Ñwaè' Beâe Koreèn Ce Embenjïì 2

1A mbùu ce mɛ̀ m kwà'shi mɛnɛ àde' m ker vʉ ca'ni wèe ka', fà dì' m lo gèe tɛ nyor bep wèe ka'. 2M ka' gee nyor bep wèe, ŋwɛ̀ ce àde' e ka' gee nyor boŋ mɛ̀ ba nda, caa efa wèe ce mɛ̀ gèe nyor à bep wèe nà? 3A mbùu ce mɛ̀ m saŋ ŋwà' anà nè wèe, fà dì' m ka' vʉ ca'ni wèe tɛ yi lo ba enɛ bèe ce m ce kwà'shi mɛnɛ wowèe a ba gèe nyor boŋ mɛ̀, a lo ba ba bèe ce a be gèe tɛ m lo yu' ba ryaŋ ka'. M rìŋ mɛnɛ m ka' ce yu' rbòŋ banɛ wèe ce yu' rbòŋ foŋ. 4Mɛ̀ m saŋ ŋwà' anà nè wèe, a ce koosimnse, ntee yi ce fa mɛ̀ ŋgɛ', mŋgoommir mi ce sùu mɛ̀ ekù tù. Mɛ̀ m ce saŋ yi tɛ m bo gèe tɛ nyor bep wèe bep ka'. Mɛ̀ m saŋ yi tɛ wèe bo rìŋ enɛ m kòŋ wèe sê.

5Ŋwɛ̀ ka' gee yuu ce ntee yi bep bèe, banɛ ŋgàŋ à gèe ba nè mɛ̀ ka'. E gèe yuu anà gòr ba nè wèe wɛɛwɛ. Banɛ m ker laa tatap àmbò yuu anà ka'. 6Ŋgɛ' ce bèe magòr efa wěe mʉ a fa nè ŋgàŋ à ghɛɛ. 7Banɛ yuu ce wèe à ba gèe nè ŋwɛ̀ anà sè'ni yi yu enɛ wèe à ba fòosi ye, fa ye ŋger fà dì' bsɛ̀ vi lo koo ye ka'. 8M ce bu' mmbo nè wèe enɛ wèe gee tɛ ŋgàŋ riŋ enɛ wèe ku bii kòŋ ye. 9Mɛ̀ m saŋ ŋwà' anà tɛ m bo mòoshi wèe, yɛ mɛnɛ wà' wèe ce yu'ni nè mɛ̀ à buu bsìp lɛ. 10Wèe à ka' foosi ŋwɛ̀, banɛ mɛ̀ fòosi ye foŋ. Yi ka' ba enɛ ŋwɛ̀ à gèe yuu ce m foosi ye, m foosì ye à bsii Krǎis njo' wèe, 11fà dì' Satàn lo tʉr ŋger mbe sěe ndù ka'. Sèe rìŋ enɛ Satàn yu kwɛ̀ɛ.

12Mɛ̀ m dù à rfè'shi Nsuŋ Mbòŋmboŋ àmbò Jisos Krǎis à rla' Trowàs, a ka' ba àfo, a yɛ mɛnɛ Tata Nyʉ̀ à mʉ̀' nduunjì nè mɛ̀ àfo à rfà' nè ye. 13Ka' yi m ba wa'a, ntee yi bu' mɛ̀ se njobè' mɛ̀ m yɛ nfʉr yà ce Taitòs ka'. Mɛ̀ ka' yɛ ye ka', a daasi wowèe a du à ŋgǒŋ Mɛ̀sɛ̀donìyà.

14Banɛ sèe yoŋshi Nyʉ̀ njobè' sèe à ka' ce dù ba fɛ, e ku tɛɛ kùntombì nè sèe. E tɛɛ wa'a, sèe ce jɛ̀r àmbò bèe ce a ce jɛ̀r mbe ŋgoo bèe Jisòs, Jisòs à tɛɛ entombì a ce vʉni. Nyʉ̀ à lòr sèe a gee nsuŋ àmbò Jisòs à du à bdì' wɛɛwɛ àmbò nrɛ̀ɛ ce a too e rʉʉ bòŋboŋ sê, a du à bdì' wɛɛwɛ. 15Nrɛ̀ɛ ce Jisòs ce tòo nè Nyʉ̀ anà yuu sèe. Nrɛ̀ɛ anà yi ce rʉ̀ʉ à mʉ̀ bèe wɛɛwɛ, kɛ̀ yu bèe ce a be lùŋ ɛ̀, kɛ̀ yu bèe ce a be bʉ ɛ̀. 16Rʉ̀ʉ efa gho yi yu nè bèe ce a ce bʉ àmbò rʉ̀ʉ ce àde' yi yʉ ŋwɛ̀, a ba nè bèe ce a be lùŋ àmbò yuu ce àde' yi gee ŋwɛ̀ e cu ntèe. Àmbò yi yu wa' na, banɛ ŋwɛ̀ ce e ghɛɛte à rgèe njɛ̀ɛ rfà' ca yu nda? 17À ka' ba yi àmbò wèr, wèr yu àmbò bèe mo' ce a lòr blǎa Nyʉ̀ à ba yuu ntaa nà ka'. À tuu ba Nyʉ̀ a tuu wèr, wèr à ce fè'shi vi blàa a yě bsii nè mini-ŋwɛ̀, à rlii Krâis.

Currently Selected:

Ñwaè' Beâe Koreèn Ce Embenjïì 2: LNT

Highlight

Copy

Compare