Ñwaè' Fïìlemúèn 1

1Ŋwà' ca ce saŋ mɛ̌ Pôl, ce m yu mbe shaŋ àtu Jisos Krâis. M ce saŋ yi wèr Timotì ce e yu nfʉr yìsèe. Wèr ce saŋ nè wɛ̀ ce Fìlemʉ̀n ce wèr kòŋ sê, sèe à ce fà' à yuu mo'sir, ba bèe Nyʉ̀ wɛɛwɛ ce a ke tarshi mbe wɛ̌ ndàp. 2Wèr ce saŋ yi foŋ nè wɛ̀, Àfiyà ce à yu njar yèr, ker ba wɛ̀ ce Àcipòs ce sèe à rè bsìp a rfè'shi Nsuŋ Mbòŋmboŋ. 3M ce loo mɛnɛ Ta Nyʉ̀, ba Tata Jisos Krǎis tʉr wèe à ntee bòŋboŋ, ker fa wèe cumʉnyaŋ.

4Mɛ ke kuushi wɛ̀ à nfè' m ce loo, ker ce yòŋshi Nyʉ̀ a wɛ̌ tù, 5njobè' m ce yu' àmbò à kòŋ bèe Nyʉ̀ wɛɛwɛ, a ker byemi nè Tata Jisos Krâis. 6M ce loo mɛnɛ lisèe rtarshǐ àbee àmbò ŋgǎa rbyemì li gee tɛ à rìŋ bòŋboŋ àmbò bghònì ce sèe à koni àmbò bèe Jisos Krâis. 7Nfʉrà, njɛ̀ɛ rkòŋnì ce à tʉr nè bèe Nyʉ̀ li gèe mɛ̀ ce lu'shi, a ker tapsi mɛ̀. Wɛ̀ kòŋ wowèe wa'a, a gee wap mntee vi fʉtè.

8Àmbò m yu ŋwɛ̀ ntuu Jisos Krâis, àde' m laa nè wɛ̀ a mɛ̌ ŋger mɛnɛ à gee yuu ce à tʉr à rgèe. 9A ka' ba njobè' rkòŋnì ce à tʉr na, m be loo wɛ̀ loo. Kuushi wɛnɛ ce loo mɛ̀ e loo wɛ̀, mɛ̀ ce Pol ce m yu nleeŋwɛ̀ sè'ni, a ba mbe shaŋ àtu Jisos Krâis. 10M ce loo mɛnɛ à koo muu wà Ònɛsimòs ce mɛ̀ bèeti yi ta sè'ni ce m yu mbe shaŋ na. 11À m ba à nfè' entombì e ba yuu cicì nè wɛ̀; sè'ni e yu lulu nè wɛ̀ ker ba nè mɛ̀ foŋ. 12M ce kʉsi ye ce e yu wa mntee nè wɛ̀. 13Sè'ni ce mɛ̀ niŋ shaŋ njobè' Nsuŋ Mbòŋmboŋ na, mɛ̀ ba kòŋ à rlɛ̀ ye àfa tɛ e lor yo dì', ce jà' mɛ̀. 14Mɛ̀ ke' gèe wa' ka', njobè' m ce kòŋ à rgèe yuu ce à buu efa rrìŋ enjo ka'. M ce kòŋ ba mɛnɛ à ka' ce gee yuu bòŋboŋ nè mɛ̀ à gee ba àmbò wɛ̀ gwɛɛ. 15Seemò' yi yu enɛ ye ce Ònɛsimòs à m caŋ ese wɛ̀ dù cu nfè' mʉcàr, e kʉti bo cu wèe ye nfesè. 16E be kʉti kèr cu wèe ye sè'ni ba àmbò ŋkwàa ka', e gha' ŋkwàa sè'ni. E be cu wèe ye sè'ni ba àmbò nfʉr ce wèe ye kòŋni. E yu yuu gòr nè mɛ̀ sê. E ka' ba nè mɛ̀ wa'a, yi ka' ba yi kɛ àmbò wɛ̀ ce e yu yò ŋwɛ̀ rfà' a ker ba nfʉrò ce wèe ye yu bèe Tatâ? 17Banɛ yi ka' ba mini enɛ sò yu à ŋwɛ̀ mò'sir, à konì ye àmbò wɛ̀ ba koni mɛ̀. 18À ka' ba enɛ e m fàa yuu mo' nè wɛ̀, kɛ̀ e m ye wɛ̀ ba rkaa ɛ̀, à suŋ mɛ̀ tɛ m la'. 19Ce saŋ mɛ̌ Pol nè ya bo, m be là'. Banɛ m ker làa yuu àmbò rkaa ce wɛ̀ tʉr mɛ̀ ka', rkaa ce yu ba yo tu nyor. 20Nfʉrà, m ce loo wɛ̀ à rlii Tata mɛnɛ à ja' mɛ̀, gee yuu bòŋboŋ ca nè mɛ̀. Gèe wa' njobè' Jisos Krâis, tɛ ya ntee yi bo kèr tap. 21A mbùu ce m ce saŋ na, mɛ̀ rìŋ mɛnɛ à be gèe yuu ce mɛ̀ làa na, kèr gèe caa embo nà. 22M ce làa foŋ enɛ à kupshi dì' rnòŋ nè mɛ̀, njobè' m ce kwà'shi mɛnɛ le rloo li be gèe tɛ Nyʉ̀ ker tuusi mɛ̀ nè wèe.

23Ɛ̀pafràs ce wèr ye à niŋ shaŋ bsìp àtu Jisos Krâis, à cà'ni wɛ̀. 24Mak ba Àristakòs, Demàs, ker ba Lukas ce wèr wowèe ce fà', a cà'ni wɛ̀ foŋ. 25M ce loo mɛnɛ Tata Jisos Krǎis tʉr wèe a ntee bòŋboŋ.

Currently Selected:

Ñwaè' Fïìlemúèn 1: LNT

Highlight

Copy

Compare