Ndia ti fani use ni 12
12
ANDIA TI KOTA GBIA
12–26
1Moïse atene: So ayeke aye so ndia afa nga na atënë ti ndia so fade ala yeke sara kue ti sara ye alingbi na ni na ya ti sese so *KOTA GBIA, Nzapa ti akotara ti ala amu na ala titene aga ti ala. Fade ala yeke sara ye alingbi na ni na ngoi so kue ala yeke ngba na fini na ndö ti sese ni.
Ndo ti vorongo Nzapa ayeke gi oko
2Amara nde so ala yeke gue ti mu sese ti ala aleke ambeni ndo na li ti ahoto, na li ti akete hoto nga na gbe ti afini keke so kue kugbe ni ayeke gbani ti voro anzapa ti ala daa. Alingbi ala, azo ti Israel, ala buba ando ni so kue kue kue. 3 Fade ala yeke kungbi agbalaka ti amara ni na sese, ala yeke fâ ya ti angbongboro têne so ala leke aluti na nduzu, ala yeke gbi na wâ akeke so ala leke aluti na nduzu ti voro ni, ala yeke kungbi alimo ti anzapa ti ala; ala yeke zi iri ti anzapa ni na ya ti ando ni so. 4Alingbi lege ti vorongo *KOTA GBIA Nzapa ti ala aduti tongana ti amara ni so pepe. 5Fade ala yeke gue ti voro lo gi na ndo so lo yeke soro ni na popo ti amara ti ala kue; na ndo so iri ti lo ayeke duti daa si azo ayeke gue ti voro lo daa. 6Kâ laa ala yeke gue na *asandaga ti ala so a yeke gbi ni kue na wâ, asandaga ti ala ti beoko, *adime ti ala, amatabisi ti ala, aye so ala deba yanga ti ala ti mungo ni, aye so ala mu na nzoni be nga na akozo molenge ti abagara, ti ataba na ti angasa ti ala. 7Kâ na ya ti da ti KOTA GBIA Nzapa ti ala laa ala yeke te ande kobe ti amatanga, ala na asewa ti ala; be ti ala ayeke si singo na ngia ndali ti anzoni ye so ala wara na lege ti akua so kue ala sara, ngbanga ti so fade KOTA GBIA Nzapa ti ala ayeke sara tufa na ndö ti ala.
8Fade ala yeke kiri ti voro KOTA GBIA pepe tongana ti so e yeke sara ni ge laso so. Ge so, zo oko oko ayeke sara ye so ayeke nzoni na le ti lo wani. 9Biani, ade ala si pepe na sese so KOTA GBIA Nzapa ti ala amu na ala titene aga ti ala, sese so ala yeke wu tere ti ala daa. 10Me tongana ala fâ ngu ti Jourdain si ala duti na sese so KOTA GBIA Nzapa ti ala amu na ala titene aga ti ala, fade lo yeke sara titene awato ti ala so angoro ala akiri agi tënë na ala pepe si ala yeke duti na siriri. 11Tongaso, na ndo so KOTA GBIA Nzapa ti ala asoro titene iri ti lo aduti daa si azo ayeke gue ti voro lo daa laa ala yeke ga na lo aye so mbi mu yanga daa na ala: asandaga ti ala so a yeke gbi ni kue na wâ, asandaga ti ala ti beoko, adime ti ala, amatabisi ti ala na aye so kue ala deba yanga ti ala ti mungo ni na KOTA GBIA. 12 Kâ na ya ti da ti KOTA GBIA Nzapa ti ala, fade be ti ala ayeke si singo na ngia, ala na amolenge ti ala ti koli na ti wali, na azo ti kua ti ala ti koli na ti wali nga na azo ti mara ti Lévi so ayeke duti na ya ti agbata ti ala. Biani, azo ti mara ti Lévi awara sese pepe ti ga ti ala tongana ti so ala, atanga ti azo ti mara ti Israel, awara ni.
13Ala sara hange si ala ya pepe asandaga ti ala so a yeke gbi ni kue na wâ na ando so kue fade ala yeke wara ni. 14Fade ala yeke ya asandaga ni gi na ndo so KOTA GBIA asoro ni na ya ti sese ti mbeni mara ti ala oko. Gi na ndo so oko laa ala yeke sara aye so kue mbi mu yanga na ala ti sarango ni. 15Me tongana KOTA GBIA asara tufa na ndö ti ala na ya ti agbata so kue ala yeke duti daa, na ngoi so kue be ti ala aye, ala lingbi ti fâ mbeni nyama senge ti te. Ataa zo so ayeke *sioni, wala zo so ayeke *nzoni, lo lingbi ti te nyama ni senge, tongana ti so zo ayeke te fade dengbe wala tagba. 16 Me alingbi ala te mene ti nyama ni pepe. Fade ala yeke tuku ni na sese tongana ngu.
17Na ya ti agbata ti ala, fade ala yeke te pepe *dime ti *ble ti ala, dime ti fini vin ti ala, dime ti mafuta ti ala so ala yeke mu na Nzapa, ataa dime ti akozo molenge ti abagara ti ala, ti ataba na ti angasa ti ala, ataa ti aye so ala mu na nzoni be na ti aye so ala deba yanga ti ala ti mungo ni wala ti amatabisi ti ala. 18Fade ala yeke te aye ni so gi na dawa ti KOTA GBIA Nzapa ti ala, na ndo so lo yeke soro ni ande. Ala, na amolenge ti ala ti koli na ti wali, na azo ti kua ti ala ti koli na ti wali, na azo ti mara ti Lévi so ayeke duti na ya ti agbata ti ala ayeke te ni. Kâ, na dawa ti KOTA GBIA Nzapa ti ala, fade be ti ala ayeke si singo na ngia ndali ti anzoni ye so ala wara na lege ti akua so kue ala sara. 19Me ala sara hange si na ngoi so kue ala yeke ngba na fini na ya ti sese ni, ala baa azo ti mara ti Lévi tongana ambumbuse zo pepe.
20Tongana KOTA GBIA Nzapa ti ala ayeke sara ande si sese ti ala akono alingbi na zendo so lo mu na ala, tongana ala yeke na nzara ti te nyama, fade ala lingbi ti te ni senge, alingbi na ti so be ti ala aye. 21Tongana ala lango ayo na ndo so KOTA GBIA Nzapa ti ala asoro titene iri ti lo aduti daa, fade ala lingbi ti fâ bagara, taba wala ngasa so KOTA GBIA amu na ala. Tongaso, fade ala yeke te nyama alingbi na ti so be ti ala aye, alingbi na yanga so mbi mu na ala. 22Ataa zo so ayeke *sioni, wala zo so ayeke *nzoni, ala kue alingbi ti te nyama ni senge, tongana ti so zo ayeke te ka dengbe wala tagba. 23 Gi ye oko, ala sara kue si ala te mene pepe, ngbanga ti so fini ayeke na ya ti mene. Alingbi ala te kasa ti nyama pepe so abongbi ni na ye so ayeke fini ti nyama ni. 24Ala te mene ni pepe, me ala tuku ni na sese tongana ngu. 25Ala te ni pepe, tongaso si fade ala na *ahale ti ala ayeke baa nzoni, ngbanga ti so ala sara fade ye so ayeke mbirimbiri na le ti KOTA GBIA.
26Me gi anyama so ala zia ala nde ndali ti KOTA GBIA na ala so ala deba yanga ti ala ti mu na sandaga laa ala yeke ga na ni na ndo so KOTA GBIA asoro ni. 27Âdu ti asandaga ti nyama so a yeke gbi ni kue na wâ, fade ala yeke ya kasa ni na mene ni na ndö ti gbalaka ti KOTA GBIA Nzapa ti ala. Âdu ti asandaga ti beoko, ala yeke tuku mene ni na ndö ti gbalaka ti KOTA GBIA, na pekoni ala yeke te kasa ni.
28Alingbi ala ma atënë so kue mbi mu yanga daa na ala, ala sara ye alingbi na ni. Tongaso si fade ala na ahale ti ala ayeke baa nzoni kpu na kpu, ngbanga ti so ala sara fade ye so ayeke nzoni si ayeke mbirimbiri na le ti KOTA GBIA Nzapa ti ala.
KOTA GBIA ake tënë ti ayanda ti azo ti Kanaan
29Moïse atene: Na dawa ti ala, fade *KOTA GBIA Nzapa ti ala, azo ti Israel, ayeke fâ azo ti amara nde so ala yeke li ande na sese ti ala. Ala yeke tumba amara ni si ala yeke duti na sese ni na peko ti azo ni. 30Me tongana KOTA GBIA ahunzi amara ni so kue na dawa ti ala, azo ti Israel, alingbi ala sara hange si ala ti na ya ti kuku ti azo ni pepe na hakango peko ti sarango ye ti ala. Ala gi ti hinga lege ti vorongo anzapa ti amara ni so pepe! Ala tene pepe: “Azo ti mara ni ayeke voro ando anzapa ti ala tongana nyen? E nga, e ye ti sara tongana ala.” 31Ala azo ti Israel, tongana ala yeke voro KOTA GBIA Nzapa ti ala, alingbi ala sara ye tongana ti amara ni so pepe. Biani, amara ni so ayeke sara asioni ye nde nde na nzapa ti ala, asioni ye so zo alingbi ti baa na le ti lo fani use pepe, aye so be ti KOTA GBIA ake ni: azo ni amu amolenge ti ala ti koli na ti wali ti gbi ala na wâ ti mu na *sandaga na anzapa ti ala nga!
Currently Selected:
Ndia ti fani use ni 12: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010