Ñwaè' Hibruès 5

1Sèe riŋ enɛ a ke ce tu nè ŋgǎa taŋshi taŋshì efa mʉ̀ bèe tɛ e bo tɛɛ àtu bèe kùntombì nè Nyʉ̀, koo buu ce bèe a fa nè Nyʉ̀, kèr taŋshi btaŋshì àtu yàp buu bbebep. 2À ka' ba njobè' e tʉr njɛ̀ɛ ntee ce àde' yi gee ye e gee yuu bebep, e riŋ foŋ yuu yɛɛnì ce àde' e gee nè bèe ce a ku ba ànji, a ce dà'. 3À ka' ba njobè' e tʉr njɛ̀ɛ ntee ca, banɛ e tʉr à rtaŋshi taŋshì àtu yì buu bebep àmbò e ke taŋshi àtu buu bbebep bèe mo' nà. 4Sèe rìŋ enɛ ŋwɛ̀ taŋshi taŋshì e ke ce yi tu tɛ bèe a bo ce yu'ni nè ye ka'. Nyʉ̀ a ŋwɛ̀ ce e ke ce ŋwɛ̀ taŋshi taŋshì àmbò e m ce Ɛròn nà. 5Jisos Krǎis ye ye à m ce yi tu à ŋwɛ̀ taŋshi taŋshǐ ŋgòr ka'. Nyʉ̀ a ŋwɛ̀ ce e m ce ye. E m ce ye wa'a, a laa enɛ̂,

“À yu muu wà, mɛ̀ ba yò ta kɛ' e ntìni na.”

6E ker laa mbe dì' mo' foŋ enɛ̂,

“Mɛ̀ ce wɛ̀ enɛ à ba ŋwɛ̀ taŋshi taŋshì à nfè' wɛɛwɛ

àmbò Mɛ̀lkisidɛ̀k à m ba nà.”

7Jisòs à m loo nè Nyʉ̀ à nfè' ce e m ba njep ŋgòŋ na. E m loo wa'a a ce warŋger a ce sùusi mŋgoommir. E m loo nè Nyʉ̀ njobè' Nyʉ̀ à m tʉr ŋger à rjà' ye efa rkwe. Nyʉ̀ à m yu' li rloo njobè' e m ce loo nè ryu'nì-ŋwɛ̀. 8Ka' e m ba muu Nyʉ̀ wa'a, e m rìŋ àmbò àde' e yu'nì nè Nyʉ̀ ba njo' ŋgɛ' ce e m lò a yɛ. 9Nyʉ̀ à m gèe ye e ba yɛɛnì sê, a ba sè'ni na ba ŋwɛ̀ ce e ce fa ryòŋ ce nfesè nè bèe ce a ce yu'ni nè ye. 10E m ghɛɛte à rgèe wa'a njobè' Nyʉ̀ à m kù'si ye à tu nè ŋgǎa taŋshi taŋshì àmbò Mɛ̀lkisidɛ̀k à m ba nà.

11Wèr tʉr buu magòr se à rlàa àmbò ŋwɛ̀ taŋshi taŋshì ca, geewa'a wèr à rìŋ àmbò àde' wèr nashì vi nè wèe ka' njobè' wèr ka' nashi wèe yu' ka'. 12Wèe à yɛ'ni a riŋ buu sê, nfè' à ka' ghɛɛ ce wèe à ba yɛ'ni bèe mo' foŋ, wèr à yɛ wernɛ ŋwɛ̀ mò' à ba kèr yɛ'ni wèe buu Nyʉ̀ ce wèe à m rìŋ efa rkɛ̀' nà. Wèe ku bii nyoŋ ba mmbee, ce wèe à ba ghɛɛte à rye ba buu. 13Ŋwɛ̀ ce e ka' ce nyoŋ ba mmbee, banɛ ŋgàŋ ku bii munte, a be lɛɛte à ryɛ'nì ce li yu àmbò àde' ŋwɛ̀ ba yɛɛnì à bsii Nyʉ̀ ka'. 14Ŋwɛ̀ ce àde' e ye yuu yu ba nleeŋwɛ̀. A ŋwɛ̀ ce e yɛ'ni, a lɛɛte a riŋ yuu bòŋboŋ ba yuu bebep.

Currently Selected:

Ñwaè' Hibruès 5: LNT

Highlight

Copy

Compare