Ñwaè' Koèlosïì 1

1Ŋwà' ca ce saŋ mɛ̌ Pol ce Nyʉ̀ à ce mɛ̀ enɛ m ba ŋwɛ̀ ntuu nè Jisos Krâis. M ce saŋ ŋwà' ca wèr Timotì ce e yu nfʉr yìsèe. 2Wèr ce saŋ nè wèe ce wèe yu bèe ce Nyʉ̀ à ce, a ce cu à rla' Kòlosì, wèe Jisòs wèe à ba àbee, wèe à ce dù a yě mbùu nè ntee mo'sir. Wèr ce loo nè Nyʉ̀ ce e yu yèr ta enɛ e tʉr wèe à ntee bòŋboŋ, ker fa wèe cumʉnyaŋ.

3E ke ba à nfè' wɛɛwɛ ce wèr ce loo nè wèe, wèr ce yòŋshi Nyʉ̀ ce e yu Tàr nè yìsèe Tata Jisos Krâis, 4njobè' wèr à yu' enɛ wèe à lɛ̀ ntee nè Jisos Krâis, a ker koŋ bèe Nyʉ̀ wɛɛwɛ. 5Wèr à rìŋ enɛ wèe à tʉr njɛ̀ɛ ntee ca njobè' wèe ce kè' ba buu ce Nyʉ̀ à kupshi a lɛ nè wèe mbe bùu. À m ba njobè' nsuŋ mbòŋmboŋ ce e yu mini ce a m fè'shi, wèe à ka' riŋ àmbò buu ca. 6Nsuŋ anà à bà' à bdì' wɛɛwɛ enjep ŋgòŋ na. E gèe bèe a ce kupse yap ŋgěe bebep a ce gèe ba ŋgěe bòŋboŋ. Bèe magòr se a ce byemi nsuŋ ca. Nsuŋ ca à gèe wèe à ce gèe ŋgěe bòŋboŋ foŋ kɛ̌' à nòŋ ce wèe à m kɛ̀' yu', a riŋ nè mini-ŋwɛ̀ enɛ Nyʉ̀ tʉr ntee bòŋboŋ nè běe bbebep. 7Wèe à m yu' nsuŋ mbòŋmboŋ anà ese Ɛ̀pafràs ce e yu ŋwɛ̀ rfà' nè Jisos Krǎis àmbò wèr. Wèr kòŋ ye sê. E yu wèe wowèe wa'a, a tɛɛ ba a wěr tù, a ce fà' nè Jisos Krǎis nè ntěe mo'sir. 8E suŋ wèr àmbò njɛ̀ɛ njì ce wèe kòŋ bèe nè rkòŋnì ce li lò ese Yʉ' Nyʉ̀.

9A mbùu ce kɛ̌' à nòŋ ce wèr à m yu' buu ca, wèr à be borni efa rloo nè wèe à nfè' mò' ka'. Wèr ce loo nè Nyʉ̀ enɛ e gee tɛ wèe koni bfee ce vi lò ese yi Yʉ', rìŋ buu ce yu vi wɛɛwɛ, tɛ wèe bo rìŋ buu ce e kòŋ bòŋboŋ. 10Wèe à ka' riŋ wa'a, banɛ wèe be tʉr ndèe ce bèe Tata Jisòs a ba tʉr, gèe ŋgěe bòŋboŋ à mnduunjì jɛɛ jɛ̀ɛ jɛɛ, kèr rìŋ buu ce yu vi Nyʉ̀ gòr. 11Wèr ce loo foŋ enɛ Nyʉ̀ lor yi ŋger ce yi càa buu wɛɛwɛ gee tɛ wèe tʉr ntee tatap, ka' à ka' ba ba kɛ, tɛ wèe bo kur ntee, tɛɛ tatap kèr ce lu'shi, 12ce yoŋshi Nyʉ̀ Tàr ce e yu yìsèe ta à nfè' wɛɛwɛ. Yu ye ce e gèe wèe à ghɛɛtè à rkoni ŋgʉ̀' mò' efa buu ce e kupshi a lɛ nè yì bèe mbe dǐ' kʉʉ ce yu dǐ' rraa. 13E fʉr sèe efa tʉ̀'njì, a lor sèe a lɛ ba à dì' ce muu yì ce e kòŋ se nà ce sa' àmbò ŋkʉʉ. 14Muu yì anà a ŋwɛ̀ ce e gèe Nyʉ̀ à foosì yìsèe buu bbebep, a tee sèe efa ŋgɛ'.

15Ŋwɛ̀ mò' à m be yɛ Nyʉ̀ nè mmir ka'. Muu yì ce bèe a yɛ nè mmir, a ŋwɛ̀ ce e gèe sèe à riŋ njɛ̀ɛ ŋwɛ̀ ce Nyʉ̀ yu. E yu entòmbì nè buu wɛɛwɛ ce Nyʉ̀ à m gèe. 16Nyʉ̀ à m gèe buu wɛɛwɛ njì enjep ye, kɛ̀ yu buu embe bùu ɛ̀, kɛ̀ yu vì enjep ŋgòŋ ɛ̀, kɛ̀ yu buu ce àde' bèe a yɛ ɛ̀, kɛ̀ yu buu ce àde' bèe a yɛ ka' ɛ̀, buu ca wɛɛwɛ yu àgho njo' Jisos Krâis. Ka' byʉ' njɛ̀ɛ jɛɛ jɛ̀ɛ jɛɛ ce vi tʉr ŋger ɛ̀, Nyʉ̀ à m gèe buu ca wɛɛwɛ nè muu yì, njì enjep muu yì anà. 17À m ba à nfè' ce yuu mo' yi m be ba ka', muu anà à ku ba. Buu wɛɛwɛ yu àmbò vi ba ba njo' ye. 18E yu tu nè côr. Cor anà à ba yì nyor. Ŋwɛ̀ ce e m kɛ̀' cor à m kɛ̀' ye njobè' e m ba ŋwɛ̀ entombì à rfʉʉ efa rkwe nè nyor ce àde' e ker kwe ka'. Buu ca yu wa'a tɛ e bo ba ŋwɛ̀ ce e tɛɛ kùntombì nè buu wɛɛwɛ. 19Nyʉ̀ à m gèe enɛ buu ca ba wa'a njobè' e m kòŋ enɛ muu yì ba yɛɛnì àmbò ye ye yu nà à buu wɛɛwɛ. 20E m kòŋ enɛ buu wɛɛwɛ ce e m gèe kɛ̀ yu vì embe bùu ɛ̀, kɛ̀ yu vì enjep ŋgòŋ ɛ̀, a kʉti àbee njì enjep muu yì. À ka' ba njo' rkwe ce muu yì anà à m kwe mbe kìntaa, Nyʉ̀ à gee buu enjep ŋgòŋ ba vì embe bùu, vi kʉtì bkar a ye, a cu nè rfʉtè-ŋwɛ̀.

21À m ba à nfè' mò' wèe à ba ànjìsàp ese Nyʉ̀, a ba ŋgǎa bbàa nè ye, njobè' wèe à m ce kwà'shi buu bbebep, a ce gèe buu bbebep. 22À ka' ba à nfè' e sè'ni Nyʉ̀ à gee wèe wowèe à kʉtì bkar njo' rkwe ce muu yì ce e m ba ŋwɛ̀ à m kwe a sěe tù nà. Nyʉ̀ à m gèe wa'a, tɛ e bo tɛr wèe a yě bsii àmbò yì bèe ce a yu brara, a tʉr fàa ka'. 23Wèe be tɛɛ à bsii Nyʉ̀ wa'a, ce wèe ka' ku lɛ ntee nè Jisos krǎis à nfè' wɛɛwɛ, tɛɛ tatap kè' ce cì'ti ka', kù ce kè' ba buu ce bèe ce a m fè'shi Nsuŋ Mbòŋmboŋ ca nè wèe a m suŋ wèe enɛ wèe be koni nà. Nsuŋ Mbòŋmboŋ ca yu ba nsuŋ ce a fè'shi nè bèe wɛɛwɛ enjep ŋgòŋ na. Rfà' ce mɛ mɛ̌ Pol ce gèe foŋ li yu enɛ m suŋ Nsuŋ Mbòŋmboŋ ca nè bèe.

24Àmbò m ce yɛ ŋgɛ' a wěe btù sè'ni na, m ce lu'shi. M ce yɛ ŋgɛ' àmbò Jisos Krǎis à m yɛ àtu cor ce e yu yì nyor nà. M ce yɛ ŋgɛ' ca wa'a, ryaŋ ce m ce yu' li ce mìsi ŋgɛ' ce Jisòs à m yɛ, e bɛtì nà. 25La rfà' li yu enɛ m fa' nè côr. Nyʉ̀ a ŋwɛ̀ ce e fa rfà' ca mba mɛ̌ mmbò tɛ m bo jà' wèe. Yu ya dì' enɛ m gee tɛ bèe a riŋ Nsuŋ Nyʉ̀ bòŋboŋ. 26A m sʉ̀ti nsuŋ anà ese bèe wɛɛwɛ. À ka' ba à nfè' e sè'ni, Nyʉ̀ à gee yì bèe a rîŋ. 27Nyʉ̀ à m kòŋ enɛ e gee tɛ yì bèe a yɛ enɛ rbòŋ efa nsuŋ ce e càa buu wɛɛwɛ na li yu nè bèe enje jɛɛ foŋ. Nsuŋ ce e gèe sèe à riŋ na yu enɛ Jisos Krǎis yu njep wěe mntee, yi ka' ba wa'a, wèe à riŋ enɛ wèe be koni ŋgʉ̀' mò' efa fòo Nyʉ̀. 28Wèr ce suŋ ŋwɛ̀ wɛɛwɛ àmbò Jisòs ca. Wèr ce bɛɛ ŋwɛ̀ wɛɛwɛ, a ker ce lòr bfee ce Nyʉ̀ à fa wèr a ce yɛ'ni bèe àmbò Jisos Krǎis tɛ ŋwɛ̀ wɛɛwɛ ce e yu àbee a Jisòs bo ba àmbò Nyʉ̀ ce kòŋ enɛ e ba ba. 29A mbùu ce m ce ghèter, a ce fà' nè ŋger wɛɛwɛ ce Jisos Krǎis à fa mɛ̀ tɛ m bo mìsi li rfà' àgho.

Currently Selected:

Ñwaè' Koèlosïì 1: LNT

Highlight

Copy

Compare