Maahtiyo 9

Ciisahs ekiih pimaaci'aatc kaa⁠mamaancikwaahpinenitc

(Mark 2.1-12; Luke 5.17-26)

1Ciisahs tahsh kiih⁠poosi ciimaanink akaamink ekii'-ishaatc ekiih kiiwetc kaakii'-onciitc ootenaank. 2Kiih⁠piitamawaa tahsh peshik ininiwan ekaa ekiih pimohsehsinik, ekii'-mihcipimihshininitc nipewinink. Ahpii tahsh Ciisahs ekii'-waapantamawaatc aaniin ehpiihci tepweyentaminitc iniweniwa' kaa⁠piinikonitc, okii'-inaan ini kaa‑aahkosinitc: “Mashkawentan, niicii! Kimacitootamowinan poonencikaatewan.”

3Aaninta tahsh iki kaakii'-ayaawaatc i'imaa kaa⁠kihkino'amaakewaatc Onahshowewin, kii'⁠ayinentamook: “Wa'a inini opaahpinenimaan Kishemanitoon!”

4Ciisahs okiih kihkenimaa' aaniin enentaminitc. Miitahsh kaa'⁠inaatc: “Wekonen noociko wenci inentamek? 5Aaniin i'iwe ke⁠wentahkipan ci‑ihkitoyaampaan? ‘Poonencikaatewan kimacitootamowinan,’ maakishaa kaye ci‑ihkitoyaampaan: ‘Pasikwiin ci⁠pimohseyan’? 6Ci⁠waapantamek itahsh e'⁠ayaatc mashkawisiiwin a'a Inini oKosihsan o'omaa ahkiink ci⁠poonentamaakenitc ini macitootamowinan,” miitahsh kaa'⁠inaatc ini kaa‑aahkosinitc: “Pasikwiin, otaahpinan kinipewin, kiiwen!” okii'-inaan.

7A'a tahsh inini kiih⁠pasikwii shemaak ekiih kiiwetc. 8Iki tahsh i'imaa kaa⁠maamawenowaatc ahpii kaa'⁠waapantamowaatc kaakii'-inahkamikaninik, aahpici kiih⁠sekisiwak, ekii'-miikwehciwenimaawaatc Kishemanitoon kaa⁠miinaatc ininiwa' o'o tino kashki'ewisiwin.

Ciisahs ekiih kanoonaatc Maahtiyoon ci⁠pimiwiiciiwikotc

(Mark 2.13-17; Luke 5.27-32)

9Miitahsh imaa Ciisahs e'anionci maacaatc, okii'-waapamaan ininiwan e'⁠namatapinitc i'imaa kaakiih tananohkiinitc, Maahtiyo (Matthew) ekii'-ishinihkaasonitc. Maahtiyo tahsh kiih⁠tinowi kaa⁠maawantoonaatc tipa'ikewishooniyaan. Ciisahs okii'-inaan: “Piminisha'ohshin.”

Shemaak itahsh kiih⁠pasikwiiwan ekiih piminisha'okotc.

10 # Luk 15.1-2. Mekwaa tahsh Ciisahs okihkino'amawaakana' kaye e'⁠wiihsiniwaatc i'imaa Maahtiyoon owaahkaa'ikaniniink, kiih⁠paahtiinowa' kaa⁠maawantoonaanitc taakihs (tax) shooniyaan, kotak kaye kaa⁠aanawenimimintc, ekii'-wiici wiihsiniimikowaatc. 11Ahpii tahsh Perahsiik (Pharisees) kaa'⁠waapankewaatc okii'-inaawaan kihkino'amawaakana': “Wekonen tahsh kikihkino'amaakemiwaa wenci wiitoohpamaatc i'i tino kaa⁠maawantoonaanitc taakihs shooniyaan, kotak kaye awiya' kaa‑aanawenimimintc?”

12Ciisahs ekii'-noontawaatc okii'-inaa': “Iki ekaa kaa‑aahkosihsikwaa kaawiin onantawenimaahsiwaawaan mashkihkiiwininiwan, kaa‑aahkosiwaatc ehta. 13#Mat 12.7; Hosea 6.6. Ani maacaak itahsh ci⁠kakwe kihkentamek wekonen o'o kaaonci ishipii'ikaatek: ‘O'o kaa‑antawentamaan i'i ci⁠shawenintiyek, kaawiin wiin ehta awahkaanak ci⁠nihsekwaa ci⁠pakitinikaakeyek.’ Kaawiin tahsh wiin ninkii'onci piishaahsii ci⁠antomakwaa okwayahkwaatisiik, iki hsa ci⁠antomakwaa kaa‑aanawenimintwaa.”

Mantawii'itisowin eh⁠kakwecimintc

(Mark 2.18-22; Luke 5.33-39)

14Iki kaakiih piminisha'waawaatc Cwaanan (John) Siika'antaakewininiwan okiih pinaasihkawaawaan Ciisahsoon ekii'-inaawaatc: “Niinawint iki kaye Perahsiik (Pharisees) mooshak nintoonci-anami'emantawii'itisomin. Wekonen tahsh wiinawaa kikihkino'amawaakanak wiihkaa wenci anami'emantawii'itisohsikwaa?” kii'‑ihkitowak.

15Ciisahs okii'ishi nahkwehtawaa': “Minihk iko ke⁠ayaatc i'imaa a'a inini kaa⁠kihciwiitiketc, kitinentaam ina ci⁠maanentaminihpan i'i kaapi antawaapamikotc? Kaawiin iitok! Ninkotink itahsh ta⁠ishihseni ci⁠maaciicikaniwitc a'a kaa⁠kihciwiitiketc i'imaa kaashi ayaanitc, miitahsh i'i ahpii ke⁠maanentaminitc cionci wiihsinihsinik.

16“Awiya eh⁠pakwa'ank kehtepiinsihkawaakanini, kaawiin wiin otaapacihtoohsiin oshki ishiikinooni. Aaniihsh kiishpin pehkwacihsek i'i pakwa'ikan taa⁠kiki pahkwacihse i'i kehtepiinsihkawaakan. Aanciihke tahsh taa⁠mankipakonehse. 17Kaawiin kaye awiya osiikinansiin oshkishoominaapo i'imaa kehteshoominaapowashink. Aaniihsh kiishpin ishihcikehpan taakiih piikohsewan shoominaapowashan, kaye oshkishoominaapo taakiih siikihse, ini tahsh shoominaapowashan ta⁠nihshiwanaacihcikaatewan. Imaa tahsh oshkishoominaapoowashiink ishipiincisiikinikaate i'i oshkishoominaapo, miitahsh minciniish eshi minokanawencikaatekin shoominaapo kaye shoominaapowashan.”

Ciisahs ekiih pimaaci'aatc kaakii'-niponitc ihkwesenhsan kaye kaakii'-aahkosinitc ihkwewan

(Mark 5.21-43; Luke 8.40-56)

18Mekwaa tahsh o'o Ciisahs e'⁠ihkitotc, peshik Coowan kaa⁠okimaawentaakosinitc#9.18 Coo kaa⁠okimaawentaakositc: waapantan Mark 5.22. okiih pinaasihkaakoon ekii'-ociciinkwanapiihtaakotc ekii'-ikotc: “Nintaanihs kii'‑ishkwaapimaatisi noonkom. Taka pisaamin ci⁠pimaatisitc,” okii'-ikoon.

19Shemaak itahsh Ciisahs kiih⁠pasikwii ekii'ani wiiciiwaatc. Okihkino'amawaakana' kaye kii'‑ishaawa'.

20Peshik itahsh ihkwe mitaahshiniishopipoon ekii'-oncikawininik omiskwi, otaanaank okiihpionci naasihkawaan Ciisahsoon. A'a tahsh ihkwe okiih saaminamawaan Ciisahsoon kaashi kiihkeyiikaninik okashkiikiiwinini.#9.20 kaashi kiihkeyiikaninik okashkiikiiwinini: kii'⁠niihsiikikwaatewan Coowak okashkiikiiwiniwaan kaashi kakiihkeyiikaninikin e⁠wiih kihkinawaaci'itisowaatc Kishemanitoonk e⁠kii'-onci tipentaakosiwaatc. Waapantan Num. 15.37-41; Matthew 23.5. 21Aaniihsh kii'‑itiso: “Kiishpin ehta saaminamowak i'i okashkiikiiwin, mii'i ci⁠minoayaayaan.”

22Ciisahs ekiih kwehkihtaatc okii'-waapamaan ekii'-inaatc: “Mashkawentan! Kitepweyentamowin kiminoayaa'ikon.” Shemaak itahsh kii'⁠minoayaa a'a ihkwe.

23Ahpii tahsh Ciisahs ekiih piintiketc kaa⁠okimaawentaakosinitc owaahkaa'ikaniniink, okii'-waapamaa' kaakiih kitohcikepootaacikenitc awiya' kaye e'⁠mikoshkaacihcikenitc. 24Okii'-inaa' itahsh: “Kahkina kaa⁠tahshiyek saaka'amok! A'a ihkwesenhs kaawiin nipohsii, mihcinipaa ohsha.” Kahkina tahsh okiih paahpi'ikoo' ekii'-maanenimikotc. 25Ekiih saakicinisha'ontwaa tahsh kahkina, Ciisahs kiih⁠piintike aanti kaakii'ishi pimihshininitc ihkwesenhsan, miitahsh kaakii'ishi otaahpinamawaatc oninciini. Shemaak itahsh kii'⁠wanishkaawan. 26Misiwe tahsh i'imaa ahkiink kii'⁠noontaakaaniwanini o'o kaakii'-inahkamikahk.

Ciisahs ekii'-minoayaa'aatc niishin kaa⁠waapihsinik

27Ahpii tahsh Ciisahs kaa'anionci maacaatc, mekwaa tahsh e'ani pimohsetc, niishin kaakii'-waapihsinik okiih piminisha'okoo' ekii'ishi shaakowenitc: “Kiin Tepitink (David) kaa⁠ontahkaanesiyan!#9.27 Tepitink kaa⁠ontahkaanesiyan: mii hsa 'oweni Coowak kaa'⁠ishinihkaanaawaatc iniweniwan kaa⁠kiih pii'aawaatc Kishemanitoon kaa⁠kii'-onenimaanitc ci⁠pimaaci'iwenitc, ke⁠naapishkawaanitc kaye Tepitan otookimaawininiink. Kohpaatenimihshinaam!”

28Ahpii tahsh Ciisahs ekii'ani piintiketc waahkaa'ikanink okiih pinaasihkaakoo' i'i kaakii'-waapihsinik. Miitahsh kaakii'ishi kakwecimaatc: “Kitepwehtaam ina ci⁠kashkihtooyaan o'o ci‑ishihcikeyaan?”

Miitahsh kaakii'-ikotc: “Eha'.”

29Ciisahs tahsh okiih saaminaa' oshkiinshikoniink ekii'-inaatc: “Ta⁠ishinaakwan aaniin kaaishi tepweyentamek.” 30Shemaak itahsh kii'⁠waapiwa'. Aahpici tahsh okii'-ayaankwaamimaa' ekii'-inaatc: “Keko wiin wiintamawaahkekwaanik awiyak.”

31Pisaan itahsh iko mii'i kaa'ishi papaa tipaacimikotc i'imaa misiwe ahkiink.

Ciisahs ekii'-minoayaa'aatc ini kaakiikitohsinik

32Ahpii tahsh kaa'ani maacaanitc i'i ininiwa' kaakii'-waapi'aatc, awiyak okiih piitamawaawaan Ciisahsoon peshik ininiwan kaakiikitohsinik, aaniihsh okiih kikishkaakoni maciahcaahkwan. 33Ahpii tahsh kaa'⁠ishkwaa saakiciwepinikaniwitc a'a maciahcaahk, shemaak tahsh kiih⁠kakito a'a inini. Kahkina awiyak kiih⁠kihcimaamahkaatentamook. “Kaawiin wiihkaa waapancikaatehsinoon kekoon ci‑ishinaakwahk o'omaa Isriyalihkaank (Israel)!” kii'‑ihkitowak.

34 # Mat 10.25; 12.24; Mrk 3.22; Luk 11.15. Perahsiik (Pharisees) tahsh wiinawaa kii'‑ihkitowak: “Kihciokimaa maciahcaahkwan ohsha omiinikoon mashkawisiiwin kaaonci kashki'aatc ehsaakiciwepinaatc i'i maciahcaahkwa'.”

Ciisahs eh⁠koohpaatenimaatc i'i pemaatisinitc

35 # Mat 4.23; Mrk 1.39; Luk 4.44. Misiwe tahsh Ciisahs kiih⁠papaa ishaa ootenawan kaye kaa‑ayishitaaniwaninik ekiih papaakihkino'amaaketc Coowak otanami'ewikamikowaank ekiih kakiihkwaatank minwaacimowin, i'iwe Kishemanitoo wiipa kaawii'-oshihsitootc oTipencikewin. Okii'-minoayaa'aa' kaye kahkina kaakii'-aahkosinitc aaniiniko kaakii'-inaahpinenitc. 36#Num 27.17; 1Ki 22.17; 2Ch 18.16; Ezk 34.5; Zech 10.2; Mrk 6.34. Ekii'-waapamaatc itahsh ehpiihci paahtiinonitc awiya', aahpici okiih kihcikoohpaatenimaa'. Aaniihsh kii'⁠mikoshkaaci'aawa', kiih⁠pwaanawihcikewa' kaye, taapishkoo manahcaanihshak kaa‑ayaawaahsikwaa kaa⁠kanawenimikowaatc. 37#Luk 10.2. Miitahsh kaakii'onci kanoonaatc okihkino'amawaakana': “Inashke paahtiinat ke⁠manishikaatek. Aahpici tahsh pankiiwiwak kaa⁠mooshakinikewaatc. 38Kakwecimihk itahsh Kishemanitoo kaa⁠tipentank manishikewin ci‑ishinisha'waatc keyaapi otanohkii'aakana' ke⁠mooshakinaminitc ke⁠manishikaatenikin,” okii'-inaa'.

Currently Selected:

Maahtiyo 9: OJBR

Highlight

Copy