ROMANOS 14

No critiques a tu hermano

1Jicãarã Jesúre nʉcʉbʉgobana quena cʉ̃ ye quetire caroaro api majiquẽema. To bairo caroaro ca-api majiquẽna na ca-anibato quena na mena caroaro ãña. Na ca-tʉgooñabati wamerire cawatoa macá wamerire bairo na ca-ĩrije na mena ame wada canamuqueticõaña. 2To bairo tunu jicãarã Jesú ye quetire caroaro apiʉja majiquetibana, “Waibʉcʉ riire jã ca-ʉgaata caroorije jã átiborã,” ĩi tʉgooñabanama. Aperã maca, “Ʉgarique nipetirije ʉga rotirique ãa,” ĩi tʉgooñama naa. 3To bairi nipetirijere ca-ʉganucurã waibʉcʉ riire ca-ʉgaquẽna macare, “Ca-tʉgooña majiquẽna ãma,” nare na ĩi wada paiqueticõato. Tiere ca-ʉgaquẽna maca, “Dio cʉ̃ ca-tʉjooquẽtiere áama,” na quena nare na ĩi wada paiqueticõato. Dio yarã anicõama, cʉ̃ ye quetire ca-nʉcʉbʉgorã aniri. To bairi nare na wada paiqueticõato. 4Apeĩre ca-paabojaʉre, “Caroaro mʉ ʉpaʉre cʉ̃ mʉ átibojaquẽjupa,” cʉ̃re mani ĩi majiquẽna. Cʉ̃ ʉpaʉ jicãʉna ãmi, “Caroaro yʉre mʉ átibojayupa,” ca-ĩi majii. O, “Caroaro yʉre mʉ átibojaquẽjupa,” ca-ĩi majii ãmi cʉ̃ ʉpaʉ. To bairona ãa Jesú yarã quenare. “Caroaro yʉ átibojama,” o, “Caroaro yʉ átibojaquẽema,” jicãʉna ãmi mani Ʉpaʉ Jesú to bairo manire ca-ĩi majii. Caroaro mani cá-áticõa aninucuro mani átinemo majimi mani Ʉpaʉ.

5Jicãarã, “Ti rʉmʉ ca-ano Diore cá-áti nʉcʉbʉgope ãa ape rʉmʉri netoro,” ĩi tʉgooñarãma. Aperã maca, “To canacã rʉmʉ jicãro cõona Diore cá-áti nʉcʉbʉgocõa aninucupe ãa,” ĩima. To bairi mani nipetirã mani cá-átiere, “To bairo yʉ cá-áto ca-ñuurije ãa,” cariape mani ca-ĩi majiri wame jetore cá-átipe ãa. 6“Jicã rʉmʉ ape rʉmʉ netoro Diore cá-áti nʉcʉbʉgope ãa,” ca-ĩi ucʉ̃ Dio yʉ cá-átiere cʉ̃ tʉjoato ĩi to bairona ĩimi. Apeĩ, “To canacã rʉmʉ jicãro cõona Diore cá-áti nʉcʉbʉgope ãa,” ca-ĩi ucʉ̃ cʉ̃ quena Dio yʉ cá-átiere cʉ̃ tʉjoato ĩi to bairona ĩimi. Apeĩ ʉgarique nipetirijere ca-ʉgaʉ ucʉ̃ Diore tʉgooña nʉcʉbʉgori ʉgaʉmi. Ʉgari, “Caroaro yʉre mʉ jooyupa,” ĩimi Diore. Apeĩ waibʉcʉ riire ca-ʉgaquẽcʉ ucʉ̃ to bairona Diore tʉgooña nʉcʉbʉgoʉ ʉgaquẽemi. Cʉ̃ quena cʉ̃ ʉgarique oteriquere, “Caroaro yʉre mʉ jooyupa,” ĩimi Diore.

7-8Mani nipetirã mani Ʉpaʉ Jesú yarã aniri cʉ̃re ca-nʉcʉbʉgoparã mani ãa. To bairi catírãna mani majuuna mani ca-anipere ca-rotirã mee mani ãa. Mani ca-bai yajipe quenare mani majuuna mani roti majiquẽe. Mani ca-bai yajiro bero quena Dio yarã aniri cʉ̃re cá-áti nʉcʉbʉgoparã mani ãa. To bairi catírãna, o bai yajirã quena mani Ʉpaʉ Jesú yarã cʉ̃re ca-nʉcʉbʉgoparã mani ãa. 9To bairona cʉ̃re mani ca-nʉcʉbʉgoparore bairo ĩi manire ca-bai yajibojayupi Cristo. Cabero ca-tunu catíyupi. Ca-bai yajiricarã Ʉpaʉ, ca-catírã Ʉpaʉ quena anigʉ ca-baiyupi Cristo.

10Mʉja yarã Jesúre ca-nʉcʉbʉgorãre, “Rooro áama,” nare ĩi wada paiqueticõaña. “Ca-tʉgooña majiquẽna ãma,” nare ĩi tʉjʉ reequeticõaña. Mani nipetirã Dio tʉpʉ mani ca-ejari paʉpʉ dope bairo mani cá-átajere tʉjʉ cõoñagʉmi Cristo. Nipetirã mani cá-átajere tʉjʉ majiri, “Caroa mʉja cá-ápʉ́ o rooro mʉja cá-ápʉ́,” manire ĩigʉmi topʉre. To bairi mʉja majuuna aperãre, “Rooro áama,” na ĩi buio bate wada paiqueticõaña. 11Oco bairo ĩi ucarique ãa Dio Wadariquepʉre:

“Cariape majuu yʉ ĩi,” ĩmi mani Ʉpaʉ Dio ca-anicõa aninucuʉ. “Camaja nipetirã yʉre áti nʉcʉbʉgori yʉ tʉna rʉpopatuapʉ ejacumugarãma. Nipetirã, ‘Mʉna mʉ ãa Dio, caroaʉ, ca-tutuaʉ majuu,’ yʉre ĩi nʉcʉbʉgogarãma,” ĩi ucarique ãa.#Isaías 45.23

12Ti wame ucarica wame queti apirã mani maji. Mani ca-ano cõorena manire jeniñagʉmi Dio ati yepa ãnapʉ mani cá-átajere.

No hagas tropezar a tu hermano

13To bairi, “Dio cʉ̃ ca-tʉjooquẽtiere mʉ áa,” ca-ame ĩi wada paiquetipe ãa. Aperã mani yarã Jesúre ca-nʉcʉbʉgorã unare caroorije na cá-áto cá-átiqueticõape ãa. 14Mani Ʉpaʉ Jesucristo yaʉ aniri oco bairije yʉ ĩi maji: Ʉgarique jicã wame uniere, “Ca-ʉga rotiya manie ãa,” ĩi majiña maa. Apeĩ maca jicã wame ʉgariquere, “Dio cʉ̃ ca-tʉjooquẽtiere yʉ átiboʉ tiere yʉ ca-ʉgaata,” ĩi tʉgooñaʉmi. To bairo ca-ĩi tʉgooñaʉ aniri cariapena ca-bai buicʉcʉ aniboʉmi tiere cʉ̃ ca-ʉgaata. 15Aperã na ca-ʉga rotiquẽtiere mʉja ca-ʉgaata apeĩ rooro cʉ̃ ca-tʉgooñaro mʉja átiborã. Cʉ̃re ca-maiquẽnare bairo mʉja aniborã. Cʉ̃ quenare cʉ̃ ca-bai yajibojayupi Cristo. To bairi apeye uniere mʉja ca-ʉgagarije jʉgori apeĩ Cristore nʉcʉbʉgo janaremi ĩirã ʉgaqueticõaña. Cʉ̃ mairã ʉgaqueticõaña. 16“Yʉ cá-átaje cʉtie ñuubʉja,” ĩi majibana quena aperã, “Rooro áama,” yʉ ĩirema ĩirã tiere átiquẽja. 17Mani Ʉpaʉ Dio ye macaje me ãa mani ʉgarique, mani etirique macaje. Dio ye majuu me ãa tiea. Oco bairije maca ãa cʉ̃ ye macaje majuu cʉ̃ ca-rotirije: Cariape átaje. Aperã mena caroaro ãnaje. Cʉ̃ Espíritu Santo jʉgori mani ca-ani wariñuurije. Tie maca ca-ñuu netorije majuu ãa. 18To bairije Jesucristo cʉ̃ ca-boorije cá-ánare, “Caroarã ãma,” na ĩi tʉjʉ wariñuʉmi Dio. To bairona, “Caroarã ãma,” na ĩi tʉjʉnucuma camaja aperã quena to bairo cá-átinucurãre.

19To bairi caroa macare mani ána, aperã mena caroaro anigarã. Jesucristore mani ca-apiʉja nutuaparore bairo cá-átinemopa wamerire mani ána. 20To bairi apeye uniere mʉja ca-ʉgagarije jʉgori aperã Diore na ca-nʉcʉbʉgo janaro na átiquẽja. Ʉgarique nipetiri wame ca-ʉga rotirije ãno. To bairo to ca-anibato quena apeĩ, “Tiere ca-ʉgaquetipe ãa,” ca-ĩi tʉgooñaʉ ucʉ̃ tiere mʉja ca-ʉgaro tʉjʉboʉmi. To bairi tiere yʉ ca-ʉgaro tʉjʉri Diore nʉcʉbʉgo janaremi ĩirã ʉgaquẽja. 21Apeĩ Cristore apiʉja janaremi ĩirã, “Tie mani ca-ʉga rotiquẽtie ãa,” cʉ̃ ca-ĩrijere ca-ʉgaquetinucuparã mani ãa. To bairona vino na ca-ĩrije ca-mecʉorije ca-etiquetipe ãa. Noo apeye unie rooro cʉ̃ cá-áto cá-átiquetipe ãa manire. 22“Diore ca-apiʉjarã aniri nipetiri wame ʉga rotirique ãa jãare,” ca-ĩi tʉgooñarã mʉja ca-ãmata mʉja majuuna Dio jeto cʉ̃ ca-api majiro to bairona ĩi tʉgooñacõaña. Aperãre, “Nipetiri wame ʉga rotirique ãa,” ĩi buio batericaro mano to bairona ĩi tʉgooñacõaña. Aperã mena tiere ame wada netoquẽja. “Dio cʉ̃ ca-tʉjʉro atiere yʉ cá-áto ñuubʉja,” cariape ca-ĩi tʉgooña majii ucʉ̃ wariñuʉmi. 23Apeĩ maca, “Dio cʉ̃ ca-tʉjʉro atiere yʉ ca-ʉgaro ñuubʉja,” ca-ĩi tʉgooña majiquẽcʉ ucʉ̃ bai buicʉcʉmi cʉ̃ ca-ʉgaata. “Tiere yʉ ca-ʉgaro ñuuquẽto,” ĩi tʉgooñabacʉ quena tiere ʉgari bai buicʉcʉ baiimi cʉ̃a. To bairi noo ca-aniere mani cá-átie, “Tiere yʉ cá-áto ñuuquẽe,” ĩi tʉgooñabana quena ti wame mani cá-ápata caroorije mani átiborã.

Currently Selected:

ROMANOS 14: TAVNT2

Highlight

Compare

Copy