Ñwaè' Fileèpaêi 4

1Banɛ wèe ku tɛɛ tatap wèe Tata wèe, bfʉr wâ. M kòŋ wèe magòr sê, bkar wâ. Ya ntee yi ce lùu mɛ̀ à ryɛ wèe. Yu wèe ce wèe ce gèe m ce lu'shi, a ce nàa tu nè wèe.

2M ce loo nè Ɛ̀vodìyà ba Sìntikɛ̀ mɛnɛ wowèe a ba tarte, ba cǔu mo'sir njobè' wowèe a tarshi a Tata wèe. 3Kyer wɛ̀ Sisigùs ce à yu mini à rfà' ce sò ce fà' àbee, jà' bbyèŋge ca, njobè' wèr wowèe à m ce rè àbee tɛ m bo fè'shi Nsuŋ Mbòŋmboŋ nè bèe. Klɛ̌mɛ̀n ye ye à m ce rè wèr ye, ker ba bèe mo' ce a m ce fà' wèr wowèe nà; mlii bèe anà mi yu mbe ŋwà' Ryòŋ. 4Wèe ce lu'shi nfè' sìp njobè' wèe yu wèe Tata wèe; m ker ce làa mɛnɛ wèe lu'shi. 5Wèe gee buu wɛɛwɛ à nduunjì ce ŋwɛ̀ wɛɛwɛ bo yɛ enɛ wèe yu nè rbornì-ŋwɛ̀. Kuushi nè enɛ nfè' mʉcàr tɛ Tata vʉ̂. 6Wèe fa bu' ka'. Yuu yi ka' buu wèe, wèe loo yi ese Nyʉ̀ ker yoŋshi ye àtu mo. 7Wèe à ka' gee wa'a, Nyʉ̀ fa wèe rfʉtè ce li càa bfee ŋwɛ̀, ba rfʉtè ce li be ba njep wěe mntee ba njep wěe mkwà'shì njobè' wèe yu àbee wèe Jisos Krǎis wèe. 8Banɛ à rmìsì, bfʉr wâ, wèe ce kwa'shi àmbò buu wɛɛwɛ ce vi yu bbòŋboŋ, a ghɛɛte à buu ce àde' bèe a nɛsì. Buu anà yu buu ce vi yu mini, buu ce vi yu nè fòo-ŋwɛ̀, ce vi yu kùyɛɛ a ba brara, buu ce àde' bèe a kôŋ, buu ce vi ce kè' bbòŋboŋ. 9Gèe nè buu wɛɛwɛ ce wèe à yɛ'ni ese mɛ̀, a koo ese mɛ̀, a yu' ese mɛ̀, a ker yɛ ese mɛ̀ tɛ Nyʉ̀ ce e yu ŋwɛ̀ cumʉnyaŋ bo ba wèe wowèe.

10M ce lu'shi magòr àmbò ŋwɛ̀ Tatâ, njobè' mɛ̀ yɛ enɛ wèe à ker kuushi a ja' mɛ̀ àmbò wèe à m ce jà' entòmbì nà. Wèe à m ku ce ne kuushi mɛ̀, a ka' buu ba njì à rjà' mɛ̀. 11Ke' ba enɛ m ce làa njobè' yuu mo' yi buu mɛ̀ ka'; mɛ̀ lɛɛte à rcu, mʉ yì ce mɛ̀ tʉr yi ghɛɛtè mɛ̀. 12Mɛ̀ rìŋ yuu ce m gee à nfè' ce buu vi gha' mɛ̀, a riŋ yuu ce m gee à nfè' ce mɛ̀ tʉr buu gòr. Mɛ̀ lɛɛte à buu anà wɛɛwɛ, a tami nyor, ka' à se'kɛ, kɛ̀ mɛ̀ ye ɛ̀, kɛ̀ mɛ̀ ye ka' ɛ̀; kɛ̀ mɛ̀ tʉr ɛ̀, kɛ̀ mɛ̀ tʉr ka' ɛ̀! 13Àde' m gee buu wɛɛwɛ, ce ŋwɛ̀ ce e ke fa mɛ̀ ŋger à ka' tɛɛ mbe mɛ̌ njì. 14Mɛ̀ ka' laa àmbò mɛ̀ làa na, m ku riŋ mɛnɛ wèe à gèe yɛɛnì sê, à rjà' mɛ̀ sè'ni ce m yu à ŋgɛ' na. 15Wèe ce běe à rla' Filèpâi, wèe ku riŋ yɛɛnì enɛ à m ba à nfè' ce mɛ̀ m nàtǐ à ŋgǒŋ Mɛ̀sɛ̀donìyà a kɛ' a ce fè'shi Nsuŋ Mbòŋmboŋ nà, cor mò' à m ker ba ce wèr wowèe à m ce tarte mmbo ker caa efa wèe ka'. 16Kɛ̌' à nfè' ce mɛ̀ m ba à rla' Tɛ̀sàlonikà wèe à m tuusi buu a ja' mɛ̀ àgho bkàŋ àŋgoo. 17Yu ba buu ce wèe à m tuusi ce m ce lòr à yuu gòr ka'. Yuu ce m ce lòr à yuu gòr yu ba ku' sɛ' ce wèe be tʉr njo' buu anà. 18M ker buu yuu sè'ni ka', m tʉr buu vi ce gha' mɛ̀ gha'. M tʉr buu wɛɛwɛ sè'ni njobè' mɛ̀ koo buu ce wèe a m tuusi nè mɛ̀ mbe bo Ɛ̀pafròditòs. Buu anà yu àmbò njɛ̀ɛ yuu mo' ce yi ce rʉ̀ʉ bòŋboŋ, a ba àmbò taŋshì ce Nyʉ̀ à kòŋ, a byemi. 19Nyʉ̀ ce e tʉr ku' buu bbòŋboŋ be fa wèe buu wɛɛwɛ ce wèe buu. E be càasi buu anà mbe bo Jisos Krâis. 20Bkù'sì vi ba nè Nyʉ̀ ce yìsèe ta sè'ni ba à nfè' sìp. Yi yu wa'a.

21Cà'ni nè ŋwɛ̀ wɛɛwɛ ce e yu àbee a Jisos Krâis. Bfʉr ce a yu wèr wowèe àfa a cà'ni wèe. 22Bèe Nyʉ̀ ce àfa wɛɛwɛ a cà'ni wèe, laŋlaŋ bèe ce a ce fà' mbe ndàp Sisà. 23M ce loo mɛnɛ Tata Jisos Krǎis tʉr wèe à ntee bòŋboŋ.

Currently Selected:

Ñwaè' Fileèpaêi 4: LNT

Highlight

Copy

Compare