Kolinitō 1 10
10
Ko e Fakatokanga he Ngaahi Tamapua ‘Otuá
1HE ‘oku ou loto, kāinga, ke ‘oua na ‘a puli ‘a e me‘a ni; ko ‘etau ngaahi kui na‘a nau ‘i he malu ‘o e ‘Ao kotoa pē, ‘o nau ‘asi kotoa pē ‘i he Tahi;#‘Eki 13.21-22; 14.22-29 2pea nau papitaiso kotoa pē kia Mōsese ‘i he ‘ao mo e tahi;#‘Eki 16.35 3pea nau kai kotoa pē mei ha me‘akai mana pē taha;#‘Eki 16.35 4pea nau inu kotoa pē mei ha me‘a inu mana pē taha: he na‘a nau inu ai pē mei he Maka mana na‘e tulimui kiate kinautolu: ka ko e Maka ko ia ko Kalaisi pē.#‘Eki 17.6; Nōm 20.11 5Ka neongo ia, ka tala‘ehai na‘e hōifua ‘a e ‘Otua ki hanau tokolahi; he na‘e tulaki holo kinautolu ‘i he toafa.#Nōm 14.29-30
6Pea ko eni, na‘e fai ‘a e ngaahi me‘a ko ia, ko e taipe kiate kitautolu; ke ‘oua na‘a tau hoko ko e koto holi ki he kovi, ‘o hangē ā ko kinautolu na.#Nōm 11.4 7Kae‘uma‘ā ke ‘oua te mou hoko ko e kau tauhi ‘aitoli, ‘o hangē ko e ni‘ihi ‘i he kakai na; ‘a ē ‘oku tu‘u ‘i he Tohi, Na‘e nofo ‘a e kakai ke kai mo inu, pea nau tu‘u hake ke fakavā. 8Pea ke ‘oua na‘a tau fe‘auaki, ‘o hangē ko e fe‘auaki ‘a e ni‘ihi ‘o e kakai na, pea tō ai hanau toko ua mano ma tolu afe ‘i he ‘aho pē ‘e taha.#‘Eki 32.6 9Pea ‘oua te tau ha‘aki ‘ahi‘ahi‘i ‘a e ‘Eiki,#10.9 ‘a e ‘Eikí; ‘Oku pehē ‘i hono ngaahi hiki fuoloa ‘e ni‘ihi: ‘a Kalaisi. ‘o hangē ko e ‘ahi‘ahi‘i ‘e he ni‘ihi ‘o e kakai na, pea nau mole ‘i he ngāue ‘a e fanga ngata.#Nōm 21.5-6 10Pea ‘oua te mou lāunga ‘o hangē ā ko e lāunga ‘a e ni‘ihi ‘o e kakai na, ‘o nau mole ‘i he ngāue ‘a Faka‘auha.#Nōm 16.41-49
11Pea ko eni, na‘e hoko kiate kinautolu ‘a e ngaahi me‘a ko ia ko e fakataipe: pea na‘e tohi mo‘ota na‘ina‘i, ‘a kitaua kuo ta fenāpasi mo e aofangatuku ‘o e ngaahi kuonga.
12Ko ia, ‘ilonga ‘a ia ‘oku ne pehē kuo ne tu‘u, ke vakavakai na‘a ne hinga. 13Kuo te‘eki ke mo‘ua kimoutolu ‘e ha fa‘ahinga ‘ahi‘ahi ‘oku ta‘ehoa mo e tangata: pea ko e ‘Otua ko e toko taha ‘oku fai ki he‘ene lea, pea ‘e ‘ikai te ne fakangofua ke ‘ahi‘ahi‘i kimoutolu ‘o makehe atu ‘i ho‘omou mafai; kaekehe, te ne ngaohi fakataha mo e ‘ahi‘ahi hono hao‘anga foki mei ai, koe‘uhi ke lava hono kātaki‘i.
14Ko ia, si‘oku ‘ofa‘anga, mou hola mei he tauhi ‘aitoli. 15Seuke, ko ‘eku lea ki ha kakai ‘oku fakapotopoto, ke ‘amoutolu ke ‘utangi ‘a e me‘a ‘oku ou tala. 16Ko e ipu fakafeta‘i, ‘a ia ‘oku tau fakatapu ‘aki ha fakafeta‘i, ‘ikai ko e me‘a ia ‘oku tau kautaha ai ‘i he ta‘ata‘a ‘o Kalaisi? Ko e mā ‘oku tau pakipaki, ‘ikai ko e me‘a ia ‘oku tau kautaha ai ‘i he sino ‘o Kalaisi?#Māt 26.26-28; Ma‘ake 14.22-24; Luk 22.19-20 17He neongo pe ‘oku tau tokofiha, ka ko e mā pē taha kitautolu, ‘a ia ko e sino taha: he ‘oku tau ‘inasi kotoa pē mei he mā pē ko ia ‘e taha.
18Vakai ‘a ha‘a ‘Isileli fakaetangata: ‘ilonga kinautolu ‘oku kai feilaulau, ‘ikai ‘oku nau kautaha ai mo e ‘ōlita?#Lev 7.6 19Ka ko e hā ‘a e me‘a ‘oku hu‘u ki ai ‘eku lau? ko ‘eku pehē ko ha mo‘oni ia ‘a e feilaulau ‘oku ‘atu ki ha ‘aitoli? pe ko ha mo‘oni ia ‘a e ‘aitoli, ‘ō? 20Ka ko ‘eku lea pē, ‘ē, ko e ngaahi feilaulau ‘oku ‘atu ‘e he hīteni, ‘oku nau ‘atu ki he ngaahi fa‘ahikehe, ‘o ‘ikai ki he ‘Otua: pea ‘oku ‘ikai te u loto ke mou kautaha mo Fa‘ahikehe.#Teu 32.17 (LXX) 21Tala‘ehai te mou lava ke inu ‘a e Ipu ‘a e ‘Eiki, mo e ipu foki ‘a Fa‘ahikehe: tala‘ehai te mou lava ke ‘inasi ‘i he Tēpile ‘a e ‘Eiki mo e tēpile foki ‘a Fa‘ahikehe. 22He ko e pehē ke ta fakatupu fua‘a ki he ‘Eiki? he ‘oku ta mālohi ‘iate ia?#Teu 32.21
23Ko e me‘a kotoa pē ‘oku ngofua, ka ‘oku ‘ikai ‘aonga ‘a e me‘a kotoa pē: ko e me‘a kotoa pē ‘oku ngofua, ka ‘oku ‘ikai ke fai ‘e he me‘a kotoa pē ha langa hake.#1 Kol 6.12 24Ke ‘oua na‘a kumi ‘e ha taha ‘ene lelei ‘a‘ana, ka ko e lelei ‘a e taha.
25‘Ilonga ha me‘a ‘oku fakatau ‘i he fale fahi manu, mou kai pē, ‘o ‘oua ‘e fai ha ‘eke ma‘a konisēnisi; 26he ‘Oku ‘a e ‘Eiki ‘a māmani,
Mo e me‘a ‘oku ‘i ai.#Saame 24.1
27Kapau ‘e tala kātoanga atu ‘e ha taha ‘o e kau ta‘elotu, pea ‘oku mou tokanga ke ‘alu ki ai, ‘ilonga ha me‘a ‘oku tuku ‘i homou ‘ao, mou kai pē, ‘o ‘oua ‘e ‘eke ma‘a konisēnisi. 28Ka ‘oka ‘iloange ‘e pehē atu ‘e ha taha, Ko e me‘a na‘e ‘atu ki he temipale, pea ‘oua leva te mou kai, koe‘uhi ko e toko taha ne ne fakahā, pea koe‘uhi ko konisēnisi. 29Ka ‘oku ‘ikai te u pehē, koe‘uhi ko e konisēnisi ‘o‘ou, ka ko e konisēnisi ‘o e taha kehe ko ia: he ko e pehē koā ke fakamo‘ua ‘ete tau‘atāina ‘e ha konisēnisi kehe, ko e hā?
30Kapau ‘oku te kai mo e fakafeta‘i, pea fēfē ai hoto lau‘ikovi‘i ‘i he me‘a ‘oku te fakafeta‘i ai?
31Ko ia, pe ko ho‘omou kai, pe ko ho‘omou inu, pe ko ho‘omou fai ha me‘a, mou fai kotoa pē ke ongoongolelei ai ‘a e ‘Otua. 32Ke ta‘emelengatamaki ho‘omou tō‘onga ki he Siu mo e Kalisi fakatou‘osi. 33Pea ki he siasi foki ‘a e ‘Otua: ‘o hangē foki ‘oku ou fai fakaoleole ‘e au ki he kakai kehekehe ‘i he‘ete me‘a kotoa pē, ‘o ‘ikai te u kumi ‘a e lelei ‘a‘ata, ka ko e lelei ‘a e tokolahi; hei‘ilo ‘e lava ai honau fakamo‘ui.
Currently Selected:
Kolinitō 1 10: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
