Ndia ti fani use ni 13
13
1 Atënë ti ndia so kue mbi yeke fa na ala, alingbi ala sara kue ti sara ye alingbi na ni. Ala zia mbeni tënë na ndö ni pepe, ala zi nga mbeni tënë na ya ni pepe.
Tënë na ndö ti azo ti vorongo anzapa nde
2 Moïse atene: Mbeni ye tongaso alingbi ti si: mbeni zo ti bango aye na ya ti bango-li, wala mbeni wayanga-Nzapa ayeke londo na popo ti ala; lo lingbi ande ti sara aye ti kpene na aye ti dongo be. 3Tongana ye ti kpene ni na ye ti dongo be ni asi alingbi na tënë so lo tene, tongana lo tene na ala: “E mu peko ti ambeni nzapa nde, e voro ala”; – andaa ayeke anzapa so ala hinga ala pepe – 4alingbi ala ma tënë ti wayanga-Nzapa ni pepe, wala ti zo ti bango aye na ya ti bango-li ni pepe. Biani, *KOTA GBIA Nzapa ti ala laa ayeke tara be ti ala na lege ti ye tongaso ti baa, wala ala ye lo na be ti ala kue, na yingo ti ala kue. 5Ala mu gi peko ti KOTA GBIA Nzapa ti ala oko, alingbi ala kpe gi mbeto ti lo oko. Ala sara ye alingbi gi na atënë ti ndia ti lo, ala ma gi lo oko, ala sara kua gi na lo oko, ala ngba gi na tere ti lo oko. 6Alingbi a fâ wayanga-nzapa ni so, wala zo ti bango aye na ya ti bango-li so, ngbanga ti so lo pusu ala ti ke KOTA GBIA Nzapa ti ala, lo so lo sara si ala sigigi na sese ti Ezipte, lo so lo zi ala na ndo so ala yeke lani angbaa daa. Zo ni aye titene ala mu mbeni lege nde na ti so KOTA GBIA Nzapa ti ala amu yanga na ala titene ala tambula daa. Lege so fade ala yeke zi sioni ye na popo ti ala laa.
7Mbeni ye tongaso alingbi ti si: mbeni ita ti ala ti koli so ayeke molenge ti mama ti ala, wala molenge ti ala ti koli, wala molenge ti ala ti wali, wala wali ti ala so ayeke lango na kate ti ala, wala mbeni mba ti ala so ala na lo aye tere mingi aga abaa ala na hondengo ni si atene na ala: “E gue, e voro ambeni nzapa nde”; – andaa ayeke anzapa so, ala azo ti Israel, ala hinga ala pepe, akotara ti ala ahinga nga ala pepe. 8Amara so angoro ala, azo ti Israel, ala so ayeke nduru na ala, wala ala so ayeke na yongoro ndo, ti londo na nda ti sese asi na mbeni nda ni, ala laa ayeke voro anzapa ni so. – 9Alingbi ala azo ti Israel, ala yeda na tënë ni pepe, ala ma nga zo tongaso pepe; ala baa mawa ti zo so pepe, ala gbu koko ti lo pepe, ala honde lo pepe. 10Alingbi ala fâ lo fango. Mo so zo ni aye ti handa mo so, mo laa mo yeke mu têne ti bo na zo ni kozoni. Na pekoni, fade tanga ti azo ni ayeke bo lo nga. 11Fade mo yeke bo zo ni na têne si lo yeke kui, ngbanga ti so lo gi lege ti handa mo titene mo ke KOTA GBIA Nzapa ti mo so asara si mo sigigi na Ezipte, ndo so lani mo yeke ngbaa daa. 12Fade azo ti Israel kue ayeke ma tënë ni, mbeto ayeke gbu ala si ala kiri asara mara ti sioni ye tongaso pepe.
13Mbeni ye tongaso alingbi nga ti si: mbeni lâ, ala azo ti Israel, ala ma a tene, na ya ti mbeni gbata oko so KOTA GBIA Nzapa ti ala amu na ala titene ala duti daa, 14ambeni zo so ayeke sara mbirimbiri ye pepe na popo ti ala alondo ti handa azo ti gbata ti ala, atene: “E gue, e voro ambeni nzapa nde”; – andaa ayeke anzapa so ala hinga ala pepe. – 15Tongaso, fade ala yeke hunda ndo, ala gi nda ni, ala hunda azo ti ma tënë ti yanga ti ala mbirimbiri. Tongana ala hinga atene, zo ni asara sioni ye mingi tongaso biani, 16fade ala yeke fâ azo ti gbata ni kue, ala yeke fâ nga anyama kue. Na pekoni, ala yeke buba gbata ni na aye ti ya ni kue: 17ala yeke bongbi amosoro ni kue na ndo so azo ayeke bongbi daa na be ti gbata ni, ala yeke gbi amosoro ni nga na gbata ni na wâ. Fade ayeke ga tongana *sandaga so a yeke gbi kue na wâ ndali ti KOTA GBIA Nzapa ti ala. Gbata ni so ayeke ngba ndo ti gba ti atêne kpu na kpu; a yeke kiri ti leke ni laoko pepe. 18Ye so a diko ni titene a buba ni kue so, alingbi maboko ti ala andu ni oko pepe. Tongaso, fade ngonzo ti KOTA GBIA so alondo tongana wâ so ayeke de, lo yeke sara nzoni be na ala si lo yeke baa mawa ti ala, lo yeke sara titene ala wu mingi, alingbi na zendo so lo mu na akotara ti ala. 19Titene lo sara na ala aye so, alingbi ala ma KOTA GBIA Nzapa ti ala, ala sara ye alingbi na atënë ti ndia so kue mbi yeke fa na ala laso; alingbi ala sara ye so ayeke mbirimbiri na le ti lo.
Currently Selected:
Ndia ti fani use ni 13: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010