Ñwaè' Timotïì Ce Embenjïì 2

1Wɛ̌ Timotì ce à yu muu wà, Nyʉ̀ à tʉr wɛ̀ à ntee bòŋboŋ. Wɛ̀ konì sɛ' efa gho njo' Jisos Krâis. Banɛ à tɛɛ tatap. 2Buu wɛɛwɛ ce wɛ̀ m yu' àmbò m ce yɛ'ni bèe nà, lòr vi fa mbà mmbo bèe ce wɛ̀ rìŋ enɛ a yu mini, a riŋ foŋ enɛ wowèe a ghɛɛte à ryɛ'ni bèe mo'. 3Lòr yo dì' yɛ ŋgɛ' àmbò ŋwɛ̀ soogɛ̌ mbòŋmboŋ nè Jisos Krâis. 4Àde' ŋwɛ̀ soogɛ̌ mbòŋmboŋ cu àmbò běe à là' a ke cu nà ka', njobè' yi yu enɛ e gee ba yuu ce yi bòŋ yì ŋwɛ̌ ŋgòr. 5Kwà'shi ka àmbò ŋwɛ̀ mcaŋnì, e ka' tɛ lɛ̀ mncir ce a lɛ̀ nè ŋgǎa mcaŋnì ka', e so ka'. 6Ŋwɛ̀ nfà' mnsuu ce e fà' tatap à ba ba ŋwɛ̀ entombì à rye efa buu ce e fà' à mŋkʉ̀. 7Kwà'shi àmbò buu ce mɛ̀ suŋ wɛ̀ na, tɛ Tata ku gee tɛ à riŋ vi.

8Kuushi enɛ Jisos Krǎis ce e m ba ŋwɛ̀ embe ndʉ̀' Dɛvìd à m fʉʉ efa rkwe. Ca yu Nsuŋ Mbòŋmboŋ ce m ce fè'shi nè bèe. 9M ce yɛ ŋgɛ' ca mbe shaŋ àmbò ŋwɛ̀ ce e bʉ' lɛ ncir wa'a njo' Nsuŋ Mbòŋmboŋ anà. Ka' a kur mɛ̀ nè bkwàŋ wa'a, àde' a kur blǎa Nyʉ̀ ka'. 10M ce yɛ ŋgɛ' ca tɛ bèe ce Nyʉ̀ à ce a bo byemi nè Jisos Krâis, koni ryǒŋ rfi, koni bkù' ce vi be kè mì ka'. 11Blàa ca vi yu mini.

“Sèe ka' kwe sèe Jisòs wèe,

sèe ke cu sèe wowèe.

12Sèe ka' tɛɛ tatap du ba' àlʉ̀simbùu,

sèe Jisòs wèe ke sa' àbee.

Sèe ka' kani ye, ye ye ke kani sèe.

13Sèe ka' tɛ ba mini nè ye ka',

àde' e kupse efa rba njɛ̀ɛ ŋwɛ̀ ce e yu na ka'.

E be kù ba yi yu mini à nfè' wɛɛwɛ.”

14Kuushi bèe buu ca, ker cep wowèe à rlii Tata Nyʉ̀ enɛ a fa ce sɛr mnsɛr à mʉ blàa jɛɛ jɛ̀ɛ jɛɛ ka'. Njɛ̀ɛ mnsɛr anà vi tʉr sɛ' ka', vi ke bepsi bèe ce a ce yu'. 15Ghèter gee ŋgěe bòŋboŋ nè Nyʉ̀ tɛ e bo yu' rbòŋ nè wɛ̀. Ba ŋwɛ̀ rfà' ce àde' rìtu yi koo ye ka', ker ba ŋwɛ̀ ce e be ce yɛ'ni bèe blǎa mini yɛɛnì. 16Fa fa yo cùu njep mʉ̀ mnsɛr ka'. Àde' mnsɛr anà vi gee ŋwɛ̀ riŋ Nyʉ̀ ka', vi lò gee bèe ce a ce sɛr vi a misì mɛŋni Nyʉ̀ mɛŋni. 17Njɛ̀ɛ mnsɛr ca vi lò ba àmbò nfur ce e ke lò beeŋger à kòtɛ nà. Bèe mo' efa mʉ̀ ŋgǎa mnsɛr ca yu Hàmɛneyòs ba Fìlɛtòs. 18Wowèe a dà' njì, a ce yɛ'ni bèe enɛ bèe à m fʉʉ efa rkwe war. Wowèe a yɛ'ni wa'a a ce gèe bèe mo' a ce tarni yuu ce wowèe a m byemi. 19Ka' bèe anà a ce tarni wa'a, blǎa Tata Nyʉ̀ vi yu mini, àtà vi kupsè ka'. Vi yu àmbò kùundap wa'a, a saŋ mbo enɛ̂, “Tata Nyʉ̀ rìŋ bèe ce a yu yì bèe.” A ker saŋ mbo enɛ̂, “Ŋwɛ̀ ce e ka' ce làa enɛ e ce dù àmbùu Tata Jisòs banɛ ŋgàŋ fa kèr gèe buu bbebep ka'.”

20E ke ba mbe ndàp ŋwɛ̌ ŋgòr, bghee bbòŋboŋ ba mkǐŋ mmbòŋmboŋ ce a gèe nè bco', ker ba mkìŋ ce a ku boo ba nè mboo mi ku ba mbo. A lò lor bghee ba mkǐŋ mmbòŋmboŋ lɛ byee njo nè bkèe, lor mkìŋ ce a ku boo ba nè mboo nà lɛ byee njo nè ŋgǎa ndap. 21Ŋwɛ̀ ka' borni efa rgèe buu bbebep, e ba àmbò bghee bbòŋboŋ ba mkǐŋ mmbòŋmboŋ cà. E yu ŋwɛ̌ nrara ce àde' Nyʉ̀ lor gee rfà' àgho, njobè' e tami nyor à rgèe mfǎ' mmbòŋmboŋ ce Nyʉ̀ ce kòŋ enɛ e gee nà à nfè' wɛɛwɛ. 22Fa kè gèe ŋgèe rnsùu ka'. Gèe ba ŋgěe yɛɛnì, foosi nè Tata Nyʉ̀, tʉr ntee rkòŋnì ba ntee cumʉnyaŋ. Wɛ gèe wa'a, yi ba enɛ à ce gèe àmbò bèe wɛɛwɛ ce a ce kɛ' rlii Jisòs nè ntee rara a ce gèe nà.

23Fa fa yo cùu njep mnsɛr ka'. Nsɛr yu yuu blʉr ce vi ke vʉ̀ ba nè mlap. 24Ŋwɛ̀ ka' ba ŋwɛ̀ rfà' nè Tatâ, ŋgàŋ fa ba ŋwɛ̀ mnsɛr ka'. E ba ba ŋwɛ̌ nyɛɛnì, ba ŋwɛ̀ ce e rìŋ à ryɛ'nì, ba ŋwɛ̀ ce e kur ntee. 25Bèe mo' a ka' kani yuu ce e ce suŋ wowèe, e lor nfè' nashi nè wowèe njobè' àde' Nyʉ̀ gee wowèe a kupsè yap ntee lo byemi yuu ce yi yu mini, 26tɛ wap bfee vi bo kʉti wowèe mbo, tɛ wowèe a fʉʉ enjep taa Satàn ce yi m koo wowèe, a gee wowèe a ce yu'ni ba nè ye nà.

Currently Selected:

Ñwaè' Timotïì Ce Embenjïì 2: LNT

Highlight

Copy

Compare