Ñwaè' Gaèláshaè 4

1Yuu ce m ce làa yi yu ba enɛ muu ce e be ye bti' yì tâ, ka' bii munte, e ku ba àmbò ŋkwàa, ka' bti' anà yu vi wa'a. 2E ke ba à nfè' anà, bèe a ba ce a be ce kè'ni muu anà, kèr ce fyɛ' buu ce yu vi nà nè ye caar tɛ bfè' ce yì ta à m lɛ̀ nà vi ghɛɛ. 3Yi ku ba nè sèe wa' foŋ. À m ba mbe nfè' ce sèe à m be riŋ buu Nyʉ̀ bòŋboŋ ka' nà, sèe à ce fà' bkwàa nè byʉ' enjep ŋgòŋ na. 4Nfè' à ka' ghɛɛ, Nyʉ̀ à tuu muu yì njep ŋgòŋ na. À m bi njeŋwɛ̀ a bi muu anà. A m bi ye à ŋwɛ̀ Judà, e ce lɛ̀ mncir Jûs. 5Nyʉ̀ à m gèe wa'a tɛ e bo tee bèe ce mncir vi m kur wowèe nà, tɛ sèe bo ba boo Nyʉ̀. 6À ka' ba njobè' wèe yu boo Nyʉ̀, Nyʉ̀ à tuusì Yʉ' muu yì enɛ yi vʉ niŋ njep visèe mntee. Yʉ' ca yi gèe sèe ce kɛ' Nyʉ̀ enɛ̂, “Bǎa, Tàr.” 7Banɛ wèe ker bii bkwàa ka'. Wèe yu sè'ni ba boo. À ka' ba njobè' wèe yu boo Nyʉ̀, banɛ wèe be koni buu wɛɛwɛ ce e kupshi a lɛ nè boo vi nà.

8À m ba mbe nfè' ce wèe à m rìŋ Nyʉ̀ ka' nà, wèe à m ba bkwàa nè buu ce yu mnyʉ̀ ka'. 9À ka' ba sè'ni àmbò wèe à rìŋ Nyʉ̀ na, kɛ̀ sè'ni ce Nyʉ̀ à rìŋ wèe na, wèe à ker ce kòŋ à rkʉti àmbùu byʉ' enjep ŋgòŋ na njokɛ? Njɛ̀ɛ byʉ' anà vi yu à cicì, a tʉr ŋger ka'. Wèe ker ce kòŋ à rkʉti ba bkwàa nè byʉ' anà njokɛ? 10Wèe ce lòr mnòŋ mo', ba mŋwɛɛ mo', ba nfè' mò', ba bfè' mo' enɛ vi yu jɛɛ njokɛ? 11Ye ŋgèe anà yi ce wɛpsi mɛ̀ sê. Yi ce yɛɛti àmbò la rfà' ce mɛ̀ m gèe a wěe mʉ nà li bʉ à cicì wa'a. 12Bfʉr wâ, m ce bu' mmbo nè wèe enɛ wèe lor ba ya ŋgèe àmbò mɛ mɛ̀ à lòr ŋgèe ye nà. Wèe à m be gee yuu bebep nè mɛ̀ ka' koo mʉcàr. 13Wèe rìŋ enɛ à m ba à nfè' entombì ce mɛ̀ m fè'shi nsuŋ mbòŋmboŋ nè wèe nà, mɛ̀ m ce cu a wěe mʉ njobè' mɛ̀ m ce yaŋ. 14Ka' ya yaŋ à m ba yì ce wèe à m ba caŋ efa mɛ̌ geŋ wa'a, wèe à m lòr mɛ̀ à yuu cicì ka'. Wèe à m gɛ' nè mɛ̀ àmbò wèe ce gɛ' lɛ ba nè ncìndap Nyʉ̀ wa'a. Nè mini-ŋwɛ̀, wèe à m gɛ' nè mɛ̀ àmbò wèe ce gɛ' lɛ ba nè Jisos Krǎis wa'a. 15À m ba mbe nfè' mɛ̀ m vʉ̀ yɛ wèe nà, wèe à lu'shì sê. Yuu ce yi koni sè'ni à koni kɛ? Mɛ̀ rìŋ mɛnɛ à m ba mbe nfè' anà, wèe à koŋ mɛ̀ sê. A m ba laa mbe nfè' anà enɛ ŋwɛ̀ co'ni mmir enje tù fa nè mɛ̀, ŋgàŋ à m ba kù gèe wa'a. 16Wà' mɛ̀ kʉti ŋwɛ̀ bbàa nè wèe njobè' m ce suŋ wèe yuu mini a? 17Bèe ca a ce kòŋ enɛ a so wèe, koo wèe à mbèp yàp. A ce kòŋ à rso wèe ba à yuu bòŋboŋ ka'. Wowèe a ce kòŋ enɛ sèe gàpni tɛ wèe bo kòŋ ba wowèe. 18Yi yu bòŋboŋ enɛ ŋwɛ̀ so ŋwɛ̀ à mbèp yì ba àtu yuu bòŋboŋ. Cena yu yuu yɛɛnì à nfè' wɛɛwɛ, kɛ̀ yu à nfè' m yu a wěe mʉ ɛ̀, kɛ̀ m yu a wěe mʉ ka' ɛ̀. 19Boo wa ce mɛ̀ kòŋ nè ya ntee wɛɛwɛ, m ker ce yɛ ŋgɛ' a wěe btù àmbò njeŋwɛ̀ ce e ce luuti wa'a. M be kù ce yɛ ŋgɛ' wa'a caar tɛ wèe lor ba ŋgèe Jisos Krâis. 20Mɛ̀ ba ba a wěe mʉ, mɛ̀ ba rìŋ yuu ce m be làa. Njɛ̀ɛ yuu ce wèe à gèe na, yi gèe bfee vi bʉ mɛ̀.

21Wèe ce wěe kòŋ enɛ wèe ba njeptii mncir, wà' wèe ce yu' yuu ce mncir vi ce làa a? 22A saŋ mbe Ŋwǎ' Nyʉ̀ enɛ Abràham à m tʉr boo mmbaŋrù a baa. E m bi mò' a ŋkwàa, a bi mò' a njeŋwɛ̀ ce e m ba ŋkwàa ka'. 23Ŋkwàa ca yi m bi muu yì ca àmbò a ke bi boo wɛɛwɛ nà. Njeŋwɛ̀ ce e m ba ŋkwàa ka' nà à m bi muu yì ba njo' mkà'ni ce Nyʉ̀ à m gèe nè Abràhâm. 24Àde' sèe lor cena ba àmbò ŋgàa wa'a. Bbyèŋge a baa ce a too enɛ Hagà ba Sɛ̀ra na a tɛɛ àtu blě' bbaa. Hagà tɛɛ àtu lè' ce Nyʉ̀ à m ye a Musìs mbe rtùu Sinài à nfè' ce e m fa mncir nè Musìs nà. Boo wɛɛwɛ ce a yu njeptii lè' ca a ku ba bkwàa. 25Hagà tɛɛ àtu lè' ce a m ye mbe rtùu Sinài ce li yu ba à ŋgǒŋ Àrɛbìyà, a ker tɛɛ foŋ àtu rla' Jɛ̀rusalɛ̀m lǐ sè'ni na, njobè' běe à rla' Jɛ̀rusalɛ̀m wɛɛwɛ a yu bkwàa nè mncir. 26À ka' ba yi àmbò bèe embe Jɛ̀rusalɛ̀m ce embe bùu, wowèe a yu bkwàa ka'. Jɛ̀rusalɛ̀m ca yu yìsèe mâ. 27Yuu ce a m saŋ mbe Ŋwǎ' Nyʉ̀ àmbò buu ca yi yu mini. A m saŋ enɛ̂,

“Wɛ̌ njeŋwɛ̀ ce wɛ̀ be bi muu ka', lu'shi.

Wɛ̀ ce wɛ̀ be riŋ àmbò a ke luuti muu ka',

waa mbekì ce lu'shi, njobè' boo njeŋwɛ̀ ce nduu à mà' ye,

a be lò càa boo njeŋwɛ̀ ce e cu a nduu”

28Bfʉr wâ, à ka' ba yi àmbò wèe, wèe yu boo Nyʉ̀ njo' mkà'ni ce Nyʉ̀ à m gèe, àmbò a m bi Aisìk à muu Abràham njo' mkà'ni ce Nyʉ̀ à m gèe nà. 29À m ba à nfè' anà, muu ce a m ku bi àmbò bèe wɛɛwɛ a ke bi boo nà, à lo a ce fa ŋgɛ' nè muu ce a m bi ba à ŋger Yʉ' Nyʉ̀ nà. Yi ku ba sè'ni wa' foŋ. 30A saŋ mbe Ŋwǎ' Nyʉ̀ àmbò ŋgɛ' ca enɛ kɛ? A saŋ mbo enɛ̂, “Jùu njeŋwɛ̀ ce e yu ŋkwàa nà a muu yì bsìp. Yi yu bòŋboŋ enɛ muu ŋkwàa anà ye bti' a muu njeŋwɛ̀ ce e yu ŋkwàa ka' nà ka'.” 31Bfʉr wâ, banɛ sèe yu boo njeŋwɛ̀ ce e yu ŋkwàa nà ka', sèe yu ba boo njeŋwɛ̀ ce e yu ŋkwàa ka' nà.

Currently Selected:

Ñwaè' Gaèláshaè 4: LNT

Highlight

Copy

Compare