Ñwaè' Hibruès 1
1
1À m ba elǔuŋgòŋ, Nyʉ̀ à laa nè visèe bta nfè' àŋgoo à mnduunjì jɛɛ jɛ̀ɛ jɛɛ. E m làa njì enjep bèe ce a m ce cep yi ntuu nè bèe. 2À ka' ba à nfè' e sè'ni ce yu ba mnòŋ elʉ̀simbùu, Nyʉ̀ à laa nè sèe njì enjep muu yì. Nyʉ̀ à m gèe ŋgòŋ ca wɛɛwɛ ba njì enjep muu yì anà. Nyʉ̀ à m ce ye tɛ e bo fa buu wɛɛwɛ mba yě mmbò. 3Fòo Nyʉ̀ yi ce yɛɛti ba njì enjep muu yì, sèe à riŋ njɛ̀ɛ ŋwɛ̀ ce Nyʉ̀ yu ba njì enjep ye, njobè' e ku ba àmbò Nyʉ̀ yu. Muu yì ca ce lòr vi blàa ce vi tʉr ŋger sê, a ce gèe ŋgòŋ ca yi ku bii àgho. E m lòr yì nyor a gee taŋshì àgho tɛ e bo gèe tɛ Nyʉ̀ foosi sèe efa yìsèe buu bbebep. E ka' gèe wa'a, a ko' mbe bùu, a cu à bo mà' Nyʉ̀ ce yi kʉʉ yi tɛɛ kùntombì.
4Nyʉ̀ à m fa muu yì nta' ce yi càa mnta' bcìndap Nyʉ̀. Cena yi ku ba foŋ àmbò rlii ce Nyʉ̀ à fa nè ye li caa mlii bcìndap Nyʉ̀ nà. 5Sèe rìŋ wa'a njobè' Nyʉ̀ à m be laa yuu ce e m làa àmbò muu yì nè yì ncìndap mò' ka'. E m làa àmbò muu yì enɛ̂,
“À yu muu wà,
kɛ' e ntìni m yu yò tâ.”
E m ker laa àmbò muu yì enɛ̂,
“M be ba yì tâ,
tɛ e ba muu wà.”
Nyʉ̀ à m be laa àmbò yì ncìndap mò' wa' ka'. 6À m ba à nfè' ce Nyʉ̀ à m ba enɛ e be fa muu yì ce à m ba muu rŋgòo njep ŋgòŋ, a laa enɛ̂,
“Tɛ bcìndap Nyʉ̀ wɛɛwɛ a gʉ'shi nè ye.”
7À ka' ba àmbò bcìndap, e a laa enɛ̂,
“Nyʉ̀ à m gèe vi bcìndap a ba àmbò fu',
yi ŋgǎa mfà' anà a ba àmbò mcùŋ mor.”
8À ka' ba àmbò muu, Nyʉ̀ à laa enɛ̂,
“Wɛ̌ Nyʉ̀, yo kʉʉ yi be cu nfesè.
À be sa' yo to' nè mini-ŋwɛ̀.
9Wɛ̀ kòŋ ŋgěe bòŋboŋ, a baa ŋgěe bebep.
A mbùu ce Nyʉ̀ ce e yu yò Nyʉ̀ à ce wɛ̀
enɛ à ba ŋwɛ̌ ŋgòr ce lu'shi caa bfʉr wo.”
10E ker laa enɛ̂,
“Wɛ̌ Tatâ, à m ba efa rkɛ̀',
wɛ̀ gee ŋgòŋ ba buu embe bùu wɛɛwɛ nè mo mmbo.
11Buu ca vi be kè bʉ tɛ à ku cu nfesè.
Vi be kʉti brʉ̀ʉ àmbò bcɛ̀' wa'a.
12À be kashi buu ca àmbò a ke kashi cɛ̀' nà.
Vi be kupse àmbò cɛ̀' yi ke kwe ncòo, kupse nà.
À ka' ba yi àmbò wɛ̀, à be kupse ka', àde' à ke kwe ka'.”
13Ncìndap Nyʉ̀ mò' yu ce Nyʉ̀ à m be laa yuu ce e m làa nè muu yì nè ye ka'. E m làa nè muu yì enɛ̂,
“Cu a mɛ̌ bo mà'
caar tɛ m gee tɛ à tɛr mkùu mbendù bèe ce a bàa wɛ̀.”
14Banɛ bcìndap Nyʉ̀ ku ba ba byʉ' ce vi ke gèe rfà' nè Nyʉ̀. E ke tuu vi enɛ vi du ja' bèe ce e be gèe tɛ wowèe a lûŋ.
Currently Selected:
Ñwaè' Hibruès 1: LNT
Highlight
Copy
Compare
Share
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
