Ñwaè' Timotïì Ce Entombïì 6

1Bèe ce a yu bkwàa, a ce yɛ ŋgɛ', a ba lòr wap mmasà àmbò bèe ce wowèe a ba yu'ni nè wowèe bòŋboŋ sê, fà dì' ŋwɛ̀ lo làa yuu bebep kùu Nyʉ̀ ker ba buu ce wèr ce yɛ'ni bèe na ka'. 2Bkwàa ce wap mmasà a yu ŋgǎa rbyemì nà a fa lòr wap mmasà àtɛ̀r njobè' wowèe a yu bfʉr enjep Jisos Krǎis ka'. Wowèe a ba fà' nè wap mmasà anà bòŋboŋ sê, njobè' bèe ce a ce ye sɛ' efa lap rfà' yu bèe ce a ku ba ŋgǎa rbyemì àmbò wowèe, à ba bèe ce wowèe a kòŋ.

Yɛ'ni bèe buu ca, cep wowèe tɛ a bo gèe vi. 3Ŋwɛ̀ à ka' yɛ'ni yuu mo' jɛɛ, ke' byemi blàa ce Jisòs à m làa ker ba ryɛ'nì ce li gèe bèe a ce rìŋ Tata Nyʉ̀ ka', 4banɛ ŋwɛ̀ anà ce nàa tu, a riŋ yuu ka'. E ce seŋ buu, a ce sɛr mnsɛr à mʉ blàa jɛɛ jɛ̀ɛ jɛɛ. Cena yi gèe bèe a ce ko'ndoŋ, a ce lapni, a ce cɛpni, bèe a ce kwà'shi bebep kuu bèe mo'. 5Cena foŋ yi gèe bèe ce map mkwà'shì mi jep a ker riŋ yuu mini ka', a ce sɛr mnsɛr. Wowèe a ce kwà'shi ba enɛ buu Nyʉ̀ yu buu ce a be koni sɛ' enjo.

6Geewa'a, ŋwɛ̀ à ka' ce cu rcu ce Nyʉ̀ kòŋ, yuu ce e tʉr yi ghɛɛtè ye, banɛ ŋgàŋ à koni sɛ' sê. 7Sèe à m ce vʉ̀ njep ŋgòŋ na, a tʉr yuu mo' ka'. Sèe be kè ce dù tɛ sèe lor yuu mo' enjo ka'. 8Sèe à ka' tʉr bcɛ̀' ba byee, sèe ma'shì tɛ vi ghɛɛte sèe. 9Bèe ce a kòŋ à rkù' à buu a lo gwe rmòoshì, kwe à taa. Taa ce wowèe a lò kwe àgho na, yu ba buu ce wowèe a kòŋ nè blʉr-ŋwɛ̀, ŋgɛ' à ba njo. Buu ce wowèe a kòŋ nè blʉr-ŋwɛ̀ na yu buu ce vi ke sùusi bèe njep nshè, bepsi wowèe dʉ̀dʉ̀. 10Broŋ mbàa yu mŋgàŋ efa buu bbebep wɛɛwɛ. Bèe mo' a kòŋ à rtʉr mbàa sê, a ka' ce kòŋ wa'a, a da' njì rbyemì, a ce seŋ ba buu, wap ntee vi ce fa wowèe ŋgɛ'.

11À ka' ba yi àmbò wɛ̀ ce à yu ŋwɛ̀ Nyʉ̀, caŋ efa gee buu ca. Lɛ̀ ntee ce gee ba ŋgěe yɛɛnì, cu ba rcu ce Nyʉ̀ kòŋ, lɛ ntee nè Nyʉ̀, koŋ bèe, tɛɛ tatap, ba mʉfɛ̀ɛ à yo ŋgèe. 12Caŋ mcaŋnǐ mbòŋmboŋ ce à rbyemì, so ryòŋ ce nfesè ce Nyʉ̀ à m kɛ' wɛ̀ enɛ à bo koni. Nyʉ̀ à m kɛ' wɛ̀ enɛ à bo koni njɛ̀ɛ ryòŋ ca, wɛ̀ konì li nyʉ̀ ce wɛ̀ m làa à mʉ̀ bèe enɛ wɛ̀ byemi, Nyʉ̀ à yu' rbòŋ nà. 13M ce làa nè wɛ̀ à bsii Nyʉ̀ ce e ke gèe buu wɛɛwɛ ba btèe, ba à bsii Jisos Krǎis ce e m làa bòŋboŋ à bsii Pontos Pailɛ̀t. 14M ce làa enɛ à gee buu ce mɛ̀ làa na, ke' co' mo' embo ka'. Gèe vi yɛɛnì caar du ba' à nfè' ce Tata Jisos Krǎis be vʉ̀. 15Nyʉ̀ be gèe tɛ Jisos Krǎis vʉ à nfè' ce e m lɛ̀. Nyʉ̀ ca yu Nyʉ̀ ce bèe a ba ce nɛ̀si, yu ye ce e ce sa' cà'cà'. E yu ŋkʉʉ nè bkʉʉ wɛɛwɛ, a ba Tàr nè btàr wɛɛwɛ. 16Ku ba ye ce àde' e kwe ka', a ce cu ba à rraa ce àde' ŋwɛ̀ ba' àtʉtʉ efa gho ka'. Ŋwɛ̀ à m be yɛ ye ka', àde' ŋwɛ̀ yɛ ye ka'. Tɛ bèe a yu'ni nè ye, tɛ yi ŋger yi cu nfesè. Yi yu wa'a.

17Làa nè bèe ce a kù' à buu enjep ŋgòŋ na enɛ wowèe a fa nàa tu kɛ̀ lɛ̀ mmir mbendù bkù' ka', njobè' ŋwɛ̀ mò' rìŋ àyàŋsè ka'. Làa nè wowèe enɛ wowèe a lɛ map mmir ba mbendù Nyʉ̀ ce e yu mmbo mntoo a ce fa sèe buu wɛɛwɛ tɛ sèe bo yu' rbòŋ àgho. 18Làa nè wowèe enɛ wowèe a gee buu bbòŋboŋ, ku' à mfǎ' mmbòŋmboŋ, ba mmbo mntoo, koŋ foŋ à rgàp yàp buu a bèe mo' wèe. 19Wowèe a ka' gee wa'a tɛ yi bo ba enɛ wowèe a kupshi buu ce vi be jà' wowèe à nfè' ce e bii ka' vʉ̀ nà, a lɛ bòŋboŋ, tɛ wowèe a bo so ryòŋ ce yu ryǒŋ mini.

20Timotì, ke'ni buu ce Nyʉ̀ à fa mba wɛ̌ mmbò na bòŋboŋ. Fa fa yo cùu njep mʉ̀ bde' bcicì ba mnsɛr ce bèe a ce kwà'shi enɛ yu bfee nà ka'. 21Bèe mo' à làa enɛ a tʉr njɛ̀ɛ bfee ca, a ka' ce làa wa', a da' njì rbyemì. M ce loo mɛnɛ Nyʉ̀ tʉr wèe à ntee bòŋboŋ.

Currently Selected:

Ñwaè' Timotïì Ce Entombïì 6: LNT

Highlight

Copy

Compare