Ñwaè' Timotïì Ce Embenjïì 1

1Ŋwà' ca ce saŋ mɛ̌ Pol ce Nyʉ̀ à m ce àmbò e m kòŋ, enɛ m ba ŋwɛ̀ ntuu nè Jisos Krâis, tɛ m bo suŋ bèe enɛ Nyʉ̀ à kà' enɛ e be fa bèe ryòŋ ce nfesè njì enjep Jisos Krâis. 2M ce saŋ ŋwà' ca nè Timotì ce e yu muu wà ce mɛ̀ kòŋ nè ya ntee-ŋwɛ̀. M ce loo mɛnɛ Nyʉ̀ Tàr, ker ba Jisos Krǎis ce e yu yìsèe Tatâ, tʉr wɛ̀ à ntee bòŋboŋ, koosimnse nè wɛ̀, fa wɛ̀ cumʉnyaŋ.

3M ce loo nè wɛ̀ à mnòŋ wɛɛwɛ, a ce yòŋshi Nyʉ̀ ce m ce fà' nè ye nè ntee rara àmbò wa bta a m ce fà' nà. 4Mɛ̌ kuushi mŋgoommir ce wɛ̀ m sùusi nà, a ce kòŋ à ryɛ wɛ̀ tɛ m bo lu'shi. 5M ce kuushi lo rbyemì ce wɛ̀ byemi nè Jisòs nè yo ntee wɛɛwɛ. Yò makʉ Lowɛ̀s, ba yò ma Yunìs, a m tʉr njɛ̀ɛ rbyemì ca. Mɛ̀ rìŋ mɛnɛ à tʉr njɛ̀ɛ rbyemì ca sè'ni. 6A mbùu ce m ce kuushi wɛ̀ enɛ à yɛɛsi bfee rfà' ce Nyʉ̀ à m fa nè wɛ̀ à nòŋ ce mɛ̀ m la' mmbo mbe wɛ̌ tù nà. 7M ce làa wa'a njobè' Nyʉ̀ à fa sèe ba yʉ' ce yi gèe sèe ce wɛp buu ka', e fa sèe ba yʉ' ce yi gèe sèe tʉr ŋger ba ntee rkòŋnì ker ba ntee ce àtà yi gee sèe tʉr ŋger mbendù yìsèe nyor.

8Banɛ à fa koosi rìtu à rsuŋ bèe àmbò yìsèe Tata Jisòs, kɛ̀ koosi rìtu njo' mɛ̀ ce m yu mbe shaŋ njo' ye ka'. Yɛ ŋgɛ' njo' Nsuŋ Mbòŋmboŋ à ŋger Nyʉ̀. 9E gèe sèe à lûŋ, a kɛ' sèe enɛ sèe cu rcu rrara, à ke' ba njo' rfà' mo' ce sèe à gèe nè ye ka'. E m kɛ' sèe ba àmbò e m lɛ̀ enɛ yi ba, ker ba njobè' Jisos Krâis. E m kwà'shi buu ca tɛ ŋgòŋ yi ka' kè ba. 10À ka' ba sè'ni na ce Jisos Krǎis ce e gèe sèe à lûŋ, à vʉ̀ na, buu ca à yɛɛtì àwaŋ. Jisos Krǎis ca à m so rkwe a vʉ nè ryòŋ ce àtà li ke mi ka'. Sèe yi buu ca njo' Nsuŋ Mbòŋmboŋ ce a ce fè'shi. 11Nyʉ̀ à m ce mɛ̀ njo' Nsuŋ Mbòŋmboŋ ca, enɛ m fe'shî, ba ŋwɛ̀ ntuu nè Jisòs, ker ba ŋwɛ̀ ryɛ'nì. 12M ce yɛ ŋgɛ' njo' Nsuŋ Mbòŋmboŋ ca, a ka' ce yɛ wa'a, a ce koosi rìtu ka' njobè' m rìŋ ŋwɛ̀ ce mɛ̀ byemi nè ye, a riŋ mɛnɛ e be kupshi mfà' ce e fa mba mɛ̌ mmbò nà lɛ̀ dù bà' nòŋ ce Jisòs be vʉ̀. 13Kù tɛɛ ba njep blǎa mini àmbò Jisos Krǎis ce wɛ̀ m yu' ese mɛ̀ nà. Gèe tɛ lo rbyemì ba rkòŋ ce wɛ̀ kòŋ bèe njo' Jisos Krǎis nà li yɛɛti. 14Nyʉ̀ à fa nsuŋ ca ce yu nsuŋ mbòŋmboŋ sê, mba wɛ̌ mmbò. Lòr nfè' fà dì' ŋwɛ̀ mò' kupse nsuŋ anà ka'. Lor nfè' ba à ŋger Yʉ' Rara ce yi yu njep wɛ̌ ntee.

15Wɛ̀ rìŋ wɛnɛ běe à ŋgòŋ Ɛshà wɛɛwɛ a mà'shi mɛ̀, mɛ̀ ba mamŋgi'. Bèe mo' efa wowèe à m ba Fugɛlòs ba Ɛ̀mogɛnìs. 16-17M ce loo mɛnɛ Tata Nyʉ̀ koosimnse nè ndap Ònisiforòs wɛɛwɛ, njobè' a ŋwɛ̀ ce e m mà'shi mɛ̀ ka', a ke' koosi rìtu njobè' mɛ̀ m ba mbe shaŋ ka'. E m bà' à to' Rum, a lor nfè' a roo mɛ̀ a yɛ. E m yɛ mɛ̀ wa'a a fa mɛ ŋger sê. 18M ce loo mɛnɛ Tata Nyʉ̀ gèe tɛ Tata Jisos Krǎis koosimnse nè ye à nòŋ ce e ka' vʉ̂. Wɛ̀ rìŋ enɛ e m jà' mɛ̀ à to' Ɛfɛsòs à mnduunjì jɛɛ jɛ̀ɛ jɛɛ.

Currently Selected:

Ñwaè' Timotïì Ce Embenjïì 1: LNT

Highlight

Copy

Compare