Ñwaè' Beâe Koreèn Ce Entombïì 16

1À ka' ba àmbò mbàa ce wèe ce kùu tɛ wèe bo jà' bèe Nyʉ̀ ce à rla' Jɛ̀rusalɛ̀m àgho nà, wèe ku kuu ba à njɛ̀ɛ njì ce mɛ̀ m làa nè bcor à ŋgǒŋ Gàlɛshà enɛ a kuu nà. 2E ba à nòŋ entòmbì enjep ŋgàa ŋwɛ̀ wɛɛwɛ lor ŋgʉ̀' mò' efa mbàa ce Nyʉ̀ à ghòni ye àgho, lɛ̂, fà dì' m ka' vʉ tɛ bèe a bo kèr lòr nfè' mò' à rkùu mbàa ka'. 3Gèe nè wa'a, mɛ vʉ̀ bo saŋ ŋwà', lòr mbàa ce wèe à kùu nà kyèse àgee ŋwà' anà tuusi nè bèe ce wèe à ce tɛ wowèe a du àgho à rla' Jɛ̀rusalɛ̀m. 4Yi ka' ba yɛɛnì enɛ mɛ mɛ̀ dû, wèr wowèe du bsìp.

5M ce kwà'shi à rdù njǐ à ŋgǒŋ Mɛ̀sɛ̀donìyà ka' vʉ̀ cà'ni wèe. 6M ce kwà'shi mɛnɛ m ka vʉ̂, sèe cu à mʉ nfè' mò', seemò' àde' sèe ku cu nfè' kìntòo mî. E mì wɛɛ, wèe ja' mɛ̀ m du fàdì' m kòŋ à rdù. 7M kòŋ mɛnɛ m ka' ba vʉ ba' yɛ wèe m ku càa ce dù ka'. M ce kwà'shi mɛnɛ m ka' vʉ̂, sèe cu nfè' njìsàp, ce Tata Nyʉ̀ ka' fa ŋger. 8M be cu à rla' Ɛfɛsòs na bà' à nòŋ Ŋkǎ' Pɛntikòs. 9M tʉr fɛŋ à rgèe rfǎ' rbòŋboŋ àfa, ka' bèe magòr a yu ce a kòŋ à rjepsi la rfà' wa'a.

10Timotì ka' vʉ̂, wèe konì ye bòŋboŋ sê, tɛ e bo wɛp yuu mo' ka', njobè' ye ye ce fà' foŋ ba nè Tata àmbò mɛ̀. 11Ŋwɛ̀ mò' fa lòr ye àtɛ̀r ka'. Jà' nè ye tɛ e jɛr bòŋboŋ dù fàdì' e ce dù tɛ e bo kʉti vʉ̀ yɛ mɛ̀ àfa. Wèr bfʉr ce àfa wèe ce kè' ye. 12À ka' ba àmbò nfʉr wěr Àpolòs, mɛ̀ loo ye se enɛ e vʉ a bfʉr mo' wèe vʉ ca'ni wèe, e yɛ yi enɛ yi yu bòŋboŋ enɛ e vʉ sè'ni ka'. E ka' lo koni nfè', e ka' vʉ̂.

13Tami nyor, tɛɛ tatap à lo rbyemì. Fa wɛp yuu ka', ba nè ŋger-ŋwɛ̀. 14Gèe nè buu wɛɛwɛ nè rkòŋnì-ŋwɛ̀.

15Bfʉr wâ, wèe rìŋ enɛ Stɛfɛnàs ba bèe embe yě ndàp a m ba bèe entombì efa mʉ̀ běe à ŋgǒŋ Àkayà ce a m bèeŋger à ŋgǎa rbyemì. Wowèe a m fa wâp mnyor à rjà' bèe Nyʉ̀. 16M ce bu' mmbo nè wèe enɛ wèe yu'ni nè njɛ̀ɛ bèe ce a yu àmbò wowèe. Ker yu'ni nè bèe ce a wowèe a ce fà' àbee. 17M ce lu'shi njobè' Stɛfɛnàs, Fòtunatòs ba Àkaikòs a vʉ̀ a yɛ mɛ̀ àfa. M ce lu'shi njobè' mɛ̀ yɛ wowèe, yi ba àmbò mɛ̀ yɛ lɛ ba wèe wɛɛwɛ wa'a. 18Wowèe a m fa mɛ̀ ŋger àmbò a m ce fa wèe nà. Njɛ̀ɛ běe wa'a yu bèe ce a ba yu'ni nè wowèe.

19Bcor à ŋgǒŋ Ɛshà wɛɛwɛ vi cà'ni wèe. Àkwilà ba Prǐskà ker ba bèe ce a ke niŋ cor mbe wǎp ndàp a cà'ni wèe se à rlii Tatâ. 20Bfʉr ce àfa wɛɛwɛ a cà'ni wèe. Cà'ni nè bfʉr mo' ba mo', baa wowèe nje nyòr nè rkòŋnì-ŋwɛ̀. 21Rcà'nì ca à saŋ mɛ̌ Pol nè ya bo. 22Ŋwɛ̀ ce e ka' tɛ kòŋ Tata Jisòs ka', ndòo co' ye. Yèr Tatâ, vʉ̀. 23M ce loo mɛnɛ Tata Jisòs tʉr wèe à ntee bòŋboŋ. 24Mɛ̀ kòŋ wèe wɛɛwɛ njobè' sèe wɛɛwɛ yu àbee sèe Jisos Krǎis wèe. Yi yu wa'a.

Currently Selected:

Ñwaè' Beâe Koreèn Ce Entombïì 16: LNT

Highlight

Copy

Compare