Ñwaè' Koèlosïì 2

1M ce kòŋ mɛnɛ wèe riŋ àmbò m ce ghèter nè wèe, ker ba běe à rla' Làodisìyà ker ba bèe wɛɛwɛ ce wèr wowèe à m be tarte ka'. 2Mɛ̀ kòŋ enɛ wee mntee vi ba btatap tɛ wèe koŋ bfʉr wee, ba àbee wèe wowèe. M ce kòŋ mɛnɛ yuu ce yi m ba à bsʉ̀ti, Nyʉ̀ à gee sèe à riŋ nà, yi ba rara nè wèe tɛ wèe bo rìŋ yi bòŋboŋ. Yuu ce yi m ba à bsʉ̀ti anà yu nsuŋ àmbò Jisos Krâis. 3Ŋwɛ̀ ce e gèe sèe à tʉr bfee bbòŋboŋ ku ba Jisòs cà'cà'. Njɛ̀ɛ bfee ca vi tʉr sɛ' sê. 4M ce suŋ wèe buu ca fà dì' ŋwɛ̀ mò' bo bo' wee nè cùu ka'. 5Ka' m yu ànjìsàp wa'a, sèe ku ba àbee enjep ntee. M ce lu'shi njobè' mɛ̀ yu' mɛnɛ wèe yu àbee, a ku tɛɛ tatap à rbyemì ce wèe à m byemi nè Jisos Krâis.

6Wèe à byemi Jisos Krǎis àmbò ye Tatâ, banɛ wèe ce gee ba ŋgèe ce bèe ce a ce dù àmbùu Jisos Krǎis a ba ce gèe. 7Taa nè mŋgàŋ njep ye, ku' njep ye, tɛɛ tatap à rbyemì ce a m yɛ'ni wèe nà, ker ce yoŋshi Nyʉ̀ à nfè' wɛɛwɛ.

8Lòr nè nfè' fà dì' ŋwɛ̀ mò' bo' wèe nè bfee enjep ŋgòŋ na, koo wèe à bkwàa ka'. Ndèe to' ker ba mncir ce byʉ' bebep vi lɛ̀, a buu ce vi vʉ̀ nè njɛ̀ɛ bfee ca. Ŋwɛ̀ ce e fa bèe njɛ̀ɛ bfee ca à fa Jisos Krǎis ka'. 9Rìŋ nè enɛ Jisos Krǎis ce e yu ŋwɛ̀, yu yɛɛnì a Nyʉ̀ à buu wɛɛwɛ. 10Rìŋ nè enɛ wèe Jisos Krǎis wèe ka' ba àbee, wèe tʉr buu wɛɛwɛ njobè' e yu tu nè byʉ' wɛɛwɛ ce vi tʉr ŋger. 11À m ba à nfè' ce wèe Jisos Krǎis wèe à m ba àbee nà, Nyʉ̀ à fa wèe njɛ̀ɛ ncòo mò' ce e ce dùŋshi enɛ wèe yu yì bèe. Ncòo anà yu ba bʉ̀ ce a gèe nè mmbo àmbò Jus a ce gèe nà ka', yu ba njɛ̀ɛ ncòo yì Jisos Krâis. Njɛ̀ɛ ncòo ca yu ba ncòo enjep ntee, ce e yu enɛ wèe bii gèe buu bbebep àmbò wèe à m ce gèe nà ka'. 12À m ba à nfè' ce a m bàptir wèe, yi duŋshì enɛ a tuŋ wèe Jisos Krǎis wèe àbee. À m ba à nfè' anà foŋ Nyʉ̀ à fʉr wèe Jisos Krǎis wèe efa rkwe. E m gèe wa'a njobè' wèe à m byemi enɛ Nyʉ̀ ce e m fʉr Jisos Krǎis efa rkwe, tʉr ŋger à rfʉr wèe efa rkwe foŋ. 13À m ba à nfè' entombì wèe à ba àmbò bgʉ̌ʉ bèe wa'a, njobè' wèe à m ce gèe buu bbebep, a ke' tʉr ncòo ce yu ba ncòo bèe Nyʉ̀ ka'. Sèe Jisos Krǎis wèe à ka' ba àbee, Nyʉ̀ à foosì sèe efa yìsèe buu bbebep wɛɛwɛ, a gee sèe à kʉtì btèe sèe Jisos Krǎis wèe. 14Sèe à m bʉ' mncir Nyʉ̀, sèe Nyʉ̀ wèe à tʉr mnsa', Nyʉ̀ à ca'sì buu bbebep ca embe sěe tù. E m cà'si wa'a, yi ba sè'ni enɛ e lɛ̀ mbe tu Jisòs à nfè' ce a m taa ye mbe kìntaa nà. 15Jisos Krǎis à m kwe mbe kìntaa wa'a, a so byʉ' bbebep wɛɛwɛ ce vi tʉr ŋger, a duŋshi nè bèe rara se enɛ e tʉr ŋger a caa byʉ' ca.

16Àmbò buu ca yu wa'a, fa mà'shi nè tɛ ŋwɛ̀ mò' gee mncir nè wèe àmbò buu ce àde' wèe ye, ker ba buu ce àde' wèe no ka'. Fa mà'shi nè foŋ tɛ ŋwɛ̀ mò' gee mncir nè wèe àmbò njɛ̀ɛ njì ce àde' wèe gee mŋkà' ka', kɛ̀ yu ŋkà' enjep fè' ɛ̀, kɛ̀ yu Ŋkǎ' ŋwɛɛ fi ɛ̀, kɛ̀ yu Ŋkǎ' mmbomntaa ɛ̀. 17Buu ca vi m ba àmbò rlèŋshi ce li m ce dùŋshi bèe yuu ce yi be kè ba. Yuu ce buu ca vi m ce dùŋshi anà à ba Jisos Krâis. 18Fa yu'shi yuu ce bèe mo' a ce làa enɛ wèe lor wee mnyor njep nshè, a ker ce làa enɛ wèe gʉ'shi nè bcìndap Nyʉ̀ nà ka'. Wowèe a ce làa wa'a, a ce bepsi wèe bepsi. Njɛ̀ɛ bèe anà a ce làa enɛ Nyʉ̀ à gèe wowèe a yɛ rlo. Wowèe a làa wa'a, a ce nàa ba tu à cicì, bfee wap à ba bfee enjep ŋgòŋ na. 19Cena yi ce dùŋshi enɛ wowèe ker ba Jisos Krǎis ce e yu yisèe tu, a yu àbee ka'. Ku ba ba bèe ce a yu àbee a Jisos Krǎis wèe, ce a yu àbee à nyor mò'sir, a koni byee, a ce kù' àmbò Nyʉ̀ ce kòŋ. 20Àmbò wèe rìŋ wɛɛ enɛ wèe Jisos Krǎis wèe à kwe àbee, banɛ byʉ' bbebep enjep ŋgòŋ na vi ker tʉr ŋger mbe wěe ndù ka'. Yi ka' ba wa'a, wèe à ce lɛ̀ mncir ce bèe a làa enɛ wèe lɛ njokɛ? 21Wowèe a ce làa nè wèe enɛ̂, “Wèe fa gèe cena ka', wèe fa ye cena ka', wèe fa jòo cena ka'.” 22Mncir ca à lɛ̀ ba bèe, a lɛ ba à buu ce vi be cu nfesè ka'. 23Njɛ̀ɛ mncir ca vi lò gee bèe a yu'nì àgho, lor wap mnyor njep nshè ker fa ŋgɛ' nè yàp nyor. E ba à nfè' ce bèe a kɛ̀' ce lɛ̀ mncir anà yi yɛɛtì àmbò vi gèe bèe a tʉr lɛ bfee wa'a, vi banì tʉr ŋger à rjà' ŋwɛ̀ tɛ e borni yuu ce yì nyor ce kòŋ enɛ e gee ka'.

Currently Selected:

Ñwaè' Koèlosïì 2: LNT

Highlight

Copy

Compare