Kolinitō 1 11
11
1MOU hoko ko e kau fa‘ifa‘itaki kiate au, ‘o hangē foki ko ‘eku fa‘ifa‘itaki ‘aku kia Kalaisi.#1 Kol 4.16; Filip 3.17
Ko e Pūlou he Lotú
2Pea ko eni ‘oku ou fakamālō atu ‘i ho‘omou manatu kiate au ‘i he me‘a kotoa pē, mo ho‘omou pukepuke ‘a e ngaahi tu‘utu‘uni ‘o fakatatau ki he‘eku tuku atu. 3Ka ‘oku ou loto ke mou ‘ilo, ko e ‘ulu ‘o e tangata kotoa pē ko Kalaisi; pea ko e ‘ulu ‘o e fefine ko e tangata; pea ko e ‘ulu ‘o Kalaisi ko e ‘Otua. 4‘Ilonga ha tangata ‘oku fai ha hū, pe ha malanga palofisai, ka ‘oku tatā hono ‘ulu, ‘oku ne fakatōkilalo‘i ai hono ‘ulu. 5Ka ‘ilonga ha fefine ‘oku fai ha lotu, pe ha malanga palofisai, ta‘e‘ufi‘ufi hono ‘ulu, ‘oku ne fakatōkilalo‘i ai hono ‘ulu: he ‘oku ne tatau tofu pē mo ha toko taha kuo fakatekefua. 6‘Io, kapau ‘oku ‘ikai ‘ai tatā ha fefine, pea tuku ke ne kosi foki: pea kapau ko e me‘a fakamā ki ha fefine ke kosi, pe fakatekefua, pea tuku ke ne tatā. 7Ka ‘oku ‘ikai totonu ke ‘ufi‘ufi ‘e he tangata hono ‘ulu, he ko e ‘īmisi ia mo e lāngilangi ‘o e ‘Otua; ka ko e fefine ko e lāngilangi ia ‘o e tangata.#Sēn 1.26-27 8He tala‘ehai ko e tupu‘anga ‘o e tangata ko e fefine; kaekehe, ko e tupu‘anga ‘o e fefine ko e tangata.#Sēn 2.18-23 9Kae‘uma‘ā foki, na‘e ‘ikai ngaohi ‘a e tangata koe‘uhi ko e fefine, ka ko e fefine koe‘uhi ko e tangata. 10Ko hono ‘uhinga ia ‘oku totonu ke ‘ai ai ‘e he fefine ki hono ‘ulu ‘a e faka‘ilonga pule‘ia, telia ‘a e kau ‘āngelo. 11Ka neongo ia, ka tala‘ehai ‘oku fakapalataha ‘a e fefine ‘i he lotu, ta‘ekau ai ‘a e tangata, pe fakapalataha ‘a e tangata, ta‘ekau ai ‘a e fefine. 12He hangē ā ko e tangata ko e tupu‘anga ‘o e fefine, pehē foki ‘oku fou ‘i he fefine ‘a e tangata: ka ko e tupu‘anga ‘o e me‘a kotoa pē ko e ‘Otua.
13Mou ‘utangi ia ‘i he me‘a ‘oku hā ‘iate kimoutolu: ‘oku taau koā ke fai ‘e he fefine ha hū ki he ‘Otua ta‘etatā? 14‘Ikai ‘oku hīnoi‘i kimoutolu ‘e Natula, ka ‘ulu loloa ha tangata ko e me‘a ta‘engali kiate ia? 15Ka ‘oka ‘ulu loloa ha fefine, ko hono lāngilangi ia: he ko e lou‘ulu kuo tuku mōno pulonga. 16Ka ‘oka ai ha toko taha ‘oku matamata fie fakakikihi ‘i he me‘a; ‘ē, ‘oku ‘ikai te tau fai ha anga pehē, ‘e kitautolu pē ko e ngaahi siasi ‘a e ‘Otua.
Ko e Fakanofonofo ‘o e ‘Ohomohe ‘a e ‘Eikí
17Ka ko ‘eku tu‘utu‘uni ko ia, ‘oku ‘ikai ke ‘alu atu mo e fakamālō; koe‘uhi ko ho‘omou fa‘a fakataha ‘oku ‘ikai iku ki ha laka ki mu‘a, ka ki he holomui. 18He ko e me‘a ‘e taha, ‘oku mofisi mai tokua, ka fai ha‘amou fakataha ‘oku hoko ‘iate kimoutolu ‘a e ngaahi mavahevahe: pea ‘oku ou tui ki ha me‘a ni‘ihi. 19Seuke, kuo pau ke ‘iate kimoutolu mo ha fakafa‘afa‘ahinga; koe‘uhi ke e‘a ai ‘iate kimoutolu ‘a kinautolu ‘oku lelei mo‘oni. 20Pea ko eni, ko ho‘omou fakataha ki he potu ko ē, tala‘ehai ko e kai ia ‘o e ‘Ohomohe ‘o e ‘Eiki. 21He ‘i he fai ‘o e kai, ‘oku takitaha ala leva ki he me‘a na‘e ha‘u mo ia; pea ko Me‘a ē ‘oku fiekaia, ka ko Me‘a ē ‘oku konā. 22‘Uoi, tā ‘oku ‘ikai ‘apē hamou ngaahi fale ke fai ai ho‘omou kai mo e inu, ‘ō? pe na‘a ko ho‘omou ta‘etoka‘i ‘a e Fakataha ‘a e ‘Otua, mo ho‘omou fie fakamaa‘i ‘a masiva? Ko e hā ‘eku lea atu ‘e fai? te u fakamālō atu? ‘Oku ‘ikai te u fakamāloo‘i kimoutolu ‘i he me‘a ni.
23He na‘a ku ma‘u ‘e au mei he ‘Eiki ‘a ia ā ne u tuku atu, ‘o pehē, Ko e ‘Eiki ko Sīsū, ‘i he pō ko ia na‘e fai ai hono lavaki‘i, na‘a ne to‘o ha mā: 24pea hili ‘ene fakafeta‘ia, na‘a ne pakipaki, ‘o ne me‘a, Ko ho‘oku ‘eni sino, ‘a ia ‘oku ma‘amoutolu: mou fai pehē mōku fakamanatu. 25Pehē foki ‘ene to‘o ‘a e ipu, hili ‘a e ‘ohomohe, ‘o ne me‘a, Ko e ipu ni, ko e fuakava fo‘ou ia ‘oku fai‘aki hoku toto: ‘ilonga ha‘amou inu ia, fai pehē mōku fakamanatu.#‘Eki 24.6-8; Sel 31.31-34
26Seuke, ‘ilonga ha‘amou kai ‘a e mā ni mo inu ‘i he ipu, ‘oku mou fakahā ‘a e pekia ‘a e ‘Eiki kae‘oua ke ne hoko mai. 27Ko ia, ‘ilonga ‘a ia te ne fai ta‘engali ‘ene kai ‘a e mā, pe ko ‘ene inu ‘i he ipu ‘a e ‘Eiki, kuo ne angahala ki he sino mo e ta‘ata‘a ‘o e ‘Eiki. 28Ka ke sivi mu‘a ‘a e tangata ‘e ia, pea ke ne toki kai ‘i he mā mo inu ‘i he ipu. 29He ko ia ‘oku ne kai mo inu ai, ‘oku ne kai mo inu hano fakamo‘ua, ‘o kapau ‘oku ‘ikai te ne fifili ‘o ‘ilo ‘a e sino. 30Ko hono ō ia ‘oku ‘i ai hamou tokolahi ‘oku vaivai mo mahamahaki, ‘io, pea kuo mohe ‘a e ni‘ihi. 31He ka ne tau fifili ‘o ‘ilo ‘a kitautolu, pehē ‘e ‘ikai fakamo‘ua ‘a kitautolu. 32Ka ‘i hotau fakamo‘ua, ko e ‘Eiki ia ‘oku ne fai hotau kinisi, koe‘uhi ke ‘oua na‘a fai hotau fakamala‘ia fakataha mo māmani.
33Ko ia, si‘oku kāinga, ka mou ka fakataha ke kai, mou fakafenē‘aki mu‘a. 34Kapau ‘oku fiekaia ha taha, tuku ke ne kai ‘i ‘api; ke ‘oua te mou fakataha ke kai mo‘ua. Ko hono toe ‘o e ngaahi me‘a te u toki tu‘utu‘uni ‘oka u ka ‘alu atu.
Currently Selected:
Kolinitō 1 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
