Ñwaè' Gaèláshaè 6
6
1Bfʉr wâ, wèe à ka' yɛ àmbò ŋwɛ̀ à gèe yuu bebep, wèe ce wèe ce gèe buu à ŋger Yʉ' Nyʉ̀ nà, wèe ja' ye tɛ e bo kʉti njep nduunjǐ yɛɛnì. Wee ce jà' ŋwɛ̀ anà, wèe fa ce nàa tu ka'. Wèe fyɛ' wêe mnyor bòŋboŋ fà dì' wèe lo gwè rmòoshì foŋ ka'. 2Wèe koni bfʉr wee à ŋgɛ' ce wowèe a ce yɛ. Wèe ka' gee wa'a, banɛ wèe à lɛ̀ ncir Jisos Krâis.
3Ŋwɛ̀ à ka' lor yi tu enɛ e yu ŋwɛ̀, ce e yu ŋwɛ̀ ka', banɛ ŋgàŋ ce bo' yi tu. 4Tɛ ŋwɛ̀ wɛɛwɛ fyɛ' yì ndèe; yì ndèe ka' ba yɛɛnì, banɛ ŋgàŋ be yu' nyor njobè' buu bbòŋboŋ ce e gèe, ke' ba njobè' e yɛ enɛ e gèe buu anà a caa ŋwɛ̀ mò' ka'. 5Ŋwɛ̀ wɛɛwɛ be kù byɛ̀' yi ntɛ̀r.
6Tɛ bèe wɛɛwɛ ce a ce yɛ'ni wowèe buu Nyʉ̀ a fa buu mò' efa buu bbòŋboŋ ce a tʉr nè ŋwɛ̀ ce e ce yɛ'ni wowèe.
7Fa bo' yo tu, lòr Nyʉ̀ à lʉr ka'. Yuu ce ŋwɛ̀ à byè ku ba yuu ce e be kep. 8Ŋwɛ̀ à ka' ce gèe ba buu ce yì nyor kòŋ, banɛ ŋgàŋ be koni rbep ba rkwe. Ŋwɛ̀ ce e ka' ce gèe ba buu ce Yʉ' Nyʉ̀ yi kòŋ, banɛ ŋgàŋ be koni ryòŋ ce nfesè. 9Banɛ sèe fa koosi bsɛ̀, borni efa rgèe yuu bòŋboŋ ka', njobè' sèe ka' tɛ borni ka', nfè' ka' ghɛɛ, sèe ye sɛ' efa lisèe rfà' anà. 10Banɛ à nfè' wɛɛwɛ ce sèe à ka' koni fɛŋ, sèe gee yuu bòŋboŋ nè bèe wɛɛwɛ, laŋlaŋ ŋgǎa rbyemì.
11Yɛ nè mbʉ̌ ŋwà' gòrgòr ce m ce saŋ nè ya bo na. 12Bèe ce a ce kòŋ à ryɛɛti bòŋboŋ à bsii bèe nà, a bèe ce a ce tàa wèe enɛ wèe gee bʉ̀. Wowèe a ce gèe wa'a fà dì' bèe a bo fa wowèe ŋgɛ' njobè' wowèe a ce fè'shi àmbò rkwe ce Jisos Krǎis à m kwe mbe kìntaa ka'. 13Ka' bèe ce a gèe bʉ̀ wɛɛ nà, a ce lɛ̀ mncir wɛɛwɛ ka'. Wowèe a ku koŋ enɛ wèe gee bʉ̀ tɛ a bo nàa tu enɛ wèe à yu'ni nè wowèe. 14À ka' ba yi àmbò mɛ̀, àde' m naatu à yuu mo' caa efa rkwe ce Tata Jisos Krǎis à m kwe mbe kìntaa nà ka'. À ka' ba njobè' li rkwe anà, buu enjep ŋgòŋ na à kʉti buu bcicì nè mɛ̀. Buu anà yu nè mɛ̀ àmbò bgʉ̌ʉ buu wa'a, mɛ mɛ̀ à ba àmbò gʉ̌ʉ yuu wa'a, nè buu anà. 15Kɛ̀ ŋwɛ̀ à gèe bʉ̀ ɛ̀, kɛ̀ ŋwɛ̀ à gèe bʉ̀ ka' ɛ̀, yi tʉr yuu mo' à rgèe nè lisèe rbyemì ka'. Yuu gòr yi yu enɛ Nyʉ̀ gee tɛ sèe ba běe bfi. 16Tɛ Nyʉ̀ fa cumʉnyaŋ, ker koosimnse nè bèe ce a ce cu àmbò běe bfi, a ba bèe Isrɛ̀l mini ce a yu bèe Nyʉ̀.
17Kɛ̌' sè'ni na, ŋwɛ̀ fa kèr fa mɛ̀ ŋgɛ' ka', njobè' ncòo ce e yu a mɛ̌ nyòr ce dùŋshi enɛ m yu ŋwɛ̀ Jisos Krâis. 18Bfʉr wâ, m ce loo mɛnɛ Tata Jisòs tʉr wèe à ntee bòŋboŋ. Yi yu wa'a.
Currently Selected:
Ñwaè' Gaèláshaè 6: LNT
Highlight
Copy
Compare
Share
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
