Ñwaè' Fileèpaêi 3

1Banɛ à rmìsì, bfʉr wâ, wèe lu'shi njobè' wèe yu wèe Tata wèe. Yi gèe mnsa' nè mɛ̀ à ker saŋ buu ca nè wèe ka'. Buu anà be jà' wèe tɛ wèe ke' bo lɛ'ti ka'. 2Lòr nè nfè' wèe bèe ce a yu àmbò ŋgwe. Lòr nè nfè' wèe běe bbebep ca wèe. Wèe lor nfè' wèe wowèe ce a ce yɛ'ni enɛ ŋwɛ̀ wɛɛwɛ tʉr à rgèe bʉ̀ ka' ba ŋwɛ̀ Nyʉ̀ nà. 3Yu ba sèe ce sèe à gèe bʉ̀ ce mini, njobè' sèe ce loo nè Nyʉ̀ àmbò Yʉ' Rara yi ce ròo, a ce lu'shi à rcu ce sèe Jisòs wèe ce cu, a ke' ce lɛ̀ yisèe ntee à buu ce à nyòr ka'. 4Mɛ̀ ba ce kòŋ à rlɛ̀ ntee à buu ce à nyòr, mɛ̀ ba lɛ̀. Ŋwɛ̀ mò' ka' ce kwà' enɛ e tʉr yuu ce àde' yi gee enɛ e lɛ ntee à njɛ̀ɛ buu anà, m tʉr buu anà a caa ye. 5A m bi mɛ̀ à ŋwɛ̀ Isrɛ̀l mbe ntɛ̀' Bɛnjamɛ̀n, yà ta ba yà ma a ba bèe Hibrùs ce mini, mɛ̀ ka' bà' ŋgàa mò'sir, a gee mɛ̀ bʉ̀. À ka' ba àmbò mncir ce a lɛ̀, mɛ̀ m ba ŋwɛ̀ Farìsî. 6À ka' ba àmbò buu Nyʉ̀ ce Jus a byemi àgho, mɛ̀ m fà' nè ya ntee wɛɛwɛ à rfa ŋgɛ' nè ŋgǎa côr. Banɛ àmbò mncir Jus anà vi yu, mɛ̀ m bʉ' mo' ka'. 7Kɛ̀ yu ba njɛ̀ɛ sɛ' kɛ ce mɛ̀ m tʉr enjep mʉ̀ buu anà ɛ̀, mɛ̀ yɛ sè'ni mɛnɛ buu anà wɛɛwɛ vi m ce bʉsi mɛ̀ bʉsi, a ma'shi vi wɛɛwɛ tɛ m bo dù ba àmbùu Jisos Krâis. 8À ke' ku ba cena cà' ka', mɛ̀ lòr buu wɛɛwɛ à buu ce vi ce bʉsi mɛ̀ bʉsi, a ma' vi wɛɛwɛ tɛ m bo yi yà Tata Jisos Krâis, njobè' yì anà a yuu ce yi yu gòr a caa buu wɛɛwɛ. Mɛ̀ bʉsi buu wɛɛwɛ njo' ye. Mɛ̀ lòr vi sè'ni à buu bcicì tɛ m bo ba àbee wèr Krâis, 9ba yì ŋwɛ̀, ba yɛɛnì njobè' mɛ̀ byemi nè ye, ke' ba njobè' mɛ̀ lɛ̀ mncir ka'. Yu Nyʉ̀ ce e ke gèe ŋwɛ̀ ba yɛɛnì njo' e byemi. 10Yuu mo'sir ce m ce ròo yi yu enɛ m riŋ Krâis, ker yɛ yi ŋger ce e m tʉr à nfè' ce e m fʉʉ efa rkwe. M ce ròo foŋ mɛnɛ m yɛ ŋgɛ' àmbò e m yɛ, byemi rkwe àmbò e m byemi, 11tɛ yi ka' ba àtɛ̀r Nyʉ̀ bo fʉr mɛ̀ efa rkwe, fa mɛ̀ ryòŋ ce nfesè.

12Yi yu ba enɛ mɛ̀ koni yuu ce mɛ̀ ce ròo à rkonì nà ka', a ke' ba enɛ mɛ̀ buu fàa dʉ̀dʉ̀ ka'. M ku bii ghèter ce dù kùntombì mɛnɛ m bo koni yuu anà, ce yu yuu ce Jisos Krǎis à koo mɛ̀ mba yě bò àtu mo. 13Bfʉr wâ, m ce kwà' mɛnɛ mɛ̀ be koni yuu anà ka', yuu mo'sir yi yu enɛ mɛ̀ mà'shi buu ce vi m càa, a ce dù ba àmbùu yuu ce yi bii kùntombì. 14M ce fà' ce dù kùntombì mɛnɛ m bo dù koni blà' embe bùu ce Nyʉ̀ à kɛ' mɛ̀ enɛ e bo fa mɛ̀ njo' yuu ce Jisos Krǎis à m gèe. 15Yi bòŋ enɛ sèe ce sèe yu bleebèe à buu Nyʉ̀ sèe tʉr njɛ̀ɛ mkwà'shì ca. Yuu mo' yi ka' ba àgho ce wèe ce kwà'shi jɛɛ banɛ Nyʉ̀ be nàshi yuu anà nè wèe. 16Yi ba enɛ sèe ku ce jɛr sè'ni ba njep mkùu ce sèe ce jɛ̀shi njo na. 17Bfʉr wâ, wèe wɛɛwɛ ce be'ni ba yuu ce m ce gèe. Wèr à dùŋshi nděe mbòŋmboŋ. Wèe be'ni yuu ce bèe ce a bè'ni yèr ndèe anà, a ce gèe. 18Mɛ̀ suŋ wèe nfè' àŋgoo, a ker ce suŋ wèe sè'ni nè mŋgoommir-ŋwɛ̀ mɛnɛ bèe magòr a yu a wěe mʉ ce yàp ndèe ce dùŋshi enɛ wowèe a bàa rkwe ce Jisos Krǎis à m kwe mbe kìntaa nà. 19Wowèe a be kwe, bʉ njobè' wowèe a kòŋ buu ce à nyòr a caa Nyʉ̀. A lòr yuu ce rìtu yi ba koo wowèe àtu mo a beesi à yuu nàatu, a lɛ yap ntee wɛɛwɛ ba njep buu embe tunshe. 20À ka' ba àmbò sèe, lisèe rla' li yu ba mbe bùu mbe dì' ce sèe ce kè' seenɛ yìsèe Tata Jisos Krǎis be vʉ̀ embo, gèe tɛ sèe lûŋ. 21E be vʉ̀ bèesi bjàprì nyor visèe ca tɛ vi ba àmbò ku' yì nyor mbòŋmboŋ ce e m tʉr à nfè' ce e m fʉʉ efa rkwe nà. Ŋger ce e be gèe yuu ca àgho ku ba ŋger ce àde' e lôr, beesi buu wɛɛwɛ ce à ŋgòŋ na tɛ vi ba njep yě tìi.

Currently Selected:

Ñwaè' Fileèpaêi 3: LNT

Highlight

Copy

Compare