Maahtiyo 10

Mitaahshiniishin ininiwa' Ciisahs kaakii'-onenimaatc ci⁠otishinisha'waakanitc

(Mark 3.13-19; Luke 6.12-16)

1Ciisahs tahsh okii'-antomaa' i'i kaa⁠mitaahshiniishinitc okihkino'amawaakana' ekii'-miinaatc kashki'ewisiwin ci⁠saakiciwepinaanitc maciahcaahkwa', ci⁠minoayaa'aanitc kaye awiya' aaniin iko kaa'⁠inaahpinenitc. 2Miitahsh o'o kaa'⁠ishinihkaasonitc iniweniwa' mitaahshiniishin otishinisha'waakana': a'awe nihtam, Saaiman (Simon) kaakii'-oshinihkaanintc Piitar (Peter), kaye wiicihkiwensiwan Entaroon (Andrew), shikwa Ciimis (James) kaye wiicihkiwensiwan Cwaanan (John) kaakii'-otetewaatc Sepatiin (Zebedee). 3Shikwa Pilap (Philip) kaye Paarhtaalamiyo (Bartholomew), shikwa Twaamahs (Thomas), kaye Maahtiyo (Matthew) kaakiih tipa'ike'iwetc, shikwa Ciimis (James) kaakii'-otetetc Aalpiyahsan (Alphaeus), kaye Taatiyahs (Thaddeus). 4Shikwa Saaiman (Simon) mii 'awe peshik kaawiih kakwe aancihsehtootc okimaawiwin kaatinoowitc. Kaye Cootahs Iskeriyat (Judas Iscariot) kaawii'-mamishi'aatc Ciisahsoon.

Otanohkiiwiniwaa iki mitaahshiniishin ishinisha'waakanak

(Mark 6.7-13; Luke 9.1-6)

5Ciisahs okii'-maacinisha'waa' i'i kaa⁠mitaahshiniishinitc o'o ekii'inaatc: “Keko wiin ishaahkek kaa⁠inamok kaa⁠Coowiwihsikwaa kaaishi ayaawaatc, i'imaa kaye kaaishi ootenawi'itiwaatc Sameriyaawininiwak (Samaritans). 6I'imaa tahsh ehta ishaak, Isriyalininiwak (Israel) kaashi ayaawaatc, taapishkoo maanahcaanihshak kaa⁠wanihshinowaatc kaa⁠ishinaakosiwaatc. 7#Luk 10.4-12. Maacaak itahsh cishi wiintamaakeyek o'o ihkitowin: ‘Asha pehshonaakwan Kishemanitoo ewii'-oshihsitootc oTipencikewin.’ 8Minoayaa'ihkok otaahkosiik, pimaaci'ihkok kaa⁠nipowaatc, minoayaa'ihkok kaa⁠omikiiwaahpinewaatc, saakiciwepinihkok maciahcaahkwak. Kaawiin kikiih tipa'ansiim kaakii'-miinikooyek: miihsh i'i peshikwan ishi miikiwek. 9Keko wiin kipiintaahsoniwaank ishi maaciinaahkek osaawi shooniyaa, waapaapihko shooniyaa kaye, keko kaye maaciinaahkek pankii kaa⁠inakinsotc osaawaapihko shooniyaa. 10#1Co 9.14; 1Ti 5.18. Keko wiin kaye maaciitoohkek mashkimot, kotak papakiwayaan, kotak mahkisinan, sahka'onaahk kaye. Aaniihsh otanohkii taamiinaa aaniin eshi noontehsetc.

11“Ahpii anitakohshinek weti ootenaank komaa kaye taawinink, nanaantawaapamihk awiya ke⁠inaatisitc ke⁠piintikaninek. Miitahsh i'imaa ke⁠ayaayek paamaa ocihcihsek cini maacaayek. 12Ahpii tahsh piintikanikooyek i'imaa waahkaa'ikanink, miitahsh ke⁠ihkitoyek: ‘Pisaanisiwin kika wiiciiwikom.’#10.12 Pisaanisiwin kika wiiciiwikom: mii 'i kaaihkitowaatc Coowak kii⁠pooshoo'itiwaatc ahpii kii⁠waapantiwaatc. 13Kiishpin tahsh minowiiciiwinekwaa i'imaa kaa‑ayaawaatc waahkaa'ikanink, i'imaa ishinakatamok i'iwe kaakii'-ihkitoyek kiipi piintikeyek. Kiishpin tahsh inaatisihsikwaa i'imaa waahkaa'ikanink, kiiwe otaahpinamok i'iwe kaakii'-ihkitoyek: ‘Pisaanisiwin kika wiiciiwikom.’ 14#Act 13.51. Kiishpin tahsh piintikanikoohsiwek, pisintaakoohsiwek kaye i'imaa ootenaank, komaa kaye taawinink, miitahsh ishi paahpaawisitehshimoonok, cini maacaayek. 15#Gen 19.24-28; Mat 11.24. Nawac niipiwa' oka inaahkonaa' Kishemanitoo i'imaa kaa‑ayaanitc ootenaank, ahpiihc wiin i'imaa kaakii'-ayaanitc Swaatamiink (Sodom), Kamwaara (Gomorrah) ootenaank kaye.”

Kakwaataki'ikoowinan kepi ishihsekin

16 # Luk 10.3. “Pisintawihshik! O'o kaa⁠ishinisha'onakook, mii'i eshinaakosiyek taapishkoo ke⁠naatamaatisohsikwaa maanahcaanihshak kaa⁠ishaawaatc mekwe ma'iinkanihkaank. Kaa ahpiihci ayaankwaamisitc itahsh kinepik mii'i nahke ishi ayaankwaamisik; kaa‑ahpiihci noohkaatisitc a'a omiimiinhs, mii'i ahpiihci noohkaatisik. 17#Mrk 13.9-11; Luk 12.11-12; 21.12-15. Ayaankwaamisik! Ayaawak ohsha ininiwak ke⁠tahkoninekwaa ke⁠ishiwininekwaa kaye tipaahkonikewikamikonk, kika pahpahshanshe'okowaak kaye otanami'ewikamikowaank. 18Niin eh⁠tipeniminakook kikaonci ishiwinikoom aanti keishi tipaahkoninekwaa iki kaa⁠okimaawentaakosiwaatc, kihciokimaak kaye, ci⁠wiintamawekwaa i'i minwaacimowin iki kaakiih piininekwaa kaye iki kaa⁠Coowiwihsikwaa. 19Keko wiin wawaanentankek aaniin ke⁠ihkitoyek, aaniin kaye mayaa ke⁠ihkitoyek. Kika miinikoom ohsha aaniin ke⁠ihkitoyek ahpii ocihcihsek. 20Kaawiin tahsh kiinawaa kaakiikitoyek, ini hsa kiTetewaa otAhcaahkwan kika wiici'ikowaa aaniin ke⁠ihkitoyek.

21 # Mrk 13.12; Luk 21.16. “Ininiwak kaye pisaaniko ta⁠miikiwewak wiicihkiwewaa' ci⁠nihsimintc. Otetemaak kaye mii peshikwan ke⁠tootawaawaatc oniicaanihsiwaa'. Apinoonciishak kaye oka shiinkenimaawaa' oniiki'ikowaa', oka pakitinaawaa' kaye pisaaniko ci⁠nihsimintc. 22#Mat 24.9,13; Mrk 13.13; Luk 21.17. Kahkina awiyak kika shiinkenimikowaak niin onci eh⁠tipeniminakook. A'a tahsh ke⁠mashkawentank eh⁠pakiciihsik, piinihsh weti kahkina kekoon kii‑ishkwaahsenik, mii 'awe ke⁠pimaaci'intc. 23Kakwaataki'ikooyek kaye i'imaa peshik ootenaank, pahkaan ootenaank ahpa'iwek. Kitishi wiintamawininim, kaawiin kika tekiishihtoohsiim kitanohkiiwiniwaa i'imaa ootenaahkaank Isriyalihkaank (Israel), mii aasha ci⁠takohshininitc Inini oKosihsan.

24 # Luk 6.40; Jhn 13.16; 15.20. “A'a kihkino'amawaakan kaawiin awahshime ahpiihtentaakosihsii kaa‑ahpiihtentaakosinitc ini kaa⁠kihkino'amaakotc. A'a kaye kaa⁠pamiihtaaketc kaawiin awahshime ahpiihtentaakosihsii kaa‑ahpiihtentaakosinitc ini otookimaaman. 25#Mat 9.34; 12.24; Mrk 3.22; Luk 11.15. Miitahsh i'i teminihk ci‑inentankipan ci‑ishi ayaatc a'a kihkino'amawaakan kaaishi ayaanitc kaa⁠kihkino'amaakotc, a'a kaye kaa⁠pamiihtaaketc ci‑ishi ayaatc kaaishi ayaanitc ini otookimaaman. Kiishpin maciaya'aa Pi'elsipol (Beelzebul) ishinihkaacikaniwitc a'a kaa⁠niikaanishkank i'i taawin, awahshime tahsh takihci ishinihkaacikaniwiwa' kaa⁠niikaanishkawaatc.”

A'a ke⁠kohcikaniwihpan

(Luke 12.2-7)

26 # Mrk 4.22; Luk 8.17. “Keko wiin kohsaahkekwaanik ininiwak. I'i tahsh kaa‑akwana'ikaatek piinihsh tani mohshehsin. Kahkina kaye kekoon kaakii mootentaakwahk misiwe takihkencikaate. 27Wekonen kaa⁠wiintamawinakook eh⁠tipihkahk, tipaatotamok mekwaa eh⁠kiishikahk. Wekonen kaye kaakii moocinoontamek, wakiciwaahkaa'ikanihkaank kikaonci kishiiwewiintamaakem. 28Keko tahsh wiin kohsaahkekwaanik iki kaa⁠nihtoowaatc wiiyawimaani, kaa⁠pwaanawi'aawaatc tahsh ci⁠nihsaawaatc ini ahcaahkomaan. A'a tahsh kohsihk Kishemanitoo kaa⁠kashkihtootc ci⁠nihshiwanaacihtootc wiiyawini kaye kaa⁠kashki'aatc ci⁠nihshiwanaaci'aatc ahcaahkomaan i'imaa maci ishkotenk. 29Kiishpin peshik piiwaapihkoonhs ayaawatc, niishin miskominihkehsiwak#10.29 niishin miskominihkehsiwak: kaa⁠kitimaakisiwaatc kii'⁠nihtaa ataawewak o'o miskominihkehsiwa' ci⁠amwaawaatc, aaniihsh kii'⁠wentakinsowa'. kitaa⁠tetipa'waak. Mihsawaa piko peshik miskominihkehsi kii⁠pankihshink mihtahkamikaank, kiTetewaa ohsha okihkenimaan. 30Kiinawaa tahsh wiin, kaa⁠tahsopeshikwahkin kii⁠nisihsiwaan kahkina kihkencikaatewan. 31Keko tahsh kiinawaa sekisihkek, nawac kiinawaa kikihci inentaakosim ahpiihc wiin miskominihkehsiwak.”

Ta⁠shawentaakosi awiya kewiinaatc Christan eh⁠tipenimikotc

(Luke 12.8-9)

32“A'awe hsa ke⁠wiinshitc eh⁠piminisha'otc enaahsamiinitc awiya', mii'i keniin ninka wiinaa eh⁠tipenimak enaahsamiinitc ninTeten kihcikiishikonk kaa‑ayaanitc. 33#1Ti 2.12. A'a tahsh wiin ke⁠ihkitotc eh⁠piminisha'ohsik enaahsamiinitc awiya', miitahsh keniin peshikwan ke⁠inak eh⁠tipenimaahsiwak 'imaa enaahsamiinitc ninTeten kihcikiishikonk kaa‑ayaanitc.”

Awiya kii⁠wiiciiwaatc Ciisahsoon kaawiin oka minowiiciiwikohsii' otinawemaakana'

(Luke 12.51-53; 14.26-27)

34“Keko wiin inentankek ci⁠minowiiciintiwaatc awiyak ci‑ishi'akwaa kaakii'onci piishaayaan o'omaa ahkiink. Kaawiin wiin minowiiciintiwin ninkiih piitoohsiin, i'i hsa miikaatiwin. 35#Mic 7.6. Kaakii'onci piishaayaan, a'a inini cionci maanenimaatc ini oteten, otaanihsimaa kaye ci⁠onci maanenimaatc omaamaan, ohshimihsimaa kaye cionci maanenimaatc osikohsan. 36Inini tahsh maawac keshi inkenimikotc i'imaa ta⁠onciiwa' kaashitaatc.

37“Awenen nawac ke⁠saaki'aatc ini oteten komaa kaye omaamaan ahpiihc niin kaaishi saaki'itc, kaawiin teahpiihtentaakosihsii ci⁠piminisha'otc. Awenen kaye nawac ke⁠saaki'aatc ini okosihsan komaa kaye otaanihsan ahpiihc niin kaaishi saaki'itc, kaawiin teahpiihtentaakosihsii ci⁠piminisha'otc. 38#Mat 16.24; Mrk 8.34; Luk 9.23. Awenen kaye ekaa ke⁠pimiwinaahsik otaashiteyaahtikoman, kaa⁠piminisha'ohsik kaye, kaawiin ta⁠teahpiihtentaakosihsii ci⁠piminisha'otc. 39#Mat 16.25; Mrk 8.35; Luk 9.24; 17.33; Jhn 12.25. A'a tahsh ke⁠manaawanihtootc opimaatisiwin, aanciko kaawiin ta⁠tepinamaasohsii tepwe ke⁠onci pimaatisitc. A'a tahsh ke⁠pakitinank opimaatisiwin niin onci, ta⁠tepinamaaso tepwe ke⁠onci pimaatisitc.”

Keshi tipa'amawintwaa kaa⁠minotootawaawaatc Ciisahsoon kaa⁠piminisha'waanitc

(Mark 9.41)

40 # Mrk 9.37; Luk 9.48; 10.16; Jhn 13.20. “Awenen iko kaa⁠piintikanihk, nimpiintikanik. Awenen iko kaa⁠piintikashitc opiintikanaan ini kaakiih piicinisha'omitc. 41Awenen iko kaa⁠piintikanaatc ini Kishemanitoo otipaacimowininiiman aaniihsh eh⁠kanoocikehtamawaanitc Kishemanitoon, kewiin hsa ta⁠tako tipa'amawaa. Awenen iko kaa⁠piintikanaatc kaa⁠kwayahko pimaatisinitc aaniihsh eh⁠kwayahko pimaatisinitc, kewiin hsa ta⁠tako tipa'amawaa. 42Maamihkawihk itahsh o'o! Awenen iko ke⁠mina'aatc tahkipiini ini peshik kaa⁠piminisha'omitc mihsawaa ko pankii kaa‑ahpiihtentaakosinitc, e'onci mina'aatc eh⁠piminisha'omitc, kekeht iko kewiin ta⁠tipa'amaakoowisi.”

Currently Selected:

Maahtiyo 10: OJBR

Highlight

Copy