Ñwaè' Hibruès 6

1Banɛ sèe yɛ'ni riŋ buu btatap ce vi yu àmbò Jisos Krǎis tɛ sèe bo ba bleebèe à buu Nyʉ̀. Sèe fa kù cu ba à ryɛ'nì ce a m kɛ̀' a yɛ'ni sèe nà ka'. Sèe à yɛ'ni a riŋ wɛɛ enɛ bèe a ba kupse, borni efa rgèe buu ce àde' vi vʉ nè rkwe, byemi ba nè Nyʉ̀. 2Sèe à yɛ'ni àmbò bàptîr, ker ba àmbò a ke la' bèe mmbo mbe tù, a ker yɛ'ni àmbò Nyʉ̀ be kè fʉr bèe efa rkwe, a yɛ'ni àmbò mnsa' ce a be kè sa', teni nfesè. 3Banɛ Nyʉ̀ à ka' byemi, sèe yɛ'nì buu mo' bfi. 4Bèe a ka' riŋ njɛ̀ɛ ŋwɛ̀ ce Nyʉ̀ yu, lo beesi njì nè ye, njì mò' ker ba àgho ce àde' ŋwɛ̀ gêe, wowèe a beesì yap ntee à nfè' mò' ka'. Wowèe a m yɛ rraa ce li m lò ese Nyʉ̀, a riŋ bghònì ce Nyʉ̀ à fa wowèe, a koni Yʉ' Rara njep wǎp mntee. 5A yu'shi blǎa Nyʉ̀, a riŋ enɛ vi ke lèe sê, a ker riŋ foŋ njɛ̀ɛ ŋger ce yi be ba à ŋgǒŋ fi ce yi bii ka' ba nà. 6Bèe a ka' riŋ buu Nyʉ̀ ca wa'a, beesi njì nè ye, banɛ njì mò' ker ba àgho ce àde' ŋwɛ̀ gêe, wowèe a beesì yap ntee à nfè' mò' ka', njobè' wowèe a ka' beesi njì wa'a, banɛ wowèe a ker taa Jisos Krǎis mbe kìntaa, a ker coosi ye à mʉ̀ bèe, a bɛ sɛ' efa li rkwe.

7Mbèŋ à ka' gwê, nshe nyoŋ mbèŋ anà, byee ce bèe a byè vi ku' ja' bèe anà banɛ Nyʉ̀ be ghòni nshe anà. 8Yuu ce yi ka' fʉʉ ku' mbe dì' anà à ka' ku ba ba ŋgʉʉ ba msini, banɛ nshe anà yu à cicì. Yi ka' ba wa'a, banɛ nfè' à ghɛɛ ce Nyʉ̀ be bepsi nshe anà tɛ a too nè mor.

9Bkar wâ, wèr ce bɛɛ wèe wa'a a ku riŋ wernɛ wèe ce jɛ̀r ba njep nduunjǐ yɛɛnì, a ce lùŋ. 10Nyʉ̀ e ke gèe buu à njǐ yɛɛnì. E be mà' wèe ka'. E be lèse rfà' ce wèe à gèe, kɛ̀ lèse njɛ̀ɛ rjà' ce wèe à m jà' yì bèe a ku bii jà' nà ka'. Wèe à m jà' wowèe njobè' wèe kòŋ Nyʉ̀. 11Wèr ce kòŋ wernɛ wèe wɛɛwɛ ku ce gee rfà' ca nè ye ntee-ŋwɛ̀ caar du ba' àlʉ̀simbùu, tɛ wèe bo koni buu ce wèe cu ce kè' nà. 12Wèr ce kòŋ enɛ wèe koosi bbor ka'. Wèr ce kòŋ enɛ wèe ba ba àmbò bèe ce a ce byemi yuu ce yi yu mini, a ke' ce bu' ka'. Wèe à ba ba wa'a njobè' njɛ̀ɛ bèe ca yu bèe ce a be koni buu ce Nyʉ̀ à kà' nè yì bèe.

13À m ba à nfè' ce Nyʉ̀ à m gèe mkà'ni nè Abràham nà, ŋwɛ̀ mò' à m ker ba ce e càa ye ce Nyʉ̀ ka'. À ka' ba wa'a, e kaa ba à li rlii enɛ e be gèe yuu ce e làa. 14E m làa enɛ̂, “Rbuu ba nshe a ka' ba ce tarte, m buu efa rghòni wɛ̀ kèr gèe tɛ yò ŋgʉ̀ yaa ka'.” 15Abràham à ka' kur ntee, ce bu' ka', a koni buu ce Nyʉ̀ à m kà' enɛ e be fa nè ye nà. 16Sèe à rìŋ seenɛ bèe a ke kàa à rlii ŋwɛ̀ ce e càa wowèe. Bèe a ke kàa wa'a, yi ce gèe mntaŋshì vi ce mì efa mʉ̀ bèe. 17Nyʉ̀ ye ye à kòŋ enɛ bèe ce a be lò koni yuu ce e m kà' nè wowèe nà, a riŋ ghup enɛ e be kupse yuu ce e m làa ka'. A mbùu ce e m kàa à li rlii. 18Yi ka' ba wa'a, buu bbaa vi yu ce àde' vi kupsè ka' njobè' àde' Nyʉ̀ laa wa'a nya' ba mnde' ka'. Buu bbaa anà a buu ce vi ce fa sèe ŋger tɛ sèe ce sèe à caŋ a sʉni njeptii Nyʉ̀ sèe bo rìŋ nè mini-ŋwɛ̀ enɛ sèe be koni buu ce Nyʉ̀ à kà' nè sèe. 19Àmbò sèe à rìŋ seenɛ Nyʉ̀ e ke kupse mi mkà'ni ka' nà, àde' visèe mntee vi ker bu' ka'. Banɛ sèe à tii ndàŋ a niŋ mbe dǐ' rara embe Ndàp Nyʉ̀. 20Jisòs à dù a niŋ mbe dǐ' rara anà entombì nè sèe a tɛɛ mbo a sěe btù, a ba tu nè ŋgǎa taŋshi taŋshì nfesè àmbò Mɛ̀lkisidɛ̀k à m ba nà.

Currently Selected:

Ñwaè' Hibruès 6: LNT

Highlight

Copy

Compare