2KORẼNT RÃMBA 1

Sebra soab la a pʋʋsgo

1 # Tv 18,1. Maam, a Pol, a Zezi Krista Tʋʋm-tʋmd ne Wẽnd daabo, maam ne m saam-biig a Timote, tõnd n pʋʋsd Wẽnd Tigenga sẽn be Korẽnt la d saam-bi sõma wã fãa sẽn be Akayi tẽn-tõre. 2Bɩ Wẽnnaam tõnd Ba la d Soaal a Zezi Krista sik y fãa zutu b bark la b laafi!

3Bɩ Wẽnd la d Soaal a Zezi Krista Ba, nimbãan-zoeer Ba, toog buud fãa yoalsdã, paam barka! 4Bãmb n maasd tõnd sũuri d namsga pʋgẽ, la b meng sẽn maasd d sũurã, bãmb n sõngd tõndo tɩ d me maasd d taab sũuri, b sẽn zĩ ne toog ning fãa. 5Wala Krista namsga sẽn lebg yõod ka tɛk tõnd yĩnga, boto me, ne Krista maasem, d sũ-noog lebga zembala. 6D sã n namsdẽ, yaa yãmb sũur bʋkr yĩnga la y fãagre. D sũura sã n bʋke, yãmb me rẽnda na bʋke tɩ y sak wakat fãa, namsg niyns tõnd me sẽn namsde. 7La saagr bee wʋsgo tɩ y sẽn naag tõnd n namsã, y na naag n kɩdem sũ-noog ne do.

8 # 1Ko 15,32. M saam-biisi, m ka rat n soolg-y ye: pɛt ning d sẽn paam Azi tẽng nams-d-la wʋsgo al tɩ d da pa tẽed tɩ yõor kõn yãk ye. 9Sɩda tõnd meng d toore n sak tɩ b paalg tõnd d kũum bʋʋdo la woto d bãngame tɩ d ka tog n teeg d meng ye. Yaa Wẽnd la d tog n teeg tɩ bãmb n vʋʋgd sẽn ki. 10Yaa bãmb n zãag tõnd ne kũum a woto buud dũnna, n na n le zãag-d beoogo. 11Yãmb meng na sõngd ne y pʋʋsgo, woto yel-sõmda sẽn ya kʋʋng yel-sõmdã na tak neb ka tɛka tɩ b wa pʋʋs bark d yĩnga.

A Pol sora ka yɩ waa a sẽn da sed ye

12Bũmb n ya tõnd zu-zẽkre la yaa d sẽn pelg d pʋg n zã d meng zamaana pʋgẽ la yãmb sʋka ne sõmblem la sɩda sẽn ya Wẽnd kũuni. Ad-y rẽ ka tũ ne ninsaal sɩlem ye, a tũu ne Wẽnd sõngre. 13Bũmb ka be tõnd sɛba pʋgẽ n zʋʋg yãmb sẽn karemd la y wʋmd bũmb ninga ye. M tẽed tɩ y na wʋm fãa — 14tɩ m neeme tɩ y zoe n wʋma bilfu — m tẽed tɩ m na yɩ y zu-zẽkre wala yãmb me sẽn na n yɩ m zu-zẽkre Soaal a Zezi Krista raare.

15Yaa m sũura sẽn da kegem woto la m da rat n deng n tũ y nengẽ n le paas y sũ-noogo. 16#Tv 19,21. M sã da yiẽ yãmb nengẽ m na n digẽ la Masedoan, n tɩ yi be n le wa y nengẽ, tɩ y yaoolẽ marsã n taas-m Zɩɩde. 17M mii, m tagsame tɩ seke ne m kẽna sẽn sigl woto wã? M mii, m ka kelg m sũura sẽn ya ninsaal sũuri n mi N-yẽe rũnna n yik beoog n mi Ayoo? 18Wala Wẽnd sẽn yɛs b sɩd zĩigẽ, tõnd goama ne yãmb ka naag n yɩ N-yẽe la Ayoo ye. 19#Tv 18,5. Maam, a Silvẽ la a Timote sẽn moon yãmb Wẽnnaam Biig a Zezi Krista, nin-kãng me pa naag n yɩ N-yẽe la Ayoo ye. Bãmb nengẽ yɩɩ N-yẽe bala. 20Wẽnd sẽn kãaba fãa, bãmb n gõms ne b zugu tɩ yaool n yɩ, la yaa bãmb maasem yĩnga la b sã n yet tɩ Wẽnd paam pẽgre bɩ tõnd tõe n leok tɩ: Ami! 21Wẽnd n vigl yãmb ne maam Krista maasmẽ la b taag tõnd ne b ka-sõngo. 22Bãmb n ning b bãnd tõnd dĩirẽ la b pids tõnd sũuri ne a Vʋʋsem Sõng kũuni.

23Wẽnd naag-m lame n ya kaseto tɩ yaa m sẽn pa rat gãgs ne yãmbã la m pa wa Korẽnt. 24Ka yet tɩ d da ratẽ lame n dems y tẽeba ye. Ayoo! Y sũ-noog la d baooda; d miime tɩ sã n ya y tẽeba, y wɩk n yɛsa y nao zutu.

Currently Selected:

2KORẼNT RÃMBA 1: SSDC98

Highlight

Copy

Compare