Ñwaè' Timotïì Ce Entombïì 5

1Fa lapni nleeŋwɛ̀ ka', cep ye àmbò àde' à cep yò tâ. Gèe yuu ce àde' à gee nè bfʉr wo nè boo mnsùnsù. 2Gèe yuu ce àde' à gee nè yo mâ, nè bbyèŋge ce a yu bleebèe, gee yuu ce àde' à gee nè bjar wo nè bbyèŋge ce a yu bleebèe ka' nà. Cu wèe wowèe à njǐ yɛɛnì.

3Jà' byepkʉʉ ce a yu byepkʉʉ nè mini-ŋwɛ̀. 4Ŋgwaŋkʉŋwɛ̀ à ka' tʉr boo kɛ̀ mmbishì ɛ̀, banɛ boo ca kɛ̀ mmbishì ca ɛ̀, a ba ba bèe entombì à rjà' ye. Wowèe a ka' ja' ye banɛ wowèe a ce gèe yuu ce wowèe a yɛ'ni a kuu Nyʉ̀, tɛ yi ba enɛ njèe à rʉ̀ʉ a ce nyoŋ muu. Cena yu yuu ce Nyʉ̀ e ke yu' rbòŋ àgho. 5Ŋgwaŋkʉŋwɛ̀ ce e yu ŋgwaŋkʉŋwɛ̀ nè mini-ŋwɛ̀, a ke' tʉr ŋwɛ̀ ce e ja' ye ka', yu ŋgwaŋkʉŋwɛ̀ ce e lɛ̀ mi mmir mbendù Nyʉ̀ a ce loo nè ye à nfè' wɛɛwɛ enɛ e ja' ye. 6Ŋgwaŋkʉŋwɛ̀ ce e ka' ce ye yi ba rbòŋ enjep ŋgòŋ na, banɛ ka' e yu ntèe wa'a, e kwe. 7Làa buu ca nè bèe tɛ wowèe a bo cu rcu ryɛɛnì, fà dì' ŋwɛ̀ mò' bo làa yuu bebep kùu wowèe ka'. 8Ŋwɛ̀ à ka' tɛ jà' yì bèe ka', laŋlaŋ bèe embe yě ndàp, banɛ ŋgàŋ à kani buu ce e byemì, a bep a caa ŋwɛ̀ ce e byemi ka'.

9Ŋgwaŋkʉŋwɛ̀ à ka' tɛ càa bfè' mntuunfu kèr ba foŋ ba njeŋwɛ̀ ce e m ku tʉr nduu mò'sir ka', wèe fa saŋ li rlii à mʉ̀ mlii byepkʉʉ ka'. 10E be ba njeŋwɛ̀ ce bèe a rìŋ ye à mi mfǎ' mmbòŋmboŋ. E be ba njeŋwɛ̀ ce e m ce kè' à boo vi bòŋboŋ, a ce koni bèe mbe yě ndàp bòŋboŋ, a ce su'si mkùu bèe Nyʉ̀, a ce jà' ŋgǎa ŋgɛ', a ce fa nyor à rgèe mfà' wɛɛwɛ ce mi yu mmbòŋmboŋ.

11Wèe fa saŋ mlii byepkʉʉ ce a yu bleebèe ka' nà ka', njobè' wowèe a ka' lo ce kwà'shi gòr ba àmbò rbòŋ nyor caa rfà' e nè Jisos Krâis, wowèe a lo koŋ ba à rdù bgùu. 12Wowèe a dù bgùu banɛ wowèe a bʉ' mkà'ni ce wowèe a m gèe nà, a kɛ' ŋgɛ' mbe wǎp ndù. 13Wowèe a lo kòŋ ba à rcu à cicì, ce kar à mndap bèe mo' foŋ. Yi ka' ba wa'a, wowèe a lo kɛ̀' mnsa'ni, kèr ce jepsi ntà'tè bèe mo', ce làa buu ce wowèe a ba làa ka'. 14M ce cep byepkʉʉ ce a yu bleebèe ka' nà enɛ wowèe a du bgùu, bi boo, fyɛ' wap mndap bòŋboŋ fà dì' ŋwɛ̀ bbàa koni fɛŋ à rlàa yuu bebep kùu wowèe ka'. 15Bèe mo' efa wowèe a dà' njì wɛɛ, a du ba àmbùu Satàn. 16Banɛ ŋwɛ̀ rbyemì à ka' tʉr byepkʉʉ mbe yě ndàp, e fyɛ' à byepkʉʉ anà. E fa lɛ̀ ntɛ̀r ca mbendù cor ka', tɛ cor bo fyɛ' à byepkʉʉ ce a yu byepkʉʉ nè mini-ŋwɛ̀.

17Btu embe cor ce a ka' ce gèe lap rfà' bòŋboŋ banɛ wowèe a ghɛɛte à bèe ce cor à ba yu'ni nè wowèe jɛɛ, kèr fyɛ' à wowèe bòŋboŋ. M ce làa laŋlaŋ ŋgǎa rfè'shì ce a ce fè'shi blǎa Nyʉ̀, a ker ce yɛ'ni vi bòŋboŋ se nà. 18Ŋwǎ' Nyʉ̀ yi làa enɛ̂, “Fa kur cùu nà' ce e ce bu' msaŋ ka'.” Ŋwǎ' Nyʉ̀ yi ker laa foŋ enɛ̂, “Ŋwɛ̀ rfà' à ghɛɛte à rkoo vi blà'.” 19Ŋwɛ̀ à ka' laa enɛ tu embe cor yi gèe fàa, wèe fa byemi ka'. Geewa'a, bèe a mmbaa kɛ̀ bèe a mtaar ɛ̀, a ka' vʉ suŋ enɛ e gèe fàa ghup wèe ka' byemi. 20Bèe ce a ka' gee buu bbebep, banɛ a be lapni wowèe àwaŋ tɛ bɛr a bo wɛp.

21M ce làa cena nè wɛ̀ à bsii Nyʉ̀, ba à bsii Jisos Krâis, ker ba foŋ à bsii bcìndap Nyʉ̀ ce Nyʉ̀ à ce. M ce làa tatap sê, enɛ à gee buu ce m ce làa nè wɛ̀ na, ke' ce so'niŋgòŋ ka'. Gee nè bèe wɛɛwɛ yɛɛnì.

22Fa kàka à rla' mmbo mbendù ŋwɛ̀ ka'. Fa tʉr bo njep yuu bebep ce bèe mo' a gèe ka'. Gèe ŋgěe rara.

23Fa kù no ba mdip cà'cà' ka', no mʉ mrù' mʉcàr tɛ mi bo jà' wɛ̀ a rbʉ̀ ce li ce fa wɛ̀ ŋgɛ', à ce yaŋ cɛ'cɛ' se nà.

24Buu bbebep bèe mò' vi ke yàŋse yɛɛti, bèe à riŋ enɛ wowèe a be gwè mnsa'. Buu bbebep vi bèe mò' vi lò lor nfè' sê, ka' yɛɛti. 25Yi ku ba wa' foŋ nè buu bbòŋboŋ ce bèe a ce gèe. Buu bbòŋboŋ ce bèe mo' a ce gèe vi lò yaŋse yɛɛti. Buu bbòŋboŋ ce bèe mo' a ce gèe vi lò lor nfè' ka' yɛɛti. Geewa'a àde' vi lo buu efa ryɛɛtì ka'.

Currently Selected:

Ñwaè' Timotïì Ce Entombïì 5: LNT

Highlight

Copy

Compare