Ñwaè' Hibruès 3

1Bfʉr wâ, Nyʉ̀ à m kɛ' wèe enɛ wèe bo ba yì bèe. Banɛ wèe kwa'shi àmbò ŋwɛ̀ ce Jisòs yu. A ye ce e tɛɛ àtu Nyʉ̀, a ba tu nè ŋgǎa taŋshi taŋshì efa buu Nyʉ̀ ce sèe à byemi àgho. 2E m gèe rfà' ce Nyʉ̀ à m ce ye enɛ e gee nà nè mini-ŋwɛ̀. E m ku gee rfà' anà nè mini-ŋwɛ̀ àmbò Musìs ye ye à m gèe nè bèe Nyʉ̀ nà. 3Jisòs yu ŋwɛ̀ ce bèe a ba kù'si ye càa Musìs, àmbò bèe a ke kù'si ŋwɛ̀ ce e bà'ri ndap caa ndap ce e bà'ri nà. 4Ndap mò' yu ce à buu efa rbà'ri ŋwɛ̀ ka'. Ka' yi yu wa'a, ŋwɛ̀ ce e m gèe buu wɛɛwɛ yu Nyʉ̀. 5Musìs à m gèe rfà' nè bèe Nyʉ̀ nè mini-ŋwɛ̀. E m gèe rfà' ca wa'a a ku ba ba ŋwɛ̀ rfà' nè Nyʉ̀. Li rfà' anà li m tɛɛ ba àtu yuu ce Nyʉ̀ à m bii ka' gèe tɛ bèe a rîŋ. 6Jisos Krǎis yu yi ba muu ce e tʉr ŋger mbendù bèe Nyʉ̀ àmbò muu ŋwɛ̀ ndap e ke tʉr ŋger mbendù buu yì ta nà. E ce gèe rfà' anà nè mini-ŋwɛ̀. See sèe yu bèe Nyʉ̀, ce sèe à ka' ku tɛɛ tatap, lɛ mmir mbendù buu ce Nyʉ̀ a kà' nè sèe, ce yu' rbòŋ à rsuŋ bèe buu anà.

7Banɛ wèe à ba yu' yuu ce Yʉ' Rara yi làa. Yi làa enɛ̂,

“Wèe à ka' yu' njèndoŋ Nyʉ̀ ntìni,

8wèe fa tèe btu àmbò wêe bta a m tèe nè Nyʉ̀, a kani efa rgèe yuu ce e m làa nà ka'.

À m ba à nfè' ce wowèe a m ce jɛ̀r à rìŋ nà,

wowèe a m tèe btu nè mɛ̀.

Wowèe a m tèe wa'a a mooshi mɛ̀.

9Wowèe a m mòoshi mɛ̀ à rìŋ anà wa'a,

a yɛ buu ce mɛ̀ m gèe nè wowèe à bfè' mŋkyèe.

10A mbùu ce ntee yi m bep mɛ̀ nè bèe anà,

mɛ̀ laa mɛnɛ wowèe a kani efa ryu'ni nè mɛ̀,

a ker riŋ ya nduunjì ka'.

11Ntee yi m bep mɛ̀ nè wowèe,

mɛ̀ ye lè' mɛnɛ

àde' wowèe a ke ba' a ya dǐ' rlʉ̀shì tɛ a bo lʉ̀shi ka'.”

12Bfʉr wâ, lòr nè nfè' fà dì' ŋwɛ̀ mò' efa wěe mʉ tʉr ntee bebep, kani efa rfòosi nè Nyʉ̀, mà'shi Nyʉ̀ ka'. Kuushi nè enɛ Nyʉ̀ ca yu Nyʉ̀ ce e yu ntèe. 13Yuu ce wèe à ba gèe yi yu enɛ wèe à ba cep wee btu fà dì' ntee bebep anà yi bo' ŋwɛ̀ mò' tɛ e tee tu nè Nyʉ̀ ka'. Kù ce gee nè wa'a à mnòŋ wɛɛwɛ àmbò nfè' ku bii àgho ntìni na. 14Sèe Jisos Krǎis wèe yu ŋwɛ̀ mò'sir, ce sèe ka' ku tɛɛ tatap ba à yuu ce sèe à byemi nà du ba' àlʉ̀simbùu. 15A saŋ mbe Ŋwǎ' Nyʉ̀ enɛ̂,

“Wèe ka' yu' njèndoŋ Nyʉ̀ ntìni,

wèe fa tèe tu àmbò wêe bta a m tèe nè Nyʉ̀, a kani efa rgèe yuu ce e m làa nà ka'.”

16Bèe ce a m yu' njèndoŋ Nyʉ̀ a tee btu nè Nyʉ̀ à m ba wèe kɛ? À m ba bèe ce Musìs à m fʉr efa bkwàa à to' Ijìp elǔuŋgòŋ nà. 17Bèe ce Nyʉ̀ à m bepsi ntee nè wowèe à bfè' mŋkyèe nà à m ba wèe kɛ? À m ba bèe ce a m gèe buu bbebep a kweŋger à rìŋ nà. 18À m ba à nfè' ce Nyʉ̀ à m ye lè' enɛ àde' wowèe a vʉ ba' fa yě dǐ' rlʉ̀shì ka' nà, e m ye lè' anà àtu wèe kɛ? À m ba bèe ce a m tèe tu nè Nyʉ̀ nà. 19Banɛ sèe à yɛ sè'ni enɛ wowèe a m dù ba' à dì' ce Nyʉ̀ à m kà' enɛ wowèe a be dù bà' nà ka', njobè' wowèe a m byemi nè ye ka'.

Currently Selected:

Ñwaè' Hibruès 3: LNT

Highlight

Copy

Compare