Ñwaè' Gaèláshaè 5

1Jisos Krǎis à m fʉr sèe efa bkwàa fà dì' sèe bo ker fà' bkwàa nè yuu mo' ka'. Banɛ wèe tɛɛ tatap. Wèe fa kèr byemi à rfà' bkwàa nè yuu mo' ka'.

2Yu' nè bòŋboŋ. Mɛ̌ Pôl, m ce suŋ wèe enɛ wèe ka' byemi enɛ a gee wèe bʉ̀ tɛ wèe ka' ba byɛɛnì à bsii Nyʉ̀, banɛ yuu ce Jisos Krǎis à m gèe nè wèe nà yi bʉ à cicì. 3M ce kòŋ mɛnɛ wèe riŋ bòŋboŋ enɛ ŋwɛ̀ à ka' byemi enɛ a gee ye bʉ̀, banɛ ŋgàŋ tʉr à rlɛ̀ mncir Jus wɛɛwɛ foŋ. 4Wèe ce wèe ce kòŋ enɛ wèe ba byɛɛnì à bsii Nyʉ̀ njobè' wèe ce lɛ̀ mncir, wèe Jisos Krǎis wèe à gàpni. Wèe à bɛ yuu bòŋboŋ ce Nyʉ̀ à ba gèe nè wèe. 5À ka' ba yi àmbò sèe, Yʉ' Rara yi gèe sèe à ce kè' ba enɛ Nyʉ̀ be lòr sèe àmbò běe byɛɛnì a yě bsii njobè' sèe à byemi nè Jisos Krâis. 6Sèe Jisos Krǎis wèe ka' ba ŋwɛ̀ mò'sir, kɛ̀ ŋwɛ̀ à gèe bʉ̀ ɛ̀, kɛ̀ ŋwɛ̀ à gèe bʉ̀ ka' ɛ̀, yi tʉr yuu mo' à rgèe nè lisèe rbyemì ka'. Yuu tatap yi yu enɛ sèe byemi nè Jisos Krâis, duŋshi lisèe rbyemì anà à lisèe rkòŋnì.

7À m ba efa rkɛ̀' wèe à ce gèe bòŋboŋ sê. À gèe ba nda, wèe à ka' borni efa rgèe yuu mini? 8Ŋwɛ̀ ce e dòoshi wèe, wèe à ka' ce gèe njɛ̀ɛ ŋgèe ca à dòoshi Nyʉ̀ ce e m kɛ' wèe enɛ tɛ wèe ba yì bèe ka'. 9Kuushi nè enɛ kò' e mo'sir yi ke bepsi ncwa'. 10À ka' ba njobè' sèe Jisos Krǎis wèe yu ŋwɛ̀ mò'sir, mɛ̀ byemi mɛnɛ wèe be yu' buu ce mɛ̀ làa na. Ŋwɛ̀ ce e ce jepsi wèe nà, kɛ̀ yu nda ɛ̀, Tata Nyʉ̀ be fa ye ŋgɛ'.

11Bfʉr wâ, à ka' ba yi àmbò mɛ̀, yi yu rara enɛ m ker bii fè'shi enɛ bèe ce a byemi nè Jisos Krǎis a gee bʉ̀ ka'. Mɛ̀ ka' ba ce fè'shi wa'a, bèe a ba kèr ce fa mɛ̀ ŋgɛ' ka'. Yi ka' ba ba mini wa'a, yuu ce m ce fè'shi enɛ Jisos Krǎis à m kwe mbe kìntaa na yi ba gèe tɛ bèe a bepsi ntee nè mɛ̀ ka'. 12À ka' ba àmbò bèe ce a ce jepsi wèe nà, mà'shi nè tɛ wowèe a soŋ wap mnyor.

13Bfʉr wâ, Nyʉ̀ à kɛ' wèe fà dì' wèe bo kèr ce fà' bkwàa nè mncir ka'. Àmbò wèe ker bii ce fà' bkwàa nè mncir ka' nà, wèe fa làa weenɛ àde' wèe ku gee yuu ce wèe kòŋ ka'. Yuu ce wèe à ba gèe yi yu enɛ wèe koŋ bfʉr mo', ce fa' nè wowèe. 14Wèe gee wa'a njobè' làa ce enɛ̂, “Kòŋ nfʉrò àmbò wɛ̀ kòŋ yò nyor” nà, yi kur mncir wɛɛwɛ. 15Wèe à ka' ce luuni àmbò mnyàa, banɛ wèe lor nfè' fà dì' wèe yʉshi wee btu ka'.

16Yuu ce m ce làa yi yu enɛ wèe ma'shi tɛ Yʉ' Nyʉ̀ yi ke'ni wèe fà dì' wèe bo gèe ba yuu ce yè nyor ce kòŋ ka'. 17Yuu ce nyor kòŋ, a yuu ce Yʉ' Nyʉ̀ yi kòŋ ka'. Yuu ce Yʉ' Nyʉ̀ yi kòŋ, a yuu ce nyor ce kòŋ ka'. Bǔu bbaa ca vi yu à yuu mo'sir ka'. A mbùu ce àde' à gee yuu ce wɛ̌ kòŋ à rgèe ka'. 18Yʉ' Nyʉ̀ yi ka' ce kè'ni wɛ̀, banɛ mncir vi ker tʉr ŋger mbe wɛ̌ ndù ka'.

19Buu ce ŋwɛ̀ e ke gèe yu buu ce bèe a mɛŋni ka'. Buu ca yu mkɛ'ni ba bsàkì, mkwà'shì àmbò mkɛ'ni ba bsàkì, bsàkì ce e dù ba à yaŋ, 20rloo nè mnyʉ̀ enjep ŋgòŋ na, tʉ', bbànì ba mlap, ŋko'ndoŋ, ntee yayaŋ, bwer, ŋgàpni ba rcu jɛɛ jɛ̀ɛ jɛɛ, 21ghɛ̀', no buu vi koo, ŋaŋ ker ba buu mò' ce vi ku ba àmbò bca. M ce làa nè wèe tatap àmbò mɛ̀ m làa nè wèe nà, enɛ àde' bèe ce a ce gèe njɛ̀ɛ buu ca a konì ŋgʉ̀' mò' efa kʉʉ Nyʉ̀ ka'.

22Buu ce vi lò ese Yʉ' Nyʉ̀ yu buu ca: rkòŋnì, rlu'shì, cumʉnyaŋ, ŋkur ntee, ŋgěe bòŋboŋ nè bèe, à rba mini, 23à rba nè rbonì-ŋwɛ̀, à rmà'shi yò nyor àwàa ka'. Ncir mo' yi yu ce yi kani bèe efa rgèe buu ca ka'. 24Bèe ce a yu bèe Jisos Krǎis a mà' buu ce nyor ce kòŋ. Cena yi yu àmbò a taa lɛ vi mbe kìntaa wa'a. 25Àmbò sèe ce cu à ŋger Yʉ' Nyʉ̀ na, banɛ sèe ce gee buu à ŋger Yʉ' Nyʉ̀. 26Sèe fa nàa tu ka', sèe fa gèe tɛ ntee yi bep ŋwɛ̀ mò' ka', sèe fa ko'ndoŋ nè ŋwɛ̀ mò' ka'.

Currently Selected:

Ñwaè' Gaèláshaè 5: LNT

Highlight

Copy

Compare