Ñwaè' Hibruès 7

1Mɛ̀lkisidɛ̀k ca à m ba ŋkʉʉ à to' Salɛ̀m, a ba ŋwɛ̀ taŋshi taŋshì nè Nyʉ̀ embe bùu. À m ba à nfè' mò' Abràham à ka' dù mà' bìr a bkʉʉ mo', a so wowèe. A ka' ce kʉti, Mɛ̀lkisidɛ̀k à du a koni ye a ghoni ye. 2Abràham ye ye à lor buu ce e m koo à ŋkʉ̀ bìr a gap bdì' rʉ̂ʉ, a lor dǐ' mo'sir a fa nè Mɛ̀lkisidɛ̀k. Mbùu efa rlii Mɛ̀lkisidɛ̀k ca yu enɛ̂, “Ŋkʉʉ ce e ke gèe ŋgěe yɛɛnì.” Mbùu efa rlii yi to' yu enɛ̂, “Cumʉnyaŋ” Banɛ li rlii li yu foŋ enɛ̂, “Ŋkʉʉ cumʉnyaŋ” 3Ŋwɛ̀ mò' yu ce e rìŋ yì ma kɛ̀ yì ta ka'. A làa yuu mo' àmbò yi ràrà ka'. Sèe rìŋ nfè' a m bi ye kɛ̀ nfè' ce e m kwe ka'. E yu àmbò muu Nyʉ̀, e yu ŋwɛ̀ taŋshi taŋshì nfesè.

4Yɛ nè àmbò Mɛ̀lkisidɛ̀k à m ba ŋwɛ̌ ŋgòr. Abràham ce e m ba tàr běe à to' Isrɛ̀l à m lòr buu ce e m koo à ŋkʉ̀ bìr a gàp bdì' rʉ̂ʉ, a lor dǐ' mo'sir a fa nè Mɛ̀lkisidɛ̀k. 5À ka' ba àmbò ŋgǎa taŋshi taŋshì ce a yu ràrǎ Lɛvì nà, ncir yi byemi enɛ wowèe a koo dǐ' mo'sir efa bdì' rʉʉ efa buu jɛɛ jɛ̀ɛ jɛɛ ce běe à to' Isrɛ̀l a tʉr. Yuu ce sèe rìŋ yi yuu enɛ wowèe a ce koo buu ca ba ese bfʉr wap, ka' wowèe wɛɛwɛ a yu ŋgʉ̀ Abràham wa'a. 6Ka' Mɛ̀lkisidɛ̀k à m ba ràrǎ Lɛvì ka' wa'a, e m koni buu ese Abràham ce e yu ŋwɛ̀ ce Nyʉ̀ à m kà' buu nè ye, a ghoni ye. 7Àde' ŋwɛ̀ sɛnì enɛ ŋwɛ̀ ce e ke ghòni ŋwɛ̀, yu ŋwɛ̌ ŋgòr a caa ŋwɛ̀ ce e ghòni nà ka'. 8Ŋgǎa taŋshi taŋshì ce a yu ràrǎ Lɛvì ce bèe a ke fa wowèe dǐ' mo'sir efa buu ce wowèe a tʉr nà, a ke lò kweŋger. À ka' ba yi àmbò Mɛ̀lkisidɛ̀k, Ŋwǎ' Nyʉ̀ yi làa enɛ e ku cu ntèe. 9À m ba à nfè' Abràham à m gàp buu bdì' rʉ̂ʉ, lor dǐ' mo'sir a fa nè Mɛ̀lkisidɛ̀k nà, yi m ba àmbò Lɛvì ce boo vi a ke koo dǐ' mo'sir efa buu rʉʉ nà à m lɛ fa foŋ wa'a. 10Àde' sèe laa wa'a njobè' Mɛ̀lkisidɛ̀k à m dù à rkoni Abràham ce e m ba tarkʉ Lɛvì, a be bi Lɛvì ka'.

11À m ba à nfè' ce Nyʉ̀ à m gèe ràrǎ Lɛvì a ba ŋgǎa taŋshi taŋshì nà, e m fa mncir nè běe à to' Isrɛ̀l tɛ a bo rìŋ à rloo nè ye. Rfà' ŋgǎa taŋshi taŋshì ca li m ka' ba ghɛɛte à rgèe tɛ bèe a ba byɛɛnì à bsii Nyʉ̀, mbùu mò' à m ba kèr ba enɛ sèe tʉr ŋwɛ̀ taŋshi taŋshì mò' ce e yu ba àmbò Mɛ̀lkisidɛ̀k ce e yu jɛɛ efa Ɛròn nà ka'. 12Yi yu rara enɛ ŋwɛ̀ taŋshi taŋshì mò' ka vʉ̂, ce gèe taŋshì yi à njɛ̌ɛ jɛɛ, banɛ mncir vi be kupse foŋ. 13À ka' ba àmbò Tata Jisòs ce sèe ce làa àmbò ye na, e m ba yi ba ràrǎ jɛɛ. Ŋwɛ̀ ce e yu ràrà anà à m be fa' à ŋwɛ̀ taŋshi taŋshì ka'. 14Sèe rìŋ enɛ e m ba yi ba ràrǎ Judà. Musìs à m làa yuu mo' a kuu ràrà ca à nfè' ce e m ce làa àmbò ŋgǎa taŋshi taŋshì ka'.

15Yuu ce yi gèe yuu sèe ce làa àmbò ŋgǎa taŋshi taŋshì na yi ba rara sê, yi yu enɛ ŋwɛ̀ taŋshi taŋshì mò' à vʉ̀ a ba yi ba àmbò Mɛ̀lkisidɛ̀k. 16E yu ŋwɛ̀ taŋshi taŋshì, a ke' ba ba àmbò ncir kuu ràrà ŋwɛ̀ taŋshi taŋshì yi ce làa ka'. E yu ŋwɛ̀ taŋshi taŋshì njobè' e tʉr ryòŋ ce nfesè. Ku ba ŋger efa ryòŋ anà ce e gèe e ba ŋwɛ̀ taŋshi taŋshì. 17Sèe à rìŋ wa'a njobè' a saŋ mbe Ŋwǎ' Nyʉ̀ enɛ̂, “Mɛ̀ ce wɛ̀ enɛ à ba ŋwɛ̀ taŋshi taŋshì à nfè' wɛɛwɛ àmbò Mɛ̀lkisidɛ̀k à m ba nà.” 18Banɛ a m mà' mncir ce vi m ba entombì njobè' vi m tʉr ŋger à rjà' bèe ka'. 19Vi m tʉr ŋger à rgèe ŋwɛ̀ tɛ e ba yɛɛnì à bsii Nyʉ̀ ka'. Yuu ce sèe ce làa àgho sè'ni yi yu àndèe njobè' a yuu ce àde' yi vʉ nè sèe àgee Nyʉ̀. 20Yi yu foŋ enɛ à m ba à nfè' Nyʉ̀ à m làa enɛ e be gèe Jisòs à ŋwɛ̀ taŋshi taŋshì nfesè nà, a kâa. À ka' ba à nfè' e m gèe ràrǎ Lɛvì à ŋgǎa taŋshi taŋshì nà, e kaa ka'. 21Nyʉ̀ à m ka' gèe Jisòs à ŋwɛ̀ taŋshi taŋshì, a kâa, a laa nè ye enɛ̂,

“Mɛ̌ Tàr, mɛ̀ kàa enɛ à be ba ŋwɛ̀ taŋshi taŋshì nfesè.

Àde' ya nlàa ca yi kupsè ka'”

22Cena yi yu enɛ Jisòs yu ŋwɛ̀ ce e gèe lè' ce Nyʉ̀ à ye sèe wowèe nà yi tap a caa lě' rʉ̀ʉ.

23Yi yu foŋ enɛ ŋgǎa taŋshi taŋshì ce à m ba ràrǎ Lɛvì nà a m ba àŋgoo njobè' à m ba bèe ce a be lò kweŋger, tɛ lap rfà' li mì. 24Jisòs yu yi ba ŋwɛ̀ ce e cu ntèe nfesè, àde' e ke buu efa rba ŋwɛ̀ taŋshi taŋshì à nfè' mò' ka'. 25A mbùu ce e tʉr ŋger à rgèe tɛ bèe ce a vʉ̀ kùntombì nè Nyʉ̀ à li rlii a luŋ dʉ̀dʉ̀ njobè' e cu ntèe nfesè a ce loo a sěe btù.

26Banɛ Jisòs a tu nè ŋgǎa taŋshi taŋshì ce e ghɛɛte nè sèe. E ghɛɛte njobè' e yu ŋwɛ̌ nrara a ce kwà'shi kɛ̀ a ce gèe fàa ka', a ba yi jɛɛ efa bèe ce a ke gèe buu bbebep, Nyʉ̀ à naa ye mbekì. 27Btu nè ŋgǎa taŋshi taŋshì ca a m ce taŋshi à mnòŋ wɛɛwɛ. Wowèe a m ce kɛ̀' be taŋshi àtu yàp buu bbebep wɛɛ, ka' taŋshi àtu buu bbebep bèe. Jisòs à m taŋshi taŋshì yi ba à njɛ̌ɛ wa' ka'. E m taŋshi yi nfè' mò'sir yi ku mi wa'a. E m taŋshi taŋshì anà ba à nfè' ce e m fa yì nyor, a kwe a sěe btù nà. 28Ncir Musìs yi byemi enɛ ŋwɛ̀ ce àde' e gee fàa ba à tu nè ŋgǎa taŋshi taŋshì. À ka' ba yi àmbò lè' ce Nyʉ̀ a m ye, ce yi lor dì' mncir nà, e m ce ba muu yì à ŋwɛ̀ taŋshi taŋshì. E m gèe ye e ba yɛɛnì nfesè.

Currently Selected:

Ñwaè' Hibruès 7: LNT

Highlight

Copy

Compare