Ñwaè' Hibruès 4

1Nyʉ̀ ku bii kà' enɛ àde' sèe vʉ mbe yǐ dǐ' rlʉ̀shì foŋ. Banɛ sèe lor nfè' fà dì' mò' efa sèe lo buu efa rbà' à dǐ' rlʉ̀shì anà ka'. 2Wèr à yu' blǎa Nyʉ̀ ce a fè'shi nè wèr àmbò wowèe foŋ a m yu' nà. Wèr à yɛ wernɛ blǎa Nyʉ̀ ce a m yu' anà vi m tʉr sɛ' nè wowèe ka' njobè' wowèe a m yu' wa'a, a byemi ka'. 3Bèe ce a be bà' mbe dì' ce Nyʉ̀ e ke lʉ̀shi anà, lʉ̀shi mbo foŋ, yu ba sèe ce sèe à yu' blǎa Nyʉ̀ a byemi. À ka' ba yi àmbò bèe ce a m yu' blǎa Nyʉ̀ a byemi ka' nà, Nyʉ̀ à saŋ mbe yě ŋwà' enɛ̂,

“Ntee yi m bep mɛ̀ nè wowèe,

mɛ̀ ka' mɛnɛ

àde' wowèe a vʉ ba' mbe ya dǐ' rlʉ̀shì tɛ a bo lʉ̀shi ka'.”

Yi yu enɛ dǐ' rlʉ̀shì yi m buu ka', njobè' e m ce làa wa'a, e m banì gee ŋgòŋ wɛɛ a lʉshi yi yu. 4A saŋ mbe dì' mo' embe Ŋwǎ' Nyʉ̀ àmbò nòŋ ce Nyʉ̀ à m mìsi li rfà', enɛ̂, “Nyʉ̀ à m gèe li rfà' à mnòŋ ntuunfu a misî, tʉ̀' à ka' raa ce enɛ a mnòŋ sàambâ, e lʉshì.” 5Ka' dǐ' rlʉ̀shì anà yi m ba àgho wɛɛ wa'a, Nyʉ̀ à ku ker laa enɛ̂, “Àde' wowèe a ba' mbe ya dǐ' rlʉ̀shì tɛ a bo lʉ̀shi ka'.” 6Ka' yi yu rara enɛ bèe mo' a be bà' à dǐ' rlʉ̀shì anà wa'a, yi ku ba rara foŋ enɛ bèe ce a m yu' blǎa Nyʉ̀ a byemi ka' nà, a m bà' à dǐ' rlʉ̀shì anà ka'. 7Yi ka' ba wa'a, Nyʉ̀ à lɛ nfè' mò' ce bèe a be lʉ̀shi ce yu nfè' e sè'ni na. Bfè' vi ka' càa àŋgoo sê, Nyʉ̀ à laa njì enjep Dɛvìd. E m ku laa ba blàa ce wèr à saŋ nè wèe wɛɛ nà. E m làa enɛ̂,

“Wɛ̀ ka' yu' njèndoŋ Nyʉ̀ ntìni na,

à fa tèe tu ka'.”

8Sèe rìŋ wɛɛ enɛ Joshùwà à m lòr visèe btarkʉ a du àgho à to' Kɛnàn. To' Kɛnàn anà à m ba ba dǐ' rlʉ̀shì anà, Nyʉ̀ à m ba ker laa àmbò nfè' rlʉ̀shì ce e bii ka' ba ka'. 9Yi yu rara enɛ nfè' rlʉ̀shì ce bèe Nyʉ̀ a be lʉ̀shi nà bii ka' ba. Nfè' anà be kè ba àmbò nòŋ ce Nyʉ̀ à m gèe li rfà' a ka' mìsi wɛɛ a lʉshi nà. 10Ŋwɛ̀ à ka' bà' mbe dǐ' rlʉ̀shì ca lʉshi mbo, banɛ ŋgàŋ be kèr fà' ka', àmbò Nyʉ̀ ye ye à m mìsi li rfà' a lʉshî, a ker fa' ka' nà.

11Banɛ sèe gheter ba' mbe dǐ' rlʉ̀shì anà. Ŋwɛ̀ fa ba ce e be buu efa rbà' à dì' anà njobè' e tèe tu àmbò visèe bta a m tèe nà ka'. 12Blǎa Nyʉ̀ vi yu btèe, a tʉr ŋger, vi cɛp a caa sa' mbyɛ̀rɛŋ. Vi lò niŋ njep ntee ŋwɛ̀ ker niŋ njep mi mkwà'shì caa àmbò sà' mbyɛ̀rɛŋ e ke niŋ nje yuu nà. Blǎa Nyʉ̀ ca vi ke gèe buu ce ŋwɛ̀ ce kwà'shi njep yě ntee vi yɛɛtì àwaŋ. 13Yuu mo' yi yu efa buu ce Nyʉ̀ à m gèe ce àde' Nyʉ̀ buu efa ryɛ ka'. Buu wɛɛwɛ vi yu àwaŋ à bsii Nyʉ̀ ce e yu ŋwɛ̀ ce sèe be kè tɛɛ kùntombì nè ye à nòŋ mo', suŋ buu wɛɛwɛ ce sèe à m gèe.

14Sèe tɛɛ tatap ba à buu mini ce sèe à yu' a byemi nà njobè' sèe tʉr tu nè ŋgǎa taŋshi taŋshì ce e yu ŋgòr, ce e cu mbe bùu a tɛɛ a sěe btù. Ŋwɛ̀ taŋshǐ ŋgòr ca yu Jisòs ce e yu muu Nyʉ̀. 15E yu ŋwɛ̀ ce e rìŋ buu ce vi yu btatap nè sèe, a ce koosimnse nè sèe njobè' ye ye ku ba àmbò sèe. Rmòoshì li m vʉ̀ nè ye foŋ à mnduunjì jɛɛ jɛ̀ɛ jɛɛ àmbò li ke vʉ̀ nè sèe, geewa'a e ke' gwe ka'. 16Banɛ vʉ̀ àgee kàbàrà' Nyʉ̀, ke' ce tarni ka', yɛ ntee bòŋboŋ ce e tʉr nè sèe, njobè' a mbe dì' ce Nyʉ̀ be koosimnse nè sèe, jà' sèe à nfè' ce yi yu enɛ e ba jà' sèe.

Currently Selected:

Ñwaè' Hibruès 4: LNT

Highlight

Copy

Compare