Nhelo 16
16
1Munhu kangijesaga kudita mbuli zoyogana heye,
ila ulonzi wa kuduma ndo wa heye Mkulu Nguluwi.
2Madito ga munhu gangonekaga kwa heye kota ga goya,
ila Mkulu Nguluwi kangujezaga kunuwila kwa munhu.
3Umhe Mkulu Nguluwi choneche choulingudita,
na mbuli za hegwe zokulutila goya.
4Mkulu Nguluwi nakalumba chila chinhu kwa kunuwila kwa heye,
mbaka wehile kwa chiwalo cha zuwa lya kudumya.
5Chila yalingidaya ndo izudizo kwa Mkulu Nguluwi,
ndangukomya, munhu kota ayo kogazigwa.
6Kwa igano lya kwimilila na kukundigwa, munhu kanguditilwaga uhanyisi,
kwa kumdumba Mkulu Nguluwi, kangiwikaga kutali na wihe.
7Wone Mkulu Nguluwi yanojezwe na madito ga munhu,
kanguwagalamulaga mbaka wang'honyo wa heye wanguwa goloko.
8Fola lufufu ludo kuli kutanganika,
kusinda kuwa na vinji kuli wihe.
9Munhu koweza kudita goyalingijesa kudita,
ila Mkulu Nguluwi kangulongozaga chila choyalingudita.
10Mndewa kangwamulaga kwa kulongozwa na Nguluwi,
hoyolavya utaguso hambe yawifye.
11Mkulu Nguluwi kanguganaga vipimilo na mizani ja hachi,
vipimilo vyeng'ha vya mizani kuli chihako cha kupimila, ndo mijito ja heye.
12Ndo izudizo wandewa kudita wihe,
kwa vila misisi ja ludali lwa hewo ndo hachi.
13Mndewa kanguganaga munhu yalingulonga kwa kutanganika,
kangumganaga munhu yalingulonga kwa hachi.
14Ng'halazi ya mndewa ndo kota msenga wa kubagama,
munhu yawele na luhala koidita isindamale.
15Wone kumeho kwa mndewa kupuliche, hana ukomu,
kunoga kwa heye ndo kota ng'hungugu ya luhela.
16Kuwa na luhala ndo kunoga kusinda zahabu,
kupata nyhala ndo kuhagula kunojile kusinda sendi.
17Nzila ya wagoloche nhumbula yangiwikaga kutali na wihe,
yalingwamila nzila ya heye, kangwamilaga kikala kwa heye.
18Kidaya kwangulongolaga kudumya,
nhumbula ya kidaya yangulongolaga kugwa.
19Fola kuwa ulingunyenyetela na mzunwa,
kusinda kihanza vinhu vya kuboka na walingidaya.
20Yalingibatilila malanguso, mbuli za heye zomlutila goya,
kotambichizwa munhu yalingitumbila kwa Mkulu Nguluwi.
21Yawele na luhala mnhumbula kanguchemigwa yawele na nyhala,
ulonzi wa kunojeza wanguwakwega wanhu.
22Luhala ndo nzasa ya ukomu kwa yawele nalo,
ila upoka ndo kuzapigwa kwa wapoka.
23Nhumbula ya yawele na luhala yangumditaga yalonje kwa kilolela,
yanguuditaga ulonzi wa heye uwe wa kukwega wanhu.
24Ulonzi wa isungu ndo kota hanombwa,
ndo unona kuli nhumbula na una mong'ho kuli lukuli.
25Hana nzila youlingijesa kota ya goya,
ila kuli kuduma yoweza kukulongoza kuli kubagama.
26Kugana chilyo kwangumdita mkola mijito yekangaze,
kwa vila nzala yangumdita yalutilile.
27Mjuvi kangijesaga kudita wihe,
ulonzi wa heye ndo kota chiluli ching'hang'hale.
28Munhu yajilile kangwenezaga kilewa,
yalinguheha kanguwaditaga wanhu webagule na goloko.
29Munhu yawele na nhumbula yihile, kangumhada munhu yowalingikalasa habehi,
kangumlongozaga kuli nzila yihile.
30Yalingukonyeza kwa wihe kangijesa kudita gehile,
na yohambe yagane kulonga, kangunuwila kudita gehile.
31Kuwa na mbuliza za usekulu ndo itaji lya ukulu,
lyangulawa kuli kikala kwa kutanganika.
32Yohawele mbewe wa kuzudila ndo kanoga kusinda yawele na mong'ho,
yalinguilongoza nhumbula ya heye yuye ndo kanoga kusinda yula yalinguuhola muji kwa lupichi.
33Simbi yangutowigwa leka kuvizela goyolawila,
ila Mkulu Nguluwi ndo yalingwamula chila chinhu.
Currently Selected:
Nhelo 16: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
