Nhelo 15
15
1Kwidichila kwa uliholile kwangulemeza ng'halazi,
ila ulonzi ung'hang'hale wangonjeza ng'halazi.
2Umyango wa yawele na luhala wanguutogolaga uwanzi,
ila mlomo wa mpoka wangulavyaga upoka.
3Meho ga Mkulu Nguluwi gangonaga chila chinhu,
ganguwapugajizaga yanojile na yehile.
4Umyango uwele liholile ndo mwaluko wa ukomu,
ila mlomo wajilile wangutwegulaga nhumbula.
5Mpoka kangubezaga malanguso ga mhaza wa heye,
ila yalingukunda makanyo ndo msugu.
6Kaye kwa yatanganiche hana lufufu lwinji,
ila choyalingupata mwihe changumigalila magazo.
7Mlomo wa yawele na luhala wangweneza uwanzi,
ila haiwele ahyo kuli nhumbula ya mpoka.
8Nhambiko ya wehile ndo izudizo kwa Mkulu Nguluwi,
ila kulanda kwa wagoloche nhumbula kwangumsangalaza Nguluwi.
9Madito ga wehile ndo izudizo kwa Mkulu Nguluwi,
ila Nguluwi kanguwaganaga walinguwinza mbuli za kutanganika.
10Magazo gang'hang'hale ndo kwa chiwalo cha yalinguleka madito ganojile,
yoneche yalinguzudila kukanyigwa kobagama.
11Wone Mkulu Nguluwi kangugazela ga kuli Kubagama na ga kuli Kudumya,
ndaze, majesa ga wanhu goweza kivisa hali heye?
12Yalingubeza hambe yagane kukanyigwa,
hambe yapale utanzi kwa yawele na luhala.
13Nhumbula iwele na kusangalala yangukudita kumeho kupuliche,
ila usungu wangutwegula nhumbula.
14Yawele na luhala kangupalaga uwanzi,
ila mpoka kangulyaga upoka.
15Kwa yalingubunzwa chila zuwa ndo liha,
ila kwa yawele na nhumbula ilingusangalala ndo mnvina yohambe imale.
16Fola kuwa na chido na kumdumba Mkulu Nguluwi,
kusinda kuwa na ng'hano nyinji hamwe na magazo.
17Fola chilyo cha ibwasi na kuwa na igano,
kusinda mnvina ya iwunde linyatile na kuwa na kuzudila.
18Munhu wa ng'halazi kangwambuzaga kilewa,
ila yula yawele halinguzudila himahima, kangukudita kilewa kusindamale.
19Nzila ya mgata naimema miwa,
ila ya yula yagoloche nhumbula ya hazelu kota nzila ng'hulu.
20Mwana yawele na luhala kangumditaga mhaza wa heye yasangalale,
ila mpoka kangumbezaga mayake.
21Upoka ndo usangalalo kwa mpoka,
ila yalinguvizela goya kanguhagulaga nzila iwele goya.
22Majesa ga kudita chinhu ganguwifigwa wone hawe haduhu utanzi kulawa kwa wanji,
ila wone hawe na wanhu wenji wa kutanza, majesa ago gosumya.
23Munhu kanguwaga na usangalalo wone yedichile goya,
ulonzi unojile kwa mhela wake ndo unoga lukami.
24Nzila ya yawele na luhala yanguluta kuchanya kuli ukomu,
leka yewiche kutali na kwinjila hasi kuli isi ya wabagame.
25Mkulu Nguluwi kangubomolaga ng'handa za wala walingidaya,
ila kangwamilaga mbaka ja haluga ha wadala wafililwe na walume wawo.
26Majesa ga mwihe ndo izudizo kwa Mkulu Nguluwi,
ila ulonzi wa isungu ndo welile.
27Munhu yawele na maya ga sendi, kanguligalilaga magazo ivyazi lyake,
ila yalinguzudila kupegwa chinhu choneche kwa uviso, kochikala.
28Nhumbula ya yatanganiche yangijesa kung'hali kwidichila,
ila mlomo wa mwihe wangulongaga wihe.
29Mkulu Nguluwi ka kutali na wehile,
ila kanguhulichiza kulanda kwa watanganiche.
30Meho ga isungu gangusangalaza nhumbula,
mbuli inojile yangusangalaza lukuli.
31Munhu yalinguhulichiza makanyo ganojile,
kana honhu hake hali wawele na luhala.
32Yalingulema kulanguswa kangibeza yuye,
ila yalingukunda makanyo kowa na luhala.
33Kumdumba Mkulu Nguluwi ndo malanguso ga luhala,
kung'hali kutogoligwa yanguganigwa kuwa ulingunyenyetela.
Currently Selected:
Nhelo 15: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
