau lau ‘oku feifei‘avale, ‘oku lahi hake ‘a e teunga ‘oku tau ‘ai ki ai: pea ko hotau ngaahi feitu‘u ‘oku palakū, ‘oku ‘i ai hano matamatalelei‘anga ‘oku hulu atu; 24ka ‘oku ‘ikai ‘aonga ha me‘a pehē ki hotau ngaahi feitu‘u ‘oku matamatalelei. Ka ko eni, na‘e ngaohi ‘e he ‘Otua ‘a e sino ke hōhoamālie, he‘ene ‘ai ke hulu atu ‘a e teunga ‘o ha feitu‘u ‘oku masivesiva: 25koe‘uhi ke ‘oua na‘a ai ha mavahevahe ‘i he sino; ka ke tatau ‘a e fetokanga‘aki ‘a e ngaahi kupu. 26Pea ko ia, ka mamahi ha kupu ‘e taha, pea ‘oku kaungā mamahi mo ia ‘a e kupu kotoa pē; pea ka fakasanisani ha kupu ‘e taha, pea ‘oku kaungā fiefia mo ia ‘a e ngaahi kupu kotoa.
27Pea ko kimoutolu ko e sino ‘o Kalaisi, pea ko e ngaahi kupu ‘oku takitaha hono feitu‘u. 28Pea kuo fokotu‘u ‘e he ‘Otua ha ni‘ihi ‘i he siasi ke ‘aposetolo–ko e ‘uluaki ia–ko hono ua ‘a e kau malanga palofisai, ko hono tolu ko e kau faiako: hoko ai ‘a e ngaahi mafai mana, hoko ai ‘a e ngaahi mafai faito‘o, ‘a e ngaahi tokoni tu‘utāmaki, ‘a e ngaahi tu‘unga pule, ‘a e mafai ‘o e ngaahi fa‘ahinga lea.#‘Efe 4.11 29‘Oku ‘aposetolo kotoa pē koā, ‘ō? ‘Oku malanga palofisai kotoa pē? ‘Oku faiako kotoa pē? ‘oku mafai mana kotoa pē? 30‘oku ma‘u kotoa pē ‘a e ngaahi mafai faito‘o? ‘oku lea‘aki kotoa pē ‘a e ngaahi lea kehekehe? ‘oku hiki lea kotoa pē, ‘ō?
31Ka mou kakapa ki he ngaahi kelesi ‘oku mā‘olunga.
Currently Selected:
Kolinitō 1 12: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
