Ñwaè' Beâe Koreèn Ce Embenjïì 1

1Ŋwà' ca ce saŋ mɛ̌ Pôl, ce m yu ŋwɛ̀ ntuu nè Jisos Krâis. Nyʉ̀ a ŋwɛ̀ ce e m gèe enɛ m ba ŋwɛ̀ ntuu nè Jisòs. Wèr Timotì ce e yu nfʉr yìsèe ce saŋ ŋwà' ca nè cor Nyʉ̀ ce e yu à rla' Korèn, ker ba nè bèe Nyʉ̀ wɛɛwɛ ce a yu à ŋgǒŋ Àkayà wɛɛwɛ. 2Nyʉ̀ ce e yu yìsèe Tâ, ker ba Tata Jisos Krâis, tʉr wèe à ntee bòŋboŋ, ker fa wèe cumʉnyaŋ.

3Sèe yoŋshi Nyʉ̀ ce e yu Tàr nè yìsèe Tata Jisos Krâis. E yu Tàr ce e ke koosimnse nè bèe, ker ce fa bèe ŋger à nfè' wɛɛwɛ. 4E ke fa sèe ŋger à nfè' wɛɛwɛ ce sèe ka' ce yɛ ŋgɛ'. E ke gèe wa'a enɛ ŋwɛ̀ mò' foŋ à ka' ce yɛ ŋgɛ', sèe bo fa ŋgàŋ ŋger nè ŋger ce sèe à koni ese ye. 5Ndèe ce sèe à ka' yɛ njɛ̀ɛ ŋgɛ' ce Jisos Krǎis à m yɛ, ka' ŋgɛ' anà à ka' ba gòr se ɛ̀, banɛ a ndèe ce sèe be koni ŋger njo' ye. 6Wèr ka' ce yɛ mlù, wèe riŋ enɛ wèr ce yɛ tɛ mi bo fa wèe ŋger, kèr gèe tɛ wèe lûŋ. Nyʉ̀ à ka' fa wèr ŋger, banɛ wee wèe foŋ be koni ŋger anà tɛ wèe bo kur ntee, tɛɛ tatap njep ŋgɛ' ce wèe ce yɛ àmbò wèr ce yɛ na. 7Wèr tʉr ntee njep wèe sê, a riŋ nè mini-ŋwɛ̀ enɛ àmbò wèe ce yɛ ŋgɛ' àmbò wer wèr ce yɛ na, wèe be koni ŋger ce wèr à koni foŋ nà ese Nyʉ̀.

8Bfʉr wâ, wèr ce kòŋ enɛ wèe riŋ njɛ̀ɛ ŋgɛ' ce wèr à m yɛ à ŋgǒŋ Ɛshà. Ŋgɛ' anà à m tap sê, a ba àmbò ntɛ̀r ce yi m rìr a caa yer ŋger wa'a, wer à lo a ce kwà'shi enɛ ŋwɛ̀ be cu ntèe ka'. 9Wèr à m ce kwà'shi enɛ wèr à kweŋger wɛɛ. Geewa'a, ŋgɛ' ca à m koni wèr tɛ wèr bo kù lɛ̀ buu wɛɛwɛ mbe mmbo Nyʉ̀ ce e ke fʉr bèe efa rkwe, ke' ba mbe wěr mmbò ka'. 10E fʉr wèr efa ŋgɛ' ce e m ba yʉ wèr. E be kèr fʉr wèr. Wèr à lɛ̀ mmir ba mbe yě ndù enɛ ku ba ye ce e be kù ce fʉr wèr efa njɛ̀ɛ ŋgɛ' anà. 11Wee wèe foŋ à ba jà' à rloo nè wèr. Wèe à ka' loo, banɛ bèe magòr a be yòŋshi Nyʉ̀ njo' yuu bòŋboŋ ce Nyʉ̀ à yu' misèe mloo, a gèe nè wèr.

12Yuu mo' yi yu ce wèr ce nàa tu àgho, a ke' ce tarni ka'. Yuu anà yi yu enɛ wèr à cu njep ŋgòŋ na, laŋlaŋ à nfè' wèr à m ba a wěe mʉ nè ntee rara ba mini ce e lò ese Nyʉ̀. Wèr à cu wa'a ba nè bfee enjep ŋgòŋ na ka', wèr à cu ba njo' ntee bòŋboŋ ce Nyʉ̀ tʉr nè wèr. 13-14Mŋwà' ce wèr à saŋ nè wèe nà, buu embo wɛɛwɛ vi yu brara, a ba kùyɛɛ. Wèe à be riŋ wèr sè'ni na bòŋboŋ ka'. Banɛ m ce kwà'shi mɛnɛ wèe be lò rìŋ wèr bòŋboŋ tɛ wèe bo lò nàa tu nè wèr àmbò wèr be lò nàa nè wèe foŋ à nòŋ ce Tata Jisòs be vʉ̀.

15M rìŋ mɛnɛ wèe be lò rìŋ wèr bòŋboŋ. Yi ka' ba wa'a, mɛ̀ kwà'shi mɛnɛ m be cà'ni wèe entòmbì tɛ wèe bo lu'shi ŋkàrà' baa. 16Mɛ̀ m kwà'shi mɛnɛ m be ce dù à ŋgǒŋ Mɛ̀sɛ̀donìyà tɛ m caa cà'ni wèe mɛ ce kʉti, ker ca'ni wèe, tɛ wèe bo mà'shi mɛ̀ tɛ m du à ŋgǒŋ Jùdiyà. 17Seemò' àmbò mɛ̀ m kʉti a vʉ ka' nà, wèe ce kwà'shi enɛ m yu njɛ̀ɛ ŋwɛ̀ ce e ke kupse ntee àfo àfo. Wà' m ka' ce kwà'shi yuu ce m be gèe, m kwa'shì àmbò bèe enjep ŋgòŋ na ce a ke byemi yuu, ker lo kani nà a? 18Yi yu wa' ka'. Àmbò sèe rìŋ enɛ Nyʉ̀ yu ŋwɛ̀ mini, banɛ àde' wèr byemì à rgèe yuu ker lo kani efa rgèe yi ka'. 19Jisos Krǎis ce e yu Muu Nyʉ̀, yu ŋwɛ̀ ce e ke byemi ker kani ka'. Yu ye ce wèr Timotì ba Silàs à m ce fè'shi àmbò ye à nfè' ce wèr à m ba a wěe mʉ nà. E yu ŋwɛ̀ ce e ce dùŋshi enɛ Nyʉ̀ e ke làa enɛ ɛ̀no, ku tɛɛ ba njo, 20njobè' e ce dùŋshi enɛ Nyʉ̀ à byemi enɛ e be gèe buu wɛɛwɛ ce e kà'. Banɛ sèe ce làa enɛ̂, “Yi yu wa'a” ba njo' ye. Sěe làa wa'a, ce ku'si ba Nyʉ̀. 21Yu ye Nyʉ̀ ce e gèe sèe à tɛɛ tatap njep Krâis. Yu ye ce e ce sèe à yì bèe, 22a ker fa sèe ncòo ce e ce dùŋshi enɛ sèe yu yì bèe. E fa yi Yʉ' njep sěe mntee, yi ba àmbò yuu ce e tɛr nè sèe enɛ sèe be koni buu wɛɛwɛ ce e kà' enɛ e be kè fa nè sèe.

23Mɛ̀ m vʉ̀ à rla' Korèn ka' fà dì' m bo lò gèe tɛ nyor bep wèe ka'. M ce kɛ' Nyʉ̀ enɛ e tɛɛ yà njìnsa' enɛ yuu ce m ce làa na yi yu mini. 24Yi yu enɛ wèr be vʉ̀ lòr ba ŋger ka' suŋ wèe yuu ce wèe byemi ka', njobè' wèe à tɛɛ tatap njep le rbyemì. Ler rfà' li yu ba enɛ wèr ja' wèe tɛ wèe bo yu' rbòŋ.

Currently Selected:

Ñwaè' Beâe Koreèn Ce Embenjïì 1: LNT

Highlight

Copy

Compare