Ñwaè' Hibruès 2

1Àmbò sèe rìŋ buu ca wa'a, banɛ sèe à ba lòr blàa ce sèe à yu' àmbò ye na tatap sê, fà dì' sèe lo fʉʉ enjo ka'. 2Sèe à rìŋ seenɛ blàa ce bcìndap Nyʉ̀ a m suŋ nè visèe bta vi m tʉr ŋger sê. Ŋwɛ̀ ce e m ka' tee tu, yu'ni nè blàa anà ka', e m ku yɛ ŋgɛ' ce e m ba yɛ. 3Àmbò yi yu wa'a, sèe à ka' lor blàa ce vi yu àmbò rlùŋ ce li vʉ̀ ese Nyʉ̀ na àtɛ̀r, sèe gee seekɛ ka' fʉʉ efa ŋgɛ'. Tata Jisòs à m kɛ̀' a suŋ bèe blàa ca, bèe ce a m yu' blàa ca ese ye a gèe sèe à riŋ enɛ blàa anà vi yu mini. 4Nyʉ̀ à m gèe buu bbɛ̀ɛ, a duŋshi yi ŋger à mnduunjì jɛɛ jɛ̀ɛ jɛɛ, a ker lor ŋger ce yi ke vʉ̀ ese yi Yʉ' Rara, a gapshi nè bèe àmbò e m kòŋ, tɛ bèe a bo rìŋ foŋ enɛ blàa ca vi yu mini.

5Nyʉ̀ à m gèe enɛ ŋgòŋ mo' ce wèr à suŋ wèe enɛ yi be vʉ̀ nà, be sa' ba bcìndap Nyʉ̀ ka'. 6E m gèe ba àmbò a saŋ mbe dì' mo' embe Ŋwǎ' Nyʉ̀. A saŋ mbo enɛ̂,

“Tatâ, muu ŋwɛ̀ yu kɛ tɛ à ka' kwà'shi àmbò ye?

E yu kɛ tɛ à ka' jà' ye.

7Wɛ̀ m gèe yi nta' yi sɛtè embe nta' bcìndap Nyʉ̀ à mʉ nfè' mò',

mʉ nfè' anà à ka' càa, wɛ̀ fa ye nta' kʉʉ ba ryu'nì,

8a gee e tʉr ŋger mbendù buu wɛɛwɛ foŋ.”

Àmbò e tʉr ŋger mbendù buu wɛɛwɛ wa'a, banɛ yuu mo' yi yu ce e be buu efa rtʉr ŋger mbendù mo ka'. À ka' ba à nfè' e sè'ni na, sèe à ke' be yɛ ne àmbò ŋwɛ̀ tʉr ŋger mbendù buu wɛɛwɛ ka'. 9Ka' àmbò wèr à yɛ ŋwɛ̀ ka' na, wèr à yɛ Jisòs. À m ba à mʉ nfè' mò' Nyʉ̀ à gee nta' Jisòs yi sɛtè embe nta' bcìndap Nyʉ̀. À ka' ba njobè' ŋgɛ' ce Jisòs à m yɛ, a kwe, Nyʉ̀ à lo a fa ye nta' kʉʉ, a gee enɛ bèe a yu'ni nè ye. À ka' ba njobè' Nyʉ̀ à m tʉr ntee bòŋboŋ, yi ba enɛ Jisòs à kwe àtu bèe wɛɛwɛ.

10Buu wɛɛwɛ à gèe Nyʉ̀, à ba yì buu. À ka' ba njobè' e m ròo enɛ bèe magòr a koni fɛŋ à rba boo vi, sa' fòo, yi m ba yɛɛnì enɛ e gee tɛ ŋwɛ̀ ce e be mʉ̀' njì nà yɛ ŋgɛ', ghɛɛte à ŋwɛ̀ ce àde' e gee wowèe a lûŋ. 11Yi yu enɛ Jisòs ce e ke gèe bèe a ba brara à bsii Nyʉ̀, ker ba bèe ce e ke gèe wowèe a ba brara anà, a ku tʉr tàr mò'sir. A mbùu ce rìtu yi ce koo Jisòs à rtoo wowèe enɛ bfʉr vi ka'. 12À m ba à nfè' mò' e laa enɛ̂,

“Nyʉ̀, m be suŋ bfʉr wa àmbò njɛ̀ɛ ŋwɛ̀ ce à yu;

m be tɛɛ à mʉ̀ yò bèe, yòp yɛɛ, nɛ̀si wɛ̀.”

13E kèr làa àmbò ŋwɛ̀ e ke làa, laa enɛ̂, “M be lɛ̀ buu wɛɛwɛ mbe mmbo Nyʉ̀.” E m ker laa foŋ enɛ̂, “Yɛ là mɛ̀ wèr boo ce Nyʉ̀ à fa nè mɛ̀.” 14Boo vi anà ku ba bèe ce a tʉr lɛɛ foŋ. Jisòs ye ye à m vʉ̀ a ku ba ŋwɛ̀ àmbò wowèe tɛ e bo kwe, bepsi ŋger Satàn, njobè' Satàn a ŋwɛ̀ ce e tʉr ŋger à rvʉ̀ nè rkwe mbendù bèe. 15E m gèe wa'a, a ja' bèe ce a m ba bkwàa njobè' a m ce wɛp rkwe. 16Yi yu rara enɛ e m vʉ̀ ba à rjà' bcìndap Nyʉ̀ ka', e m vʉ̀ ba à rjà' ŋgʉ̀ Abràhâm. 17Yi m ba yɛɛnì enɛ e beeŋger ba àmbò bfʉr vi à mnduunjì wɛɛwɛ, tɛ e bo ba tu nè ŋgǎa taŋshi taŋshì ce e be fà' nè Nyʉ̀ nè mini-ŋwɛ̀, koosimnse nè bèe, tɛ e bo maa yàp buu bbebep. 18E ghɛɛte à rjà' bèe ce rmòoshì li vʉ̀ nè wowèe njobè' rmòoshì li m vʉ̀ nè ye ye, e riŋ ŋgɛ' efa rmòoshì foŋ.

Currently Selected:

Ñwaè' Hibruès 2: LNT

Highlight

Copy

Compare