Nhelo 17
17
1Fola ibumunda likalile kuli kikala goya,
kusinda mnvina kuli ng'handa ya kilewa.
2Chitumagwa yawele na luhala, kohola honhu ha mwana mpoka,
leka yawe na honhu ha kuhalila ha ivyazi alyo.
3Zahabu ama sendi zangwelizwa kwa chiluli kuli itanulu,
ila Mkulu Nguluwi ndo yalingweliza nhumbula za wanhu.
4Yalingudita wihe kanguhulichizaga ulonzi wihile,
mdesi kanguhulichizaga umyango wa uhadi.
5Yalingumbeza mzunwa kangumliga Yamlumbile heye,
yalingusangalalila kutunya kogazigwa.
6Wazukulu ndo itaji lya wasekulu wa hewo,
wana ndo lutogo lwa mhaza na mamo wa hewo.
7Ulonzi unojile hauwele hihi hela hali mlomo wa mjuvi,
ila ndo vibi ng'hatu kwa chilongozi kulonga ulonzi wa udesi!
8Kwa yalingulavya vinhu kwa uviso, kudita ahyo ndo kota subala,
kangijesa kota mbuli za heye zolutilila goya.
9Yalingulechela gehile kangulutiliza igano,
ila yalingukumbusila nongwa kangubagulaga goloko.
10Makanyo kwa wawele na luhala gana mana,
kusinda mitowa miya imwe kwa wapoka.
11Choyalingudita munhu yehile ndo kubelenhuka hela,
msenga yang'hang'hale kolajizwa kwa heye.
12Fola kiting'hana na isimba idala ling'hang'hale lisukuligwe wanage,
kusinda kiting'hana na mpoka kuli upoka wa heye.
13Yalinguhilula gehile kwa ganojile,
gehile hagokuka mng'handa ya heye.
14Kwaluchiza kilewa ndo kota kutula izimbo lya mazi,
lelo, uleche kudita ahyo, kung'hali kitwanza hakunakwaluka.
15Kumlechela yawele na nongwa na kumgaza yalihela nongwa,
geng'ha meli ndo izudizo kwa Mkulu Nguluwi.
16Lekachoni mpoka yawe na sendi mmoko ga kugulila luhala,
kuno heye yuye kahela nyhala?
17Goloko kanguganaga mazuwa geng'ha,
mwenyelukolo kangupondigwa kwa chiwalo cha utanzi mhela wa magazo.
18Haiwele mbuli ya nyhala kuwika lehani,
na kiwika lehani honhu ha munhu yunji.
19Yalingugana kilewa kangugana gehile,
yalingidaya kangipalila kudumigwa.
20Yawele na nhumbula yajilile, mbuli za heye haziwa goya,
na yalingulonga udesi, kangufikwaga na magazo.
21Mwana mpoka ndo masinzo kwa mhaza wa heye,
na usangalalo wa haduhu kwa mhaza wa mpoka.
22Nhumbula ilingusangalala ndo mikwandi,
ila nhumbula iwele na masinzo yangwambuza lukuli luwe ng'hochele.
23Yehile kangubochelaga vinhu kwa uviso,
leka yajilize hachi.
24Choyalingugana yawele na luhala, ndo nyhala,
ila mpoka kangugana chila chinhu muisi.
25Mwana mpoka ndo masinzo kwa mhaza wa heye,
na usungu kwa mayake yampondile.
26Haiwele goya kumdita munhu yalihela nongwa yalipe faini,
ama kuwatowa wang'hangala kwa chiwalo cha kugoloka kwa hewo.
27Yalingijesa yang'hali kulonga, kana luhala,
munhu yawele liholile ndo yawele na nyhala.
28Wone mpoka yanyamalile, kangonekaga kota kana luhala,
wone yadinye mlomo wa heye, kangonekaga kota yawele na nyhala.
Currently Selected:
Nhelo 17: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
