Ndia ti fani use ni 14
14
Sioni lege ti sarango mua so ndia ake ni
1 Moïse atene: Ala yeke amolenge ti *KOTA GBIA Nzapa ti ala. Tongaso, tongana mbeni zo akui, alingbi ala suru tere ti ala na ka pepe, ala kio kua ti ndö ti le ti ala pepe. 2 Biani, ala yeke azo ti mara so a zia ala nde ndali ti KOTA GBIA Nzapa ti ala. Na popo ti amara ti sese kue, gi ala laa KOTA GBIA Nzapa ti ala asoro ala titene ala ga azo ti lo wani.
Anyama so ala lingbi ti te na anyama so ala lingbi ti te pepe
(Sandaga 11.1-23)
3Ye so ayeke *sioni, alingbi ala te ni pepe. 4Anyama so ala lingbi ti te ayeke so: bagara, taba, ngasa, 5tagba, dengbe, lekpa, ngasa ti ngonda, wuga, zeranga na kete wuga. 6Ala lingbi ti te ambeni nyama so ya ti sokoto ti gere ti ala akangbi use si ala kiri ayeke te ya ti kobe so ala te kozoni awe. 7Me na popo ti anyama so akiri ayeke te ya ti kobe so ala te kozoni awe, wala na popo ti ala so ya ti sokoto ti gere ti ala akangbi use, ambeni ayeke daa so ala lingbi ti te ala pepe; ayeke anyama tongana: *zambala, ndaramba na daman. Anyama so akiri ayeke te ya ti kobe so ala te kozoni awe, me ya ti sokoto ti gere ti ala akangbi use pepe. Ala baa ala tongana anyama so ayeke *sioni. 8Ala te nga nguru pepe. Biani, ya ti sokoto ti gere ti lo akangbi use, me kobe so lo te kozoni awe, lo kiri lo yeke te ya ni pepe. Ala baa lo tongana nyama so ayeke *sioni; ala te kasa ti lo pepe, ala ndu nga kuâ ti lo pepe.
9Na popo ti anyama kue ti ya ti ngu, ala so ala lingbi ti te ayeke ala so maboko ti ala ti susu na *hali ti ala ayeke daa. 10Me anyama so maboko ti ala ti susu na hali ti ala ayeke daa pepe, ala te ala pepe: ala baa ala tongana anyama so ayeke *sioni.
11Ala lingbi ti te andeke so kue ayeke *nzoni. 12Me ambeni ndeke so ala lingbi ti te ala pepe ayeke andeke tongana: *ngoalo, zipaete, ngoalo ti kota ngu-ingo, 13milan, andeke so ayeke te kasa, mara ti afokon nde nde, 14na mara ti *akpakpo nde nde, 15*naamo, mbolokpa, muete, na mara ti andeke nde nde ti gbungo kondo, 16kete ndeke ti bi, kota ndeke ti bi, shuete, 17pelikan, andeke ti tengo kuâ ti nyama, kormoran, 18sigonye, na mara ti aheron nde nde, hipe na anyama ti ngia.
19Akete kete nyama so kue ayeke na *kpangi ti ala daa, alingbi ala azo ti Israel, ala te ala pepe; akete kete nyama ni so ayeke *sioni. 20 Me ala lingbi ti te akete kete nyama so kue ayeke *nzoni.
21 Nyama so akui na be ti lo wani, alingbi ala te lo pepe. Ala mu nyama ni na wande so asara kodro na ndo ti ala, wala ala ka nyama ni kango na mbeni wande. Biani, ala azo ti Israel, ala yeke azo so a zia ala nde ndali ti KOTA GBIA Nzapa ti ala. Alingbi ala to molenge ti ngasa na ya ti ngu ti me ti mama ti lo pepe.
Ndia ndali ti mungo dime
22Moïse atene: Na ya ti ngu oko oko, alingbi ala azo ti Israel, ala zi *dime ti ale ti kobe kue ti yaka ti ala, ala zia ni nde. 23 Na pekoni, ala yeke gue na ndo so *KOTA GBIA Nzapa ti ala asoro titene iri ti lo aduti daa. Kâ, fade ala yeke te dime ti *ble ti ala, ti fini vin ti ala, ti mafuta ti ala; ala yeke te nga akozo molenge ti abagara, ti ataba na ti angasa ti ala. Lege so ala yeke manda ti kpe mbeto ti KOTA GBIA Nzapa ti ala lakue laa. 24Tongana KOTA GBIA Nzapa ti ala amu na ala gba ti ale ti kobe, e hinga pepe, ayeke duti ngangu titene ala yo adime ni ti gue na ni na ndo so lo soro ti duti daa, ngbanga ti so lege ni ayo mingi. 25Tongana ye ni ayeke tongaso, fade ala yeke ka ale ti kobe ni, ala mu nginza ni ague na ni na ndo so KOTA GBIA Nzapa ti ala asoro ti duti daa. 26Kâ, fade ala yeke vo aye so kue ala yeke na nzara ni: abagara, ataba na angasa, vin na samba. Na ngia na be, ala na azo ti sewa ti ala, ala yeke te aye so kue na dawa ti KOTA GBIA Nzapa ti ala. 27Me alingbi be ti ala agirisa pepe na azo ti mara ti Lévi so aduti na ya ti agbata ti ala. Biani, azo ti mara ti Lévi awara sese pepe ti ga ti ala tongana ti so ala, atanga ti azo ti mara ti Israel, awara ni.
28Na peko ti ngu ota, ala yeke zi dime ti ale ti kobe so ala wara na ya ti ngu ni so, ala zia ni kue na ya ti agbata ti ala. 29Tongaso azo ti mara ti Lévi so ayeke na sese tongana ala, azo ti Israel pepe, na awande, anyindu na awali-mua so aduti na ya ti agbata ti ala, ayeke te kobe alingbi na nzara ti ala. Tongaso, fade KOTA GBIA Nzapa ti ala ayeke sara tufa na ndö ti ala na ya ti akua so kue ala yeke sara.
Currently Selected:
Ndia ti fani use ni 14: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010